Sap kơxo má, hlo a ilâng kiâ mơngế hlâ ai hnoăng Đức Cơ hiăng thâ pêi cheăng. Mâu tôh pêi cheăng  dêi mâu lêng, khu ngăn pơkeăng ƀă mâu kăn kong pơlê tơrŭm ƀă ing tơdroăng chiâ xo, xo túa, chêh ‘măn, chêh tâ tung măng internet mâu tơdroăng troh tơvêh lĕm tơnâp. Rêm tơdroăng pêi pro xuân châ pêi pơlâng, pêi lế lĕm vâ tơniăn túa kơxêng ăm mơnhên ngăn ADN.  Ƀă lối 1.500 tơnâp hâi châ mơnhên ngăn inâi, ilâng kiâ tâp mơngế hlâ ai hnoăng a Đức Cơ cho tíu ai hên tơdroăng pêi kân má môi dêi kong pơlê Gia Lai. Ƀok thái pơkeăng Nguyễn Thị Thu Hà, Hngêi pơkeăng cheăm Đức Cơ tối, ƀă hên kăn ƀô̆ ngăn pơkeăng, kố cho rôh apoăng pêi tơdroăng cheăng ki kal mê.

“Rôh apoăng lăm xo túa apoăng rơxá la klâi mê tơdroăng ki tung châ rơxá mê hiăng pá ai xếo ƀă hnối hmâ. Akố pêi cheăng ai drêng kong tô ó drêng kong mêi, mâu nhŏng o ngin mơ-eăm tơkâ luâ xơpá. Khu pơkuâ ngăn lêng cheăm xuân pro hlâu ăm ngin ai ƀaih lêm vâ ngoh o ngin rơtế pêi”.

Ôh tá xê to mâu ngế cheăng ngăn pơkeăng, hên mâu lêng kuăn pơlê xuân cho rôh apoăng veăng pêi tơdroăng cheăng kố. Sap ilâng kiâ mơngế hlâ ai hnoăng Đức Cơ a peăng mâ hâi lu troh mâu ilâng kiâ peăng mâ hâi Lo kong pơlê Gia Lai, mâu lêng hơnăm ối nếo xuân tơdjuôm môi tơdroăng mơ-eăm: pêi tâi ivá vâ veăng djâ mâu ngế ai hnoăng tơnêi têa vêh ƀă inâi hơnăm ƀă rơpŏng hngêi klêi kơ’nâi châ mơnhên. Ngoh Đặng Hoàng Bửu, tiêuh đô̆i trương Yân kuân dêi cheăm Bình Hiệp rơrêk tung hiâm mơno tối:

“Tơdroăng cheăng kố á hâi pêi la lâi, mơhé kong tô la nhŏng o ngin  xuân mơ-eăm vâ mâu vâi meh miê chiâng vêh ƀă rơpŏng hngêi. Drêng xo mâu meh ing tơnêi mâu kơxêng hiăng ôh pá lĕm môi tiah hdrối, rêm ngế rơrêk lo têa mâ. Mơhé ti mê, rêm ngế mơ-eăm tâ nếo vâ tăng ăm hlo rế hên tơmeăm vâ pơxúa tung tơdroăng mơnhên ADN".

Ƀă ngoh Ngô Đại Phát, lêng kuăn pơlê cheăm Bình Hiệp, tơdroăng pêi pro mê ối cho rôh vâ rơxông kot mâ tung rơxông hơniâp mơhno tuăn khíu ƀă tơdroăng pêi pro mơhno nhên. Mâu hâi pêi cheăng tung kong tô téa plâ hâi, tâi tâng khu đi đo mơhnhôk dêi rơpó rak vế ivá mo lĕm, tơniăn ‘na ivá vâ pê klêi tơdroăng cheăng.

“Ngin o cho rơxông ối nếo, châ kot mâ tung tơdroăng hơniâp, ăm hlo hâk vâ ƀă tơngăm drêng pêi hnoăng cheăng vâ gum mâu mêh tăng mâu nhŏng o tơniăn má môi. Ngin o đi đo hbrâ rơnáu mơ-eăm tâi ivá vâ pê klêi  má môi”.

Klêi hriâm to lâi khế, hên ngế ki rơmet mơgrúa ki hiăng hmâ ƀă tơdroăng cheăng khăm, pơlât rêm hâi nôkố chiâng mơngế mâu khu xo ngăn túa ADN a ilâng kiâ mơngế hlâ ai hnoăng. Ngoh Nguyễn Trái Đắng, hngêi pơkeăng bêng Quy Nhơn, veăng tung tôh xo túa a ilâng kiâ Mỹ Thắng, cheăm Phù Mỹ Đông, ăm ‘nâi, kơhnâ chât hơnăm, ki hên kơxêng kiâ mê hiăng tơprê, ai ngế ki ‘nâ hiăng chiâng tơnêi. Xua mê, tơdroăng rah xo túa thế pêi kơtăng tro tiô tơdroăng mơnhông ki rơkê ngăn ADN  chiâng hnoăng. 

“Tâng ai xâk mê kô nhên 100%, tâng ôh tá ai mê kô ai mâu kơxêng pơtih kơxêng kơveăng, kơxêng plâu, hơnĕng ƀă xiâm hơnĕng tŭm tâi. Tâng mâu túa kơxêng ki mê ôh tá ai mê kô xo ngăn túa kơxêng ki ê, xo túa hiăng klêi ƀă ai tiô tơdroăng pơkâ mê kô ro vâ mơnê mâu ngoh ki hmâ ai hnoăng tơnêi têa vâ tơnêi têa pin ai hâi hơniâp lĕm môi tiah hâi kố”.

Rôh lăm pêi cheăng 500 hâi măng xo túa ADN mơnhên inâi a kơxêng kiâ mơngế hlâ ai hnoăng châ tơbleăng a mâu ilâng ‘mé mơngế hlâ ai hnoăng tung kong plê Gia Lai. Kong tô mâu rôh kong mêi ton, hrĭng ngế kăn ƀô̆, mâu lêng, mâu cheăng ‘na pơkeăng, mâu lêng, mâu ngế tung cheăm, kong pơlê xuân mơ-eăm po rôu tơrêm tơnâp. Đăi tă Phạm Văn Đạt, Phŏ Chính ủi Khu ngăn lêng kong pơlê Gia Lai ăm ‘nâi, pơkâ pêi ôh tí xê pêi klêi tơdroăng pơcháu mê ối thế tơniăn tro nhên khât, pơkâ châ tăng nếo inâi hơnăm ăm mâu ngế ki hlâ ai hnoăng tơnêi têa.

“Mơhé cho tơdroăng cheăng hâi chói hlo, tơdroăng pêi ki nếo, la mơ-eăm pêi cheăng khât, xơpá há la mâu kăn ƀô̆, mâu lêng, mâu ngế pêi hnoăng cheăng dêi mâu ngế chiâ xo kơxêng vâ mơnhên ngăn chiâ a mâu ilâng kiâ pơtối rak hnoăng cheăng tơná ƀă tuăn mơ-eăm pêi tâi ivá tơná ƀă tro tiô pơcháu Tíu pêi cheăng xuân đi đo lăm pôu, hơlê, mâu lêng ki pêi hnoăng cheăng chiâ a mâu ilâng kiâ vâ mơhnhôk vâi nhŏng o tung pơla pêi cheăng”.

“Hnoăng pêi cheăng 500 hâi măng” mơhno ki mơ-eăm dêi Đảng Tơnêi têa, Mâu lêng ƀă tá khu cheăng kal kí tung pêi hnoăng cheăng ki tĭng ƀă mâu ngế hiăng pleăng hnoăng tơná ối nếo ƀă rơxông ăm Tơnêi  têa. Rêm túa ADN châ xo hâi kố cho môi tơdroăng tơngah vâ môi rơpŏng hngêi piu lôi tơdroăng khíu hơ’nêng tơkôm ton chat hơnăm; rêm inâi châ riân ngăn nhên tro cho tơ’nôm môi ngế kuăn dêi Tơnêi têa châ djâ vêh ƀă on veăng rơpŏng hngêi, pơlê xiâm tơná.

Ƀă Gia Lai, kơpong tơnêi hdrối nah cho tíu tơplâ ó, tíu ối rơpâu to tơnâp mâu ngế hlâ ai hnoăng hâi teăm mơnhên inâi hơnăm, rêm râ, mâu kơvâ cheăng, mâu lêng tơplâ ƀă mâu kăn cheăm dế mơ-eăm tơrêm hâi tơ rêm chôu vâ pê klêi tơdroăng cheăng ki kal kố. Mê ôh ti xê to pơkâ dêi “rôh lăm pêi cheăng 500 hâi măng’’, mê ối cho pơtối tơdroăng ton nah lĕm tro “khoh niân môi tiah hâi kố kơnôm ai hnoăng pâ pôa, ngoh nâ nah”, cho rơkong tobâ hnoăng ƀă pêi pro dêi rơxông nôkố ƀă mâu ngế hiăng hlâ xua tơniăn krê, kring rak dêi tơnêi têa.