6 khế apoăng hơnăm, cheăng kâ – rêh ối pơlê pơla dêi Gia Lai pơtối rak tơdroăng ki tơtêk hôm. Xo hnoăng liăn ngân tơnêi têa châ lối 16.500 rơtal liăn, tâk lối 20% tâng pơchông ƀă rôh kố hơnăm hdrối. Lâp kong pơlê mơhnhôk 165 tơdroăng tơkêa bro mơ’no liăn cheăng nếo ƀă tâi tâng kơxô̆ liăn kĭ vâ chê 165.000 rơtal liăn. Mâu kơvâ khôi túa lĕm tro, hnê hriâm, khăm pơlât, pơhlêh xúa kŏng ngê̆ măng internet, rơnêu nếo troăng hơlâ, gum rêh ối pơlê pơla pơtối châ tơmâng pêi pro; gâk kring tơnêi têa, kring tơniăn châ rak.

Tơkŭm po tung 2 hâi, hneăng hôp Hô̆i đong kong pơlê Gia Lai kô séa ngăn 51 tơdroăng ki xiâm, tung mê, ai hên tơdroăng pơkâ ki kal ‘na liăn ngân - kơxô̆ liăn 'mot mơ'no tung hơnăm dêi kơ koan, mơ’no liăn cheăng tơnêi têa, pơkâ pêi, pơkuâ tơnêi tơníu, pơhlêh xiâm kối xúa kong, mâu tơdroăng pơkâ xiâm Tơnêi têa ƀă ki rơhêng vâ tối cho pơhlêh Pơkâ pêi kong pơlê Gia Lai hneăng hơnăm 2021 – 2030, tơmiât pêi troh hơnăm 2050.