A hâi mơ’nui măng tĭng, Kuât dêi pơlê Đak Pơkao, cheăm Tơ Tung hiăng tâ hơniâp ro nếo idrâp dri drih dêi chêng koăng. Pôa Đinh Plơnh, ngế ki hiăng hên hơnăm kơhnâ khât tung hnê tối ‘na tôu chêng koăng ƀă rơngê ting ting ăm khu rơxông nếo, ai tối tiah kố:

“Á kơdo mơ-eăm hnê tối ăm kuăn cháu ‘nâi, hlê plĕng ‘na chêng koăng ƀă rơngê ting ting, vâ mâu túa tơlá dêi hdrông Bơhnéa ôh tá tro piu hiât lôi. Xua ga idrâp chêng, idrâp koăng hiăng mot tung mơheăm chhá dêi mơngế Bơhnéa hiăng ton sap ing nah. Sap ing mâu vâi hdrêng pơxiâm koi ối tung ting tong, tung vŏng xuân hiăng hmâ châ tâng idrâp chêng koăng drêng vâi hiăng kơtê môi khế, ta troh a rêm ngế hơnăm hiăng krâ, kơtê i hiâm xuân ai idrâp chêng koăng. Á đi đo hmâ pơchân tối mâu vâi muăn tiah kố, tôu chêng tôu koăng ôh tá xê bu to vâ mơđah ăm i ro, mê ối athế tôu chêng koăng ƀă hiâm mơno ki tơdrăng khât, ‘nâi mơ’nhôp dêi châ ƀă ‘nâi tơrŭm ƀă khu pú. Khu chêng mê bu chiâng ro drêng tâi tâng rêm ngế rơtế môi i hiâm môi mơno”.

Xuân hiăng hmâ ƀă tơdroăng tôu chêng tôu koăng, mê túa kơhnhon xuăng ing hơnăm ối tơxĭn nah, mê ngê̆ nhân Đinh Hdot rơhêng vâ ‘nâi ‘na kih thuât ƀă mơhúa dêi tơrêm ƀai chêng drêng hnê ăm khu rơxông nếo. Ngoh ai tối:

“Rêm ƀai chêng dêi mơngế Bơhnéa a Tơ Tung pơrá hiăng tơrŭm ƀă môi túa leh mơdĭng ki nhên, ki tơtro, ai drêng ‘nâ hơniâp ro tĭng kâ báu nếo, ai drêng ‘nâ hmái hmâ tung pơla rơkâu xối xeăng po tĭng kâ kơpôu. Drêng hnê tối ăm mâu vâi cháu, á hiăng athế hnê tơrêm túa ki râng loăng tôu, túa ki mơdât idrâp chêng pro ti lâi ăm ga tro păng ‘nâng. Pin pro mơngế hnê, cho thái mê tŭm tơdroăng cheăng athế pêi pro hnê mơhno tơdrăng, krâu rơhí rơhó khât, athế hnê tá hiâm tuăn ‘nâi mơnê nhoăm kơ mâu chêng koăng, mâu prôa ki vâi krâ hiăng hnê ‘măn ăm, ai ti mê ‘nôi, idrâp chêng koăng dêi Đak Pơkao nếo châ rak vế ki tơtro khât, ki krip krih dêi kong kế, ngo ngối”.

Pakĭng idrâp chêng koăng pu hung pu hung, mâu ƀai rơngê ting ting Bơhnéa xuân hơniâp ro khât, mâu tơdroăng rơngê rơngối ki prông xuân cho têa tôu ki vâ hnê tối, păn roăng, rak ngăn ‘nâi to lâi rơxông, mâu vâi krâ, vâi ngê̆ nhân akố kơhnâ khât tung tơdroăng hnê ăm mâu vâi rơxông nếo. Pôa Đinh Bri, pơlê Đăk Pơkao, cheăm Tơ Tung ai tối:

“Ki pá puât tung tơdroăng rơngê ting ting mê pin athế ai ihiâm toi xŏn, mơngối, ing mê, nếo ai tơdroăng ki tơro vâ tơ’mot tung rêm nâl rơngê ting ting. Nốkố, vâi rơxông nếo hmâ tơmâng to tơdrá chal nếo tung phôn. Mâu vâi krâ trối ngin nôkố athế tơ-uân a tơrêm kong măng, rêm hâi vâ rơngê ting ting ăm mâu kuăn ‘nĕng cháu chái i tơmâng, bu púi rơhêng vâ mâu tơdrá ki mê mot tung i hiâm mơno mâu vâi cháu, tung mê, ai tá rơkong tơpui, nâl hơdruê, mâu tơdrá ki pâ pôa, jâ nôa pin hiăng chôu ‘măn ăm pin sap ing ton nah”.

Xuân môi tuăn ƀă hiâm mơno ki tơmiât tiah mê, ngê̆ nhân Đinh Plih, ối a pơlê Leng, cheăm Tơ Tung ai tối ăm kơ ngin tiah kố:

“Ngin kơdo mơ-eăm hnê lâm tôu chêng tôu koăng ƀă rơngê ting ting a pơlê Đak Pơkao, hnê mâu vâi muăn, vâi cháu, tâi tâng tơdroăng mê cho ngin pôu râng hnoăng cheăng ƀă mơhúa jâ nôa ƀă tâi tâng khu pơlê pơla ngin. Á phiu ro khât xua Khu kăn pơkuâ hnê ngăn cheăm Tơ Tung đi đo tŏng gum rak ngăn, tơveăng kơ ngin. Ngin kơdo mơ-eăm pêi tơdrêng ƀă tơdroăng ki hnê tối a mâu roh pơtê hriâm, tơdroăng ki xah ôm hêi a kuât. Hlo mâu vâi muăn, vâi cháu kơhnâ khât troh vâ mơhriâm, rơtế mơhriâm, mâu tơdroăng ki tơbrê tơbrêh ngin tơkéa ga hía lôi tâi. Tiô tơdroăng tối ăm ‘nâi troh nôkố hiăng ai 2 khu chêng koăng ƀă khu rơngê ting ting vâi hdrêng, ƀă 3 khu tôu chêng cho vâi khu nŭm, vâi rơtăm”.

Mâu tơdroăng ki kơdo mơ-eăm dêi mâu ngê̆ nhân a Tơ Tung hiăng hnê ‘măn ăm tơdroăng ki hâk git túa lĕm tro dêi hdrông Bơhnéa troh a khu rơxông nếo. Ngoh Đinh Văn Anging, môi tung mâu ngế ki rơkê kơhnâ khât tung mâu tơdroăng cheăng túa lĕm tro, hơdruê xuăng dêi khu vâi droh rơtăm cheăm Tơ Tung ai tối tiah kố:

“Ngin vâi o koh mơnê kơ mâu thái hnê trối thái Plơnh, thai Hdot hiăng ôh tá tơbrê hâi măng hnê tối ăm ngin vâi o. Tơná á cho môi ngế hơnăm ối nếo, á hiăng ‘nâi nhên tâng ngin o ôh tá veăng pêi pro tơdroăng kố, mê la ngiâ ah, drêng mâu vâi thái hiăng krâ ah, mê tơmeăm khoăng, khôi túa lĕm tro mê kô prôk troh ulâi ah? Á đi đo tơmiât i nhên, mê kal athế hriâm i rơkê khât, ôh tá xê to tôu chêng rơkê mê ối ‘nâi mơhriâm túa ki ‘mâi rơnêu chêng koăng, mơhriâm túa ki rơbot mâu tơdrá chêng, tơdroăng rơngê ting ting vâ la ngiâ ah ối hnê mơhno ăm mâu vâi o hơnăm ki iâ tâ”.

Ôh ta xê to pơtê ‘nâng tơdroăng ki rak vế  khôi túa vêa vong tung pơlê cheăm, mê ngê̆ nhân hơnăm ối nếo Đinh Ơng ối tâ ‘măn mơhno tơdroăng hơdruê xuăng dêi Bơhnéa tung măng xah hô̆i, vâ ga mâu túa lĕm tro mê châ troh a tíu ki kân rơdâ hên tâ.

“Tuá lĕm tro dêi mơngế Bơhnéa a cheăm Tơ Tung ngin cho lĕm ro păng ‘nâng ƀă hên tơdroăng ki kro ‘na tuăn mơno. Á tơmiât, pakĭng tơdroăng mơđah tung mâu hâi leh mơdĭng tiô khôi hmâ, mê mâu vâi rơxông ối nếo kal athế xúa kŏng ngê̆, măng xah hô̆i ƀă mâu roh ki trâm, mơđah, tơrŭm dêi pó tung mơđah hơdruê xuăng, rơngê ting ting tung lâp tơnêi têa, vâ ing mê, pin xuân châ mơđah mơhno dêi chêng koăng, dêi tơdrá rơngê ting ting Bơhnéa troh ƀă tơmối ôm hyô achê, hơngế. Drêng túa lĕm tro vâi krâ roh nah tơdjêp ƀă mơnhông kơvâ ôm hyô pơlê pơla, tơdroăng rêh kâ ối dêi kuăn pơlê kô chía niân tâ, bă amê, xuân cho túa pêi pro ki krá tơniăn vâ pơtối mơnhông khôi túa, vêa vong dêi tơmeăm khoăng kuăn ngo pin”.

Pa kơdâm kuât ki kân xŏn mê, achê kơnoh on ki krih tơviah xuân ối khâng tôu, mơhno tối ivá ó rơdêi dêi ngế khên tơnôu cho pôa Núp, idrâp chêng koăng rơtế prôk ƀă rơ-rêk kơhnhon xuăng, nâl rơngê ting ting xuân ối chuât chhâk xơtó tung lâp kong kế, ngo ngối a Tơ Tung. Khôi túa, vêa vong dêi hdrông kuăn ngo dế châ pơtối prôk, ing mê, tơveăng gum mơjiâng pơlê cheăm Tây Nguyên rế hía rế thăm tơ’nôm lĕm ro.