Dak Lak nôkố ai lối 41.000 ha sầu riêng, tung mê dâng 30.000 ha dế hiăng châ krí, plâi krí rơnó 2026 tiô riân vâ chê 500.000 tâ̆n. Laga, tung lâp kong pơlê Dak Lak nếo ai 280 mah kơxô̆ kơpong pêt ƀă dâng 7.500 ha ƀă 42 mah kơxô̆ tíu tâ tung kơthung châ peăng Sinuâ kĭ ăm phêp. Nôkố ai 165 mah kơxô̆ kơpong pêt ƀă 66 mah kơxô̆ tíu tâ tung kơthung hiăng chêh pro klêi hồ sơ la xuân dế tơkôm peăng Sinuâ séa ngăn.

A rôh pêi cheăng ƀă kăn pơkuâ Khu xiâm ngăn chiâk deăng ƀă Hyôh kong prâi, pôa Nguyễn Thiên Văn, Phŏ kăn hnê ngăn Vi ƀan kong pơlê Dak Lak pơkâ thế.

"Pâ thế Khu xiâm ngăn Chiâk deăng ƀă Hyôh kong prâi rơtế ƀă mâu kơ koan ki ai tơdjâk, malối cho Khu xiâm tơpui kâ, tơrŭm pêi cheăng ƀă peăng Sinuâ vâ rĕng kĭ mâu hồ sơ mah kơxô̆ kơpong pêt ki hiăng chêh pro klêi, ing mê po rơdâ ƀăng tơnêi ki ai tŭm tơdroăng ki vâ tê ngi kong têa. Tơdrêng amê hlối pro tơ’lêi hlâu vâ ai tơ’nôm khu mơdró kâ veăng ‘no liăn pro tíu tâ plâi tung kơtung a kong pơlê”.

Rơtế ƀă Dak Lak, mâu kong pơlê Gia Lai, Lâm Đồng, Quảng Ngãi xuân tối hên tơdroăng xơpá drêng tơbleăng pêi pro Pơkâ 38 ‘na mah kơxô̆ kơpong pêt ƀă tíu tâ tung kơthung. Mâu kong pơlê pâ thế rĕng ai troăng hơlâ hnê mơhno môi tuăn ‘na troăng pơkâ ăm hnoăng vâ tê ngi kong têa, tơdrêng amê, hlối chêh pro klêi kơmăi chêh ‘măn ‘noăng chư chêh klêi kơ’nâi châ xêt khât. Pôa Hà Ngọc Chiến, Ngế xiâm ngăn Khu xiâm pêt mơjiâng mâu hdrê loăng pêt ƀă Pơkeăng rak ngăn xôh kơdê oâ hdrong kong pơlê Lâm Đồng tối:

“Klêi kơ’nâi Pơkâ 38 châ xêt khât, pâ thế rĕng ai troăng hơlâ pêi pro môi tuăn ‘na kơmăi chêh ‘măn ‘noăng chư chêh vâ mâu kong pơlê ai tíu vâ tối tơbleăng. Tâng tá hâi ai troăng hnê mơhno nhên mê gá xơpá vâ pêi pro”.

Pôa Nguyễn Hoàng Hiệp, Phŏ ngế xiâm ngăn chiâk deăng ƀă Hyôh kong prâi ăm ‘nâi, Khu xiâm dế hriăn ngăn ‘mâi pơhlêh Pơkâ 38 tiô hnê mơhno dêi Ngế pro xiâm hnê ngăn Chin phuh tiô troăng ki rơkê plĕng tâ; tơdrêng amê, hlối pơhlêh tâi tâng túa pơkâ hbru ăm mah kơxô̆ kơpong pêt ƀă tíu tâ tung kơthung, pơhlêh rơdêi sap ing hdrối vâ séa ngăn chiâng klêi kơ’nâi hiăng séa ngăn vâ kơdroh chêh pro hlá mơ-éa ăm kuăn pơlê ƀă khu mơdró kâ.

Ƀă rơnó sầu riêng hơnăm kố, mâu khu xiâm, kơvâ cheăng Việt Nam dế pêi cheăng ƀă peăng Sinuâ vâ mơdêk tơdroăng ki hbru ăm mah kơxô̆ kơpong pêt, tíu tâ tung kơthung; tơdrêng amê, hlối mơhnhôk mơnhông tê plâi sầu riêng ngi kong têa ki hngíu, po rơdâ kơchơ tê ƀă tŏng gum Dak Lak tơbleăng tơdroăng pêi thâ 30 hâi pêi pro tíu chêh ‘măn ‘noăng chơ chêh kơpong pêt.

Laga, troăng hơlâ séa ngăn vâ kơvâ plâi sầu riêng mơnhông krá tơniăn xuân cho mơjiâng pro tuăn loi dêi kơchơ tê mơdró ƀă tê ai hnoăng pôu râng. Rêm to tơmeăm athế tí tăng xiâm kối tíu pêt, mơnhên nhên hnoăng cheăng dêi rêm khu pơkuâ tung tơdroăng tê plâi ngi kong têa ê. Drêng dâi lĕm châ rak vế ƀă pro tơdrăng, sầu riêng Việt Nam nếo rế hía rế mơjiâng châ inâi tơnêi têa, po rơdâ tơdroăng ki châ kơjo gum xiâm mâu kế tơmeăm drêng trâm tơdroăng ôh tá mơhúa tung mâu kơchơ tê mơdró tê ngi kong têa ê ƀă kơdroh tơdroăng tơkôm tê to tung môi to kong têa. Pôa Nguyễn Hoàng Hiệp tối nhên:

“Rơhêng vâ mơjiâng châ tơdroăng loi dêi kơchơ tê mơdró tơmeăm pơrá athế tí tăng xiâm kối, ‘nâi kế tơmeăm xua kơbố pêt, túa pêt môi tiah lâi ƀă drêng pro xôi mê athế mơnhên châ hnoăng cheăng ngế pôu râng. Drêng kơmăi tí tăng xiâm kối châ xúa tŭm, ngin kô rơtế ƀă mâu kong pơlê pêi pro tơdâng tơ’mô tơdroăng kố”.