Tơdroăng ôm kơdrâm phiu ro a mâu tíu troh peăng Hdroh kong pơlê Khánh Hòa, kơpong tơnêi Ninh Thuận hdrối nah. Mâu ‘núa têa kơxĭ Ninh Chữ, Vĩnh Hy, kơpong pơtê kĭng têa kơxĭ, tíu troh lăm ngăn khôi túa lĕm tro, pơlê tiô khôi vâi krâ nah Bàu Trúc, Mỹ Nghiệp kơdrâm tơmối ôm hyô. Tâng Nha Trang ô eăng ƀă ôm hyô têa kơxĭ, pơtê, mê Phan Rang – Ninh Thuận ton ai tơ’lêi hlâu ‘na kong kế ối tiah apoăng nah, tơmeăm kơnía khôi túa lĕm tro, tơmeăm pêi lo ing chiâk deăng ki má môi. Ngoh Huỳnh Trọng Lượng, tơmối prôk ing Nha Trang troh Phan Rang tối:

“Khôi túa lĕm tro, tơmeăm khoăng rôh nah a Nha Trang hiăng mơnhông ‘na ôm hyô hên tâ. Tơdrêng amê, Phan Rang xuân ối hên tơdroăng ối ai tiah rôh nah, rak mâu ki kơnâ khôi túa lĕm tro vâi krâ nah, ki rơhêng vâ tối cho khôi túa lĕm tro hdrông kuăn ngo Chăm. Mâu tơmeăm ôm hyô akố xuân hên, ing hmân ếo, pơtâk, tơmeăm ki tơbâ, kên pâng rơnŏng troh mâu tơmeăm ki pro ƀă kŏng, gum tơmối ai tơ’nôm hên tơdroăng ki rah xo vâ châ tâ châ hlo ƀă rôe tơmeăm, cho hên hĭn’’.

Klêi môi hơnăm tơmot chiâng môi, tíu mơnhông mơdêk ôm hyô kong pơlê Khánh Hòa châ po rơdâ, mâu tíu troh peăng Hdroh kong pơlê chôa ‘nâng châ tơdjêp ƀă mâu tơmeăm tơdjuôm. Tung 6 khế apoăng hơnăm 2026, kong pơlê Khánh Hòa tơdah dâng 12 rơtuh rôh tơmối, tâk lối 40% tâng pơchông ƀă rôh kố hơnăm nah; pêi lo liăn dâng 42.500 rơtal liăn.

Kơpong peăng Hdroh kong pơlê ai tơ’nôm hên ki pơxúa drêng achê Tơraih tơƀai lâp plâi tơnêi Cam Ranh, troăng klông tơdjêp tơ’lêi, rơtế tơdjuôm inâi ôm hyô Khánh Hòa. Pôa Alain Nguyễn, Kăn pơkuâ Kơpong pơtê xah hêi Hoàn Mỹ, bêng Ninh Chữ, tối ăm ‘nâi, khu tê mơdró châ pơxúa drêng tơmot chiâng môi 2 kong pơlê:

“Klêi môi hơnăm ‘mot tơkŭm, ngin hiăng ai tơ’nôm hên tơdroăng ki pêi pro châ tơƀrê. Mâu ngế cheăng, mâu kơxô̆ liăn pêi lo dế hlo pơhlêh chiâng ó rơdêi troh a peăng Hdroh Khánh Hòa. Malối, kơxô̆ ngế tơmối ôm hyô sap ing Nha Trang lăm troh a kơpong peăng Hdroh Khánh Hòa ối pơtê hiăng tâk hên, pro tơ’nôm ivá nếo ăm mơnhông ôm hyô kong pơlê.

Sap ing ‘mot tơkŭm ƀă Ninh Thuận, kong pơlê Khánh Hòa mơdêk rơdêi tơdroăng mơđah tơbleăng, pơkâ mơdêk ôm hyô, tung mê, ki xiâm cho Festival Têa kơxĭ Khánh Hòa 2026 dó inâi “Mơngiơk Têa kơxĭ – Mơ-eăm mơnhông troh lâp plâi tơnêi”, po sap ing hâi lơ 17/7-19/7. Pakĭng Nha Trang, hên tơdroăng cheăng châ tơkŭm po a peăng Hdroh kong pơlê môi tiah mơđah tơbleăng ƀă pêi pro kế tơmeăm kơnía git ‘na túa lĕm tro tơmeăm pro tơnêi hneăn Bàu Trúc, pơchoh hmân ếo Mỹ Nghiệp a cheăm Ninh Phước; mơđah tơbleăng tŏn rêi mâu proâ hdrông kuăn ngo, kơhnhon xoăng Chăm a Thot Po Klong Garai; tơdroăng ngê̆ thuât troăng kơphô̆, ngê̆ thuât rơxế krâ ‘măn reăng a bêng Đông Hải.

Malối cho a cheăm kong ngo Lâm Sơn tơkŭm po Mơdĭng mơđah tơbleăng plâi kâ ƀă pĕng mlŏi reăng. Tơdroăng ki po rơdâ tơnêi tơníu Festival Têa kơxĭ troh a hên cheăm bêng vâ mơdêk ki kơnía túa lĕm tro kong pơlê, pro chiâng lĕm tơ’nôm tơmeăm ôm hyô ƀă túa rêh kâ ối ăm kuăn pơlê.