Sap ing dâng 4 chôu 30 kơxo má, pơlê tơnăng ká xi xŏng Mũi Né (bêng Mũi Né, kong pơlê Lâm Đồng) hơniâp ro drêng mâu plong tuk tơnăng ká vêh troh a pơlê drêng klêi kơ’nâi môi măng tơnăng ká a têa kơxĭ. Lối hrĭng to plong tuk tơkŭm tung dế têa kơxĭ, tung pơla a plông prêi têa kơxĭ, tơdroăng ki vâi lăm roê ká xi xŏng hiăng pơxiâm hlo hên. Ngăn ing a ‘ngêi, lối hrĭng toăng plong tuk tot a kơpong têa kơxĭ ki drêh ngiât, pro chiâng tíu ki lĕm krê dêi pơlê tơnăng ká Mũi Né a rêm rôh kơxo má.

Akố, mâu plong tuk cho tơmeăm ki ôh tá chiâng lôi chôu kuăn mơngế ƀă ká xi xŏng lăm troh a kĭng. Tơdroăng ki hơniâp ro a rôh tê ká xi xŏng kơxo má drêng kuăn pơlê ƀă khu ki roê tơkŭm a plông prêi têa kơxĭ vâ roê xo ká xi xŏng nếo vêh troh a kĭng. Mâu kơthung ká ối lĕm châ kuăn pơlê klâ xoăng tơdrêng hlối a plông prêi têa kơxĭ hdrối vâ pơtroh troh a mâu kơchơ ƀă tíu ki vâi roê.

Klêi kơ’nâi hôp kơchơ, mâu kuăn pơlê ki tơnăng ká xi xŏng vâi tah xo dêi mâu ká ki kreăng a hlâm, hbrâ vâ pơtroh troh a tíu ki pơtối. Têa kơxĭ ki chu, hên kuăn pơlê vâi tăng rup uâng lâ ƀă rah xo mâu uâng lâ ki lĕm a kĭng tíu prêi, vâ thăm mơdêk châ liăn tơ’nôm. Klêi kơ’nâi mâu chôu pêi cheăng tơbrêi tơbrêh, pơlê tơnăng ká xi xŏng rế hía rế vêh ƀă tơdroăng rêh ối tơniăn. Khu vê plong tuk tot a rơgâ têa kơxĭ ki drêh ngiât tung pơla kong dế tôu lĕm.

Ôh tá xê to tíu ki rêh kâ ối dêi hên ngế kuăn pơlê tơnăng ká xi xŏng, pơlê tơnăng ká xi xŏng Mũi Né ối rak vế mâu tơdroăng ki lĕm tro krê dêi kuăn pơlê rêh ối a kĭng têa kơxĭ. Mâu plong tuk ki vêh a rôh kơxo má, tơdroăng ki tê mơdró ká xi xŏng hlo hơniâp ro, um méa kuăn pơlê vo plong kơtup, ƀă hlâm lơ hrĭng toăng plong tuk tơnăng ká vêh troh a kĭng hiăng pro chiâng um kơchuâ ngế pêi cheăng ki tơviah lĕm ai hên ivá.

Xua ing túa rêh ối ki lĕm mê hiăng pro chiâng ivá ki hơniâp lĕm krê dêi Mũi Né, tíu tơmối ôh tá xê to tăng hlo ki lĕm dêi têa kơxĭ mê ối hlo ki lĕm krê dêi môi pơlê tơnăng ká xi xong khôi hmâ xuân ối châ rak ing hên rơxông.