A mâu rôh pêi cheăng ƀă 5 to bêng, mê cho: Xuân Hương - Đà Lạt, Cam Ly - Đà Lạt, Lâm Viên - Đà Lạt, Xuân Trường - Đà Lạt, Lang Biang - Đà Lạt, kăn pơkuâ Vi ƀan hnê ngăn kong pơlê Lâm Đồng pơkâ thế cheăng pro túa pơkâ athế ai troăng ngăn ton tá ah, pơkâ hnoăng ki pơxúa ăm kuăn pơlê cho ngế ki kal, ‘mâi rơnêu mâu tơdroăng ki kal ôh tá tơtro a pơkâ pơlê kong kơdrâm Đà Lạt hdrối hơnăm 2025.

Klêi séa ngăn, 5 to bêng ối pơtăng ƀă dêi rơpó Đà Lạt hiăng pâ thế ‘mâi rơnêu hên tơdroăng ki kal, tơmiât troh po rơdâ tơnêi tơníu kơphô̆ peăng mâ hâi Lâ ƀă peăng mâ hâi Lo, hriăn ngăn tơnêi tíu tung kơdâm a kơpong tíu pêi cheăng Hòa Bình vâ pro tơ’nôm tíu ki ‘măn rơxế ƀă troăng prôk; pơkâ troăng tơmiât pro kơphô̆ kong kế nhâ loăng hlối ôm hyô rơkê plĕng, pêi chiâk xúa kơmăi kmoik chal nếo ƀă rak vế kong ƀă hên tơdroăng ki ê. Tiô tối túa pơkâ chêh pro tơdjuôm kơphô̆ 5 bêng Đà Lạt kô pơtroh ăm Khu xiâm pro tơmeăm ngăn tung khế 8 la ngiâ.