Khu ki pêi dêi hnoăng cheăng hiăng lăm xo túa ki vâ mơnhên, mâu kế tơmeăm, cheăng rak vế túa ki vâ séa mơnhên túa ƀă rak vế hồ sơ. Tơdrêng amê, hlối tơmâng Hnê mơhno 515 kong pơlê Gia Lai rơtế ƀă khu lêng ki pêi dêi hnoăng cheăng tối tơbleăng klêi kơ’nâi tơbleăng pêi tơdroăng cheăng, mâu tơdroăng ki tơ’lêi hlâu ƀă xơpá tung pơla pêi pro.

Ilâng kiâ mố đô̆i a Đức Cơ nôkố cho tíu ối pơtê dêi lối rơpâu ngế mố đô̆i ki hiăng hlâ, tung mê ối ai hên tơnâp kiâ mố đô̆i tá hâi ‘nâi inâi lơ ‘nâi la bu iâ tê tá hâi tŭm. Tơdroăng ki xo túa vâ séa mơnhên (cho kơxêng) vâ séa ngăn ADN châ ngăn cho troăng hơlâ ki kal vâ gum ăm cheăng mơnhên inâi mâu mố đô̆i. Klêi kơ’nâi séa ngăn, Thiê̆u tươ̆ng Lương Đình Chung tơmâng xo hnoăng cheăng pôu râng dêi mâu ki veăng pêi hnoăng cheăng, hbrâ rơnáu ‘mâi mơnhông ki xơpá ‘na hyôh kong prâi ôh tá tơniăn, tơnêi tơníu xơpá vâ pêi pro châ tơdroăng pơkâ thế ‘na tơdroăng cheăng.

Pôa xuân pơkâ thế khu râ Đảng, kăn pơkuâ cheăm bêng, mâu tíu pêi cheăng lêng ƀă khu ki ai tơdjâk troh thăm mơnhông tơrŭm cheăng séa ngăn, pơchông tơdroăng sap ing hên tơdroăng, hlối mơdêk hnê tối, tơdah xo tơdroăng sap ing mâu mố đô̆i hneăng hdrối ƀă kuăn pơlê vâ xúa tung tơdroăng cheăng mơnhên inâi kơxêng kiâ mố đô̆i.