Troăng prôk “O pâ nhuô̆m Tơnêi têa Việt Nam” cho tơdroăng ki păng ‘nâng pơtâng tối, hnê hriâm ăm đô̆i viên, vâi hdrêng Pơlê kong kân Hồ Chí Minh ‘na tơdroăng rêh ối, tơdroăng cheăng Kăch măng kân dêi Pôa Hồ Chí Minh, Kăn xiâm hnê ngăn tơnêi têa; tơdroăng rôh nah ƀlêi trâng dêi Đô̆i thiê̆u niên Tiền phong Hồ Chí Minh, mâu ngế ki djâ troăng ahdrối đô̆i viên ki rơkê.

Xông tơpui a rôh trâm mâ, jâ Võ Thị Ánh Xuân, Phŏ Kăn xiâm hnê ngăn tơnêi têa pói vâ mâu muăn đô̆i viên, vâi hdrêng ki rơkê ai môi troăng prôk tơniăn, pơxúa ƀă kơnâ hên, vâ rêm troăng prôk hluâ kô gum mâu vâi muăn hlê plĕng trâu tâ ‘na tơdroăng rôh nah hdrông mơngế, tơbêng tuăn pâ pơlê xiâm, tơnêi têa, păn tơdroăng ki hâk tơngăm ƀă hlê plĕng hnoăng ƀă Tơnêi têa Việt Nam.

Phŏ Kăn xiâm hnê ngăn tơnêi têa mơnhên, Đảng ƀă Tơnêi têa mơdoh ăm tơdroăng ki má môi ƀă vâi hdrêng, pro tơ’lêi hlâu vâ rêm ngế vâi hdrêng châ hriâm tâp, pơtâp, mơnhông tung tíu ki tơniăn, lĕm tro ƀă mơnhông tâi ivá dêi tơná. Phŏ Kăn xiâm hnê ngăn tơnêi têa pói vâ mâu khu râ kăn cheăng Đảng, khu râ kăn pơkuâ, Măt trâ̆n Tơnêi têa, mâu khu tơrŭm cheăng kal kí - pơlê pơla, kơvâ hnê hriâm, Đoân Droh rơtăm ƀă Khu vâi hdrêng djâ troăng ahdrối Hồ Chí Minh pơtối tơmâng hên tâ troh tơdroăng kring vế, rak ngăn ƀă hnê hriâm vâi hdrêng.