Rôh krếo phôn thâ ing cheăm hơngế hơngo hiăng po rôh prôk lăm tăng dêi Đô̆i tăng rôu kơxêng kiâ mâu ki hlâ ai hnoăng tơnêi têa K51, Khu xiâm pơkuâ ngăn lêng kong pơlê Dak Lak. Pơla rôh dế “Lăm tăng 500 hâi măng tơkŭm rôu tăng kơxêng mơngế hlâ ai hnoăng”, rêm tơdroăng tối ăm ‘nâi ing kuăn pơlê cho môi rơkong pơchân hnan thế mâu lêng rĕng lăm tăng. Tíu troh rôh kố cho môi to chêk ki hơngế tung kong kân a troăng kân pakĭng kơpong kăch măng Dinh Điền - cheăm Khuê Ngọc Điền ton, nôkố cho cheăm Krông Bông- kơpong tơnêi tơplâ ton nah ki xâu rơ-iêo.

Kơ’nâi 3km troăng drô ‘noăng klâng ƀă vâ chê 1 km prôk tâk rơnâk, mâu lêng troh a chiâk kơphế pá xôp ngo Chư Yang Sin. Chôa pơlâng po chiâ tah tơrêm hdrâ tơnêi tiô ki hdró dêi kuăn pơlê, mâu ngoh hâk tó  ro drêng tơrêm po pêk hdrâ tâk ƀạt, tơrêm hdrâ kât kơxái dêi mâu lêng ki hiăng pok tiô khế hơnăm rế vâ mơhno. Đại úy Nguyễn Duy Thuận, đội viên K51 tối:

“Ngin o chiâ chôa  pơlâng ngăn inhên, kŏng xo ƀay chiâ râng chiâ tơnêi ăm rơpâ, hên drêng ‘nâ hlo hnĕng klêi mê kơchiê̆n ếo hiăng ton hâi gá hiăng pok, tâng tro lôi hơ ui kơ mâu mêh. Ngin ngoh o tăng hlo tiah kố cho piu ro ‘nâng yoh”.

Tơdroăng tơplâ hiăng ton hơngế kơtăn kố, la mâu tơdroăng châi heăng khéa kho ƀă hnoăng pêi pro ƀă mâu ngế ki hiăng hlâ hâi la lâi kâi tâi. Ƀă Đại úy Y Nhai Drao, ngế ki hiăng vâ chê 20 hơnăm kố hmâ ƀă tơdroăng lăm tăng rôu tơkŭm kơxêng kiâ mâu ngế hlâ ai hnoăng, rêm rôh pêi a kơxêng dêi mâu ngế ki hlâ cho rêm rôh rơrêk lo têa mâ hlối plăn ôh tá chiâng vâ krếo inâi hí môi nâl.

“Cho kơxêng kiâ mơngế hlâ ai hnoăng, tôh a phiu ro, ngăn ôh tá phá klâi mơngế tung rơpŏng hngêi tơná. A cho ngế cháu pêi tơdroăng cheăng kố, môi pâ xua tơdroăng pơklât thế pêi pro ing plâi nuh hlối vâ … Á pêi a mâu kơxêng kiâ mâu mêh mê hmếo pơchiâng rơrêk tung hiâm mơno hlói phăn ôh tá chiâng tơpui klâi, ai drêng hlối krôu oh tá chiâng chuât, bú lo to têa mâ tê”.

Rôh lăm tăng chiâng tkŭm ‘mé mơgêi drêng eăng trâ mâ hâi hiăng vâ dé a tơnêi kong ké. Klêi pêi hnoăng cheăng mâu ki tăng chiâ rôu mê hiăng tơkŭm châ 2 kơxêng kiâ mơngế hlâ ai hnoăng, ƀă mâu tơmeăm ki tâp ƀă môi tiah tăng, baih, mâu kơmăi tơmeăm xúa vâ tơpui tối ƀă mâu ki ê ‘nâi hlối ai mâu tơmeăm xúa krê dêi ngế ki mê la hiăng pok tâi.

Kơtong ki lŭm châ mâu lêng pêi pơlâng ƀă hlối nhoăm pâ khât. Pôa Nguyễn Hoàng Quang, Phŏ Kăn hnê ngăn Vi ƀan Kuăn pơlê cheăm Krông Bông, tối ki mơ-eăm:

“Kô cho hâi khế pêi cheăng hên rôh 500 hâi măng lăm tăng. Krông Bông cho kơpong tơnêi tơplâ ton nah, tơdroăng tơplâ ton nah ó khât ‘nâng. Ing tơdroăng ăm ‘nâi ‘na mâu tơdroăng dêi kuăn pơlê ƀă tơdroăng veăng tơrŭm dêi đô̆i K51, ngin kô pơtối  mơdêk hnê tối, pro ti lâi vâ châ tơƀrê má môi djâ inâi, djâ mâu pôa, mâu mêh, ngoh vêh apơlê tơná, vêh ƀă vâi pú”.

Vâ pêi tơdroăng cheăng mơnhên kơnó inâi ngế ki hlâ, mâu khu râ pơkuâ cheăng hiăng tăng mâu hnĕng, kơxêng ki vâ ăm mơnhên ngăn ADN. Drêng hiăng pê klêi tơdroăng chiâ xo kơxêng mơngế hlâ rơtế ƀă mâu tơmeăm djâ vêh a ilâng kiâ ‘mé mơngế hlâ ai hnoăng a Krông Bông. Tơdroăng tơkŭm ‘mé 2 kơxêng kiâ mơngế hlâ ai hnoăng cho tơdroăng ki tơrŭm krá pơla mâu lêng ƀă mâu râ ủi, mâu kăn cheăm bêng, malối cho mâu tơdroăng ing kuăn pơlê tối ăm ‘nâi. Rêm tơdroăng ăm ‘nâi, mơhé kŭn, xuân chiâng đông ki kal kum mơnhên tíu tâp mâu lêng mố đô̆i ki hlâ, veăng djâ mâu mêh, ngoh vêh ƀă vâi pú a pơlê.

Nôkố Đội K51 pơtối po rơdâ tíu tăng a kơpong ngo Đá Đen ing mâu tơdroăng ăm ‘nâi ing kuăn pơlê tối, ƀă tơdroăng mơ-eăm lăm tăng rôu chiâ, tơkŭm tŭm kơxêng kiâ mơngế hlâ ai hnoăng ki ối tung tơnêi a tíu tơplâ nah, veăng pê klêi tơdroăng tŏng gum mâu lêng cho tơdroăng pêi pro ki lĕm. "Koh niân hâi kố kơnôm ai hnoăng vâi  pâ vâi ngoh nah”, “Mơnê kơ mâu ai hnoăng”  dêi hdroâng mơngế.

Tơdroăng lăm 500 hâi măng tăng chiâ rôu kơxêng kiâ mơ ngế hlâ ai hnoăng xuân pơtối pêi. Klêi mê ối hên rôh krếo phôn nếo tâng idrâp chuât a tơdế kong ngo kân. Ƀă apoăng kơ xái phôn ki pá táu, mâu ngế lêng K51 - kong pơlê Dak Lak, pơtối pôu dêi kơxâk kơđô, prôk lăm tăng. Xua ƀă vâi, mê ôh tá xê tơdroăng cheăng pêi, mê ối cho pơklât thế pêi pro ing plâi nuih dêi rêm ngế./.