Drêng hyôh kong tô tĕng a tíu tơkăng kong, tơdroăng mơjiâng pro tơmeăm a Hngêi trung ai tíu kâ koi ối pơtê tơdjêp râ Ia R’vê, cheăm Ia R’vê tơkŭm po thâ. 45 kăn ƀô̆, mâu lêng châ Khu xiâm pơkuâ Mô đô̆i kong pơlê Dak Lak thăm klâ hên tôh, tơrŭm ƀă kŏng nhân pôu râng mâu tơdroăng ing mĕn mơjiâng, tơbêng meăn, krâ gât trêi troh mơjiâng pro kơnâng. Mâu tơdroăng pêi cheăng châ pêi tiô kâ vâ kơdroh hâi khế pro kêi đeăng tơmeăm khoăng. Thươ̆ng ŭi Nguyễn Bá Công, veăng mơjiâng Hngêi trung ai tíu kâ koi ối pơtê tung hngêi trung tơdjêp râ Ia R’vê, tối:

“Nhŏng o klâ pro péa tôh, môi tôh meăn pro kơnâng, lêk gât; tôh ki ê nếo ok tơvât xơmong prêi hmốu pro trêi mơnhông, pro trăng kơnâng ƀă mơjiâng mơnât kơnâng. Nhŏng o xing xoăng dêi pó pêi cheăng tiô péa roh: roh má 1 sap ing 6 chôu troh 10 chôu 30 pơtê kâ hmê kơhâi dế; roh 2 pơxiâm sap ing 13 chôu 30 troh 16 chôu 30’’.

Hngêi trung ai tíu kâ koi ối pơtê tơdjêp râ Ia R’vê ai tâi tâng kơlo liăn mơ’no 185 rơtal liăn, mê cho khu kơbong hriâm, kơpong tíu kâ koi ối pơtê tung hngêi trung, tíu chôu ‘măn kơxop mơ-éa, hngêi ki chiâng pêi hên tơdroăng, kơpong pro mơ-éa rêh ối cheăng kâ ƀă tơnêi têa ƀă mâu tơmeăm hngêi trăng, troăng klông kih thuât tơdâng tơ’mô; tơdrêng amê, rơnêu pro mâu kế tơmeăm ki ai nôkố dêi Hngêi trung hriâm Nguyễn Thị Định. Pôa Nguyễn Quang Khánh, pơkuâ môi tíu cheăng mơjiâng pro, tối ăm ‘nâi, mâu khu mơjiâng pro dế tơkŭm kêi đeăng vâ teăm séa ngăn ăm xúa, pơcháu tro pơkâ pêi.

“Pái kŏng ti mơjiâng a tơmeăm mê ai 5 rơxế kui, tơtro pêi pro mê mơhnhôk. Rơxế pơto mê ai lối 20 rơxế, mê cho rơxế ƀen, rơxế klê, rơxế lu; kal vâ mơjiâng cho hiăng ai. ‘Na mơngế pêi cheăng, peăng kŏng ti á dâng 30 kŏng nhân ƀă kih sư; péa kŏng ti ki ê ƀă khu mô đô̆i mê tâi tâng thế troh 80 troh 90 ngế. Tâi tâng pơrá dế tơkŭm ivá mơjiâng pro’’.

Ki pá má môi tung pái tơdroăng tơkêa bro cho Hngêi trung ai tíu kâ koi ối pơtê tơdjêp râ Ia Lốp xua tíu hơhngế tíu xiâm, tơdroăng pơto tơmeăm ƀă tơkŭm po mơjiâng pro pá. Vâ tŏng gum khu pơkuâ mơ’no liăn ƀă mâu khu ki mơjiâng pro, kong pơlê Dak Lak hiăng pơtroh lối 60 kăn ƀô̆, mâu lêng veăng mơjiâng pro, gum pro mơdêk tơdroăng mơjiâng pro tơmeăm khoăng.

Tiô tíu hnê mơhno séa ngăn, nôkố tíu mơjiâng pro tơmeăm pơtroh vâ chê 40 tơmeăm, kơmăi kơmok rơtế lối 140 kih sư, kŏng nhân pêi cheăng đi đo. Pôa Nguyễn Thế Quang, tíu hnê mơhno séa ngăn kế tơmeăm khoăng, tối ăm ‘nâi, hên khu hngêi hiăng kêi đeăng apoăng dế pêi ki hlối kêi đeăng, krâ on tơhrik, têa ƀă ‘măng.

“Ai mô đô̆i mot tŏng gum, xua mê tơmeăm hiăng mơdêk rĕng châ pêi pro. Mâu tơdroăng ki khoăn hlo mô đô̆i pêi lĕm ‘nâng xua mê vâi xuân thế mơ-eăm pêi tiô, tâng ôh kô tro hrá tơdroăng mơjiâng pro, hía tơdroăng cheăng. Mâu khu ki mơjiâng pro dế mơ-eăm pêi pro rĕng tơdroăng mơjiâng pro vâ pơcháu môi hngêi râ má môi hdrối hâi lơ 31/7, xo tuăn ihiâm mơno mơhnhôk, vâ mơhnhôk pêi pro mâu hngêi ki ê hriâm tâp, pêi tiô’’.

Tiô pơkâ pêi hneăng hơnăm 2025 – 2027, Dak Lak mơjiâng 4 toăng hngêi trung ai tíu kâ koi ối pơtê tơdjêp râ a kơpong tơkăng kong. Krê pái hngêi trung Ia R’vê, Ia lốp ƀă Buôn Đôn thế kêi đeăng mâu pơkâ vâ djâ tung pêi cheăng sap ing hơnăm hriâm 2026 – 2027.

A kong pơlê Dak Lak, mơhé chiu tơdjâk dêi kong prâi, yă tơmeăm ƀă tơdroăng ôh tá tŭm mơngế pêi cheăng, mâu khu mơjiâng pro xuân ối rak hên tơdroăng ki mơjiâng pro, mơhnhôk tâi tâng mâu ngế pêi cheăng, kơmăi kơmok ƀă tơrŭm khu mô đô̆i vâ tơniăn tơdroăng mơjiâng pro. Pôa Võ Văn Lợi, Phŏ Kăn pơkuâ Khu pơkuâ tơdroăng tơkêa bro mơ’no liăn cheăng mơjiâng tơmeăm kuăn pơlê ối ƀă kơmăi kơmok kong pơlê Dak Lak, tối ăm ‘nâi, troh nôkố, mâu tơmeăm hiăng châ lối 80% kơxô̆ tơdroăng cheăng; hên tơmeăm mot hneăng vâ kêi đeăng, krâ kơmăi kơmok.

“Khu ngin hiăng pêi pro pơkâ pêi 70 hâi măng, pơtroh mâu kăn ƀô̆, kih sư cheăng chu rơtế pêi cheăng, rơtế kâ, rơtế ối vâ tah lôi pá puât, tơvâ tơvân ƀă mơhnhôk mâu tíu cheăng mơjiâng pro tơniăn tơdroăng pêi pro tiô hnê mơhno dêi Khu xiâm kal kí, xuân môi tiah Tỉnh ủi, Hô̆i đong kuăn pơlê, Vi ƀan kong pơlê. Pói vâ kong prâi tơ’lêi hlâu, kong mêi khía mơhot kơdroh tơdjâk troh tâi tâng mâu hngêi trung kô kêi đeăng tro tơdroăng pơkâ mơ’no, koh tơdah hok tro pơxiâm mot hơnăm hriâm nếo 2026 – 2027’’.

Ƀă tơdroăng ki veăng kơtăng dêi khu cheăng kal kí, tơdroăng ki mơ-eăm dêi mâu khu mơjiâng pro rơtế ƀă tơdroăng tŏng gum hên dêi khu mô đô̆i, mâu hngêi trung tíu tơkăng kong Dak Lak dế rêm hâi kêi đeăng djâ tơdroăng pói tơngah ‘na môi hngêi trung hriâm kân lĕm rơdâ, tơ’lêi hlâu ăm hok tro kơpong pá puât. Rôh tơ’noăng ƀă hâi khế xuân dế pơtối, vâ tơniăn mâu tơmeăm hngêi trung hriâm rĕng kêi đeăng, po rôh tơ’lêi hlâu hriâm tâp lĕm tro tâ ăm kuăn ‘nĕng hdrông kuăn ngo a tíu tơkăng kong dêi Tơnêi têa.