Mâu klôh châ chiâ a hbêa ngo pôa A Đuý, ối a thôn Ngọc Leng, chôa ‘lâng châ pêt mâu xiâm kơphế hdrê. Ngế ki ‘nâ djiân hdrê kơphế, ngế ki ‘nâ pêt, ngế ki ‘nâ kơđu tơnêi klêi mê tôh. Bu tung to lâi chôu, kơdrum hdrối nah ki hên pêt to pôm loăng hiăng chiâng mơngiơk ngiât lĕm nếo.

Vâ chê 9 sào tơnêi dêi rơpŏng hên hơnăm bu pêt pôm loăng, pêi lo liăn iâ. Vâ pơhlêh pêt loăng kơphế laga liăn rôe hdrê ƀă mung mơngế pêi cho kơxô̆ liăn lối hên. Pôa A Đúy tối, rôh kố, hdrê châ ăm tê kơtê, tơdroăng pêt xuân ai kăn ƀô̆ ƀă khu cheăng dêi pơlê tŏng gum troh tá tui lui, gum rơpŏng ai tơ’nôm ivá vâ pơxiâm môi troăng pêi kâ nếo.

“Tơdroăng châ tŏng gum hdrê kơphế gum rơpŏng kơdroh kơxô̆ liăn mơ’no apoăng ƀă ai liăn po rơdâ ƀăng deăng pêt mơjiâng. Rơpŏng á pói vâ loăng kơphế kô xông ngiêt lĕm, djâ pêi lo liăn tơniăn ăm rơpŏng’’.

Ôh tá xê krê rơpŏng pôa A Đúy, chât rơpŏng ối tung rơpŏng mơngế hơnăm hiăng krâ, mơngế chó chêng tơvê kŏng, rơpŏng ôh tá ai kuăn ‘nĕng rak ngăn a Tu Mrông xuân châ kơjo gum tung rôh pêi pro pêt kơphế apoăng. Kơ’nâi lối 1 rơtuh xiâm hdrê cho môi troăng pêi ki lĕm tui tơdroăng.

Teăng xúa kơxô̆ liăn rôe reăng rơkâu mâu tơdroăng ki kal, cheăm mơhnhôk pêi pro troăng pêi cheăng ‘’Hneăng hôp kân ôh tá ai reăng’’, mơhnhôk liăn pơlê pơla vâ rôe hdrê, tơkŭm po mơdâ ƀă rak ngăn loăng kơphế, klêi mê xing xoăng tê kơtê ăm kuăn pơlê. Mâu kơpâu reăng rơkâu hiăng châ teăng ƀă mâu loăng kơphế hdrê ối kŭn, djâ tơdroăng ki pói tơngah ‘na môi cheăng kâ krá tơniăn ăm kuăn pơlê kơpong kong ngo.

Tung khế 7 kố, cheăm Tu Mrông mơ-eăm pêi kêi đeăng tơdroăng xing xoăng ƀă tŏng gum kuăn pơlê pêt lối 1 rơtuh xiâm kơphế tung ƀăng deăng dâng 200 hectar. Pơkâ xiâm ôh tá xê to mơdêk ƀăng deăng pêt mê ối chôa ‘lâng mơjiâng chiâng kơpong pêt tơkŭm, mơjiâng chiâng xiâm kối vâ pêt kơphế tiô troăng ki kơnâ.

Pôa Võ Trung Mạnh, Kăn pơkuâ hnê ngăn Đảng ủi cheăm Tu Mrông tối ăm ‘nâi, lối 1 rơtuh xiâm loăng kơphế châ pêt tung rơnó mêi kố nếo cho troăng prôk pơxiâm. Hneăng hơnăm 2026 – 2030, kong pơlê châ pơkâ tŏng gum kuăn pơlê pêt nếo 1.000 hectar kơphế; mơ-eăm troh hơnăm 2030, tâi tâng ƀăng deăng kơphế lâp cheăm tiô tối hdrối dâng 1.588 hectar, tơmiât la ngiâ mơ-eăm rêm rơpŏng ai ki vâ iâ 1 hectar kơphế vâ mơnhông cheăng kâ rơpŏng. Vâ  pêi pro pơkâ pêi kố, cheăm Tu Mrông pơtối rak tơdroăng xing xoăng hdrê tê kơtê, mơ’no liăn pro long rơchôa têa, hnê mơhno kih thuât pêt, rak ngăn, tơdjêp khu tê mơdró rôe tâi tơmeăm ƀă mơhnhôk mơ’no liăn uâ pro trâu hơngế.

Hơhngế tâ cho mơjiâng kơpong pêt mơjiâng châ tiô pơkâ VietGAP, chôa ‘lâng mơjiâng inâi kơphế ki kơhiâm má môi  Tu Mrông.

Pôa Võ Trung Mạnh tối ăm ‘nâi tơ’nôm: Tâng châ rak ngăn lĕm ƀă ai tíu tê tơniăn, lối 1 rơtuh xiâm loăng kơphế ôh tá xê to pêt lâp lu mâu hbêa ngo mê ối po rôh tơ’lêi pơhlêh tăng cheăng pêi cheăng ăm rơpâu rơpŏng mơngế Rơteăng, chôa ‘lâng djâ kơphế chiâng loăng plâi ki xiâm a kơpong tơnêi kố.

“Đảng ủi cheăm Tu Mrông hiăng mơjiâng Tơdroăng tơkêa bro mơjiâng kơphế ki kơhiâm Tu Mrông. Ing mê, ngin kô hnê mơhno kuăn pơlê pêt, rak ngăn, tơniăn pơkâ VietGAP, mơjiâng mah kơpong pêt, tơdrêng amê tơpui ƀă mâu khu tê mơdró, khu tơrŭm cheăng vâ tơdjêp ƀă kuăn pơlê, mơjiâng tơmeăm ki kơhiâm dêi cheăm Tu Mrông, tơniăn inâi kơphế Tu Mrông kô tê tung kơchơ mơdró krá tơniăn má môi’’.