Tiô tơdroăng tơrŭm cheăng, tung mơđah “Lơgât Khánh Hòa athế mơnúa” kô tơbleăng tối inâi mâu tíu troh ôm hyô tăng ngăn, kâ mâu kế kâ ƀă mâu quăn tê mâu kế kâ xiâm xua kơvâ ngăn ôm hyô kong pơlê rah xo, mơnhên ƀă tơbleăng tiô rêm rôh. Ing ứng dụng, tơmối chiâng vâ tăng ‘nâi tơdroăng, tíu troh, krếo rơxế vâ kơto, kok roê kế kâ lơ kok ahdrối mâu rôh kâ kế tơdrêng hlối tung măng internet. Tơdroăng kố kô tơbleăng pêi mâu tơdroăng kơjo gum vâ mơhnhôk tơmối tăng ‘nâi mâu tíu troh ki hơniâp ro a Khánh Hòa.

Péa pâ kô tơrŭm chêh pro inâi “Mâu kế kâ athế châ mơnúa ngăn” ƀă Kuăn tíu ối inâi Khánh Hòa”, mơđah tơbleăng mâu kế tơmeăm kế kâ ki kơhiâm a kong pơlê, hlối gum mâu tíu tê mơdró châ xúa tung măng internet, po rơdâ tơdroăng ki vâ tơdjêp ƀă tơmối. Tơpui a leh kĭ, jâ Thái Thị Lệ Hằng, Kăn pơkuâ Khu ngăn Túa lĕm tro, Tơ’noăng ivá ƀă Ôm hyô kong pơlê Khánh Hòa ăm ‘nâi, cheăng tơrŭm cho hvêa chêng prôk ki nhên vâ pơhlêh tơdroăng pơkâ pêi ‘na pơhlêh xúa kong ngê̆ kơxô̆ dêi kơvâ ôm hyô, mơdêk ki pơxúa kong ngê̆ vâ tơdjêp ƀă mâu tơdroăng ki ai pơxúa, mơđah tơbleăng tơƀrê mâu tíu troh, túa lĕm tro ƀă kế kâ dêi kong pơlê.

Ing mê, mơdêk tơdroăng ki ăm mâu tơmối châ lăm ngăn, kâ mơnúa, thăm mơnhông ivá tơxup tơbriât dêi tíu troh Khánh Hòa ƀă tơmiât troh pơkâ pêi ăm kong pơlê chiâng tíu rah xo vâ troh apoăng dêi tơmối tung tơnêi têa ƀă kong têa ê:

“Khu ngăn Túa lĕm tro kĭ tơkêa ƀă khu tơrŭm cheăng cho Grab mơhno mâ ứng dụng tơbleăng mâu tíu troh, hngêi ôu kâ, tíu kâ ƀă inâi khĕn cho “Quăn trứ danh” vâ tơbleăng ăm tơmối. Drêng tơmối troh a Khánh Hòa po ứng dụng Grab, kô hlo tơbleăng kế kâ Khánh Hòa ối tung mê. Mê cho kế tơmeăm cheăng kâ kơxô̆ ƀă ôm hyô rơkê”.

Tơdroăng ki tơbleăng nền tảng kơxô̆ po tung pơla ôm hyô Khánh Hòa pơtối thăm mơnhông rơdêi, ƀă dâng 12 rơtuh ngế tơmối ôm hyô, tung mê ai lối 4,6 rơtuh ngế tơmối kong têa ê hiăng troh Khánh Hòa tung hơnăm kố; kơxô̆ liăn châ xo ing ôm hyô châ lối 42.000 rơtal. Sap ing hâi lơ 17 troh lơ 19/7 la ngiâ, Festival Têa kơxĭ Khánh Hòa 2026 kô tơkŭm po ƀă lối 40 tơdroăng mơhno túa lĕm tro, ngê̆ thuât, tơ’noăng ivá ƀă ôm hyô, tiô tối kô tơ’mot sap ing 600.000 troh 800.000 ngế kuăn pơlê ƀă tơmối, pro tơ’nôm ivá ăm rơnó ôm hyô tung pơla pơtê hriâm rế hên.