Tơdroăng tơkêa bro BLOOM châ tŏng gum ing Chin phuh Canada ing Khu xiâm pơkuâ ‘na mâu tơdroăng tung lâp plâi tơnêi Canada, tơbleăng a 2 kong pơlê Dak Lak ƀă Tuyên Quang sap khế 6/2026 troh khế 4/2030. Tơdroăng tơkêa bro ôh tá xúa liăn ki tơlo, khu ‘no liăn mơjiâng pro rak ngăn tơdrêng, séa ngăn, tăng ngăn tơdroăng xúa liăn ki mê. Tơdroăng tơkêa bro kô ‘mâi mơnhông ƀă mơdêk ó má môi ‘na nhâ loăng kong kế ai pơxúa ‘na hên túa sinh hok, pakĭng mê, mơdêk ki hmâ ƀă hyôh kong prâi hơ’lêh ăm vâi kơdrâi kuăn ngo ƀă kuăn pơlê.

A Dak Lak, tíu tơbleăng tơkŭm a Kơdrum kong Chư Yang Sin ƀă mâu cheăm kơpong kong poh xá ƀă kong kân mê cho Hòa Sơn, Cư Pui ƀă Yang Mao. Tâi tâng kơxô̆ liăn tŏng gum ôh tá tơvêh lối 21 rơtal liăn (tơ‘mô 1,1 rơtuh dollars Canada).

Tơdroăng tơkêa bro kô ‘mâi hơ’lêh cheăng kâ ăm dâng 1.500 ngế ki xúa tơdrêng ƀă 6.000 ngế xúa ing hơngế. Ing mâu tơdroăng mơ-eăm kơjo kum hnê kih thuât, tơdroăng tơkêa bro kô mơdêk xúa mâu troăng hơlâ ngăn a kong kế rơtế ƀă tơrŭm ôh tá pơrah pơla kơdrâi ƀă kơnốu, mơdêk ivá rak ngăn, xúa krá tơmeăm khoăng ki ai xêh ing kong kế hlối mơnhông hnoăng cheăng pêi, rơkong tơpui dêi vâi kơdrâi kuăn ngo tung tơdroăng pơkuâ ngăn, rak ngăn kong.

Tơbleăng a leh pơxiâm pro, pôa Nguyễn Thiên Văn, Phŏ Kăn hnê ngăn Vi ƀan kuăn pơlê kong pơlê Dak Lak tối tiah kố, Tơdroăng tơkêa bro BLOOM ai pơxúa khât tung pơla kong pơlê dế mơ-eăm rak vế hên túa sinh hok tơkŭm ƀă mơnhông cheăng kâ krá ton ăm kuăn pơlê hdrông kuăn ngo. Pôa pâ thế mâu tíu pơkuâ cheăng, kơvâ cheăng, mâu kăn cheăm bêng tung kong pơlê ƀă mâu tíu pêi cheăng ki tơdjâk troh tơrŭm krá ƀă khu ‘no liăn kơjo kum vâ tơbleăng pêi tơdroăng tơkêa bro tro tiô pơkâ, tiô tơdroăng pơcháu pêi, hlối tơniăn tơƀrê.

“Vi ƀan kuăn pơlê kong pơlê Dak Lak tơhrâ kô tơmâng hnê mơhno nhên khât ƀă pro hlâu má môi vâ rêm pâ tơbleăng pêi tơ’lêi, vâ tơdroăng tơkêa bro potối tơmâng kuăn pơlê; kơhnâ hnê tối kuăn pơlê hlê, môi tuăn hlối hbrâ rơnáu veăng tăng troăng pêi kơnôm a kong kế, xuân môi tiah mơnhông mâu túa cheăng kâ krá ton; pêi mâu túa cheăng ki nếo; mơdêk hnoăng pêi pro dêi vâi kơdrâi tung mâu tơdroăng pêi chiâk deăng, pơtối rak vế ki lĕm sinh hok’’.