Tiô tối tơbleăng, tâi tâng kế tơmeăm a kong pơlê GRDP tung 6 khế apoăng hơnăm dêi Lâm Đồng bu châ dâng 7,9%, iâ tâ tơdroăng chêh pro pơkâ mơ’no. Hlo ki ai khât kố, hên mâu kăn Hô̆i đong hnê ngăn kong pơlê pâ thế Vi ƀan hnê ngăn kong pơlê pêi pro nhên mâu tơnêi tơníu ki thăm mơnhông ki u ối tung tơdế mơ’nui hơnăm. Tơpui tối leăng a rôh hôp, kăn pơkuâ mâu khu râ, kơvâ cheăng ăm ‘nâi kong pơlê hiăng séa ngăn, chêh tơkŭm hlá mơ-éa mơnhông tiô rêm kơvâ cheăng.

Tung mê, pêi chiâk deăng pơtối rak hnoăng cheăng ki mơdêk ƀă kơlo tâk lối 5%, ƀă cheăng kơmăi kơmok, mơjiâng pro kế tơmeăm ƀă tê mơdró châ mơnhên cho mâu kơvâ cheăng ki mơnhông tơƀrê vâ tơbêng ăm mâu tơdroăng ki thăm mơnhông ối ‘ro.

Môi tung mâu tơdroăng ki xiâm châ tơngah cho kơvâ cheăng nhôm. Tiô pôa Nguyễn Bá Út, Kăn pơkuâ Khu ngăn kơmăi kơmok ƀă tê mơdró Lâm Đồng, rơtế ƀă tơdroăng ki mơdêk rĕng ‘no hrê liăn ngân pêi cheăng tơdjuôm ƀă tŏng gum tơdroăng ki xơpá ăm mâu tơdroăng tơkêa, hên kế tơmeăm cheăng ƀă kơmăi kơmok ki kal kô châ xúa tung hneăng má III ƀă hneăng má IV, pro tơ’nôm ivá thăm mơnhông ăm kong pơlê.

“Hâi lơ 9 khế 7 pin kô ai nhôm, hâi lơ 19 khế 7 kô ai nhôm kơlêa ƀă hâi lơ 26 khế 7 kô tê nhôm ki apoăng. Kơvâ cheăng nhôm ki u ối, nôkố dế tơkŭm tung 14 toăng hngêi kơmăi pá kơdâm ki ai tơdjâk troh kơmăi kơmok uâ pro tung mâu kơpong tíu cheăng ƀă kơmăi kơmok, malối cho a Bình Thuận ton nah kô pơxiâm xúa tung hneăng má III, ƀă hneăng má IV. Kố cho mâu tíu ki kal vâ veăng gum ăm tơdroăng ki thăm mơnhông”.

Laga, hên mâu kăn tối tiah kố mơnhên tro tơnêi tíu ki nếo bu cho tơdroăng ki kal. La tơdroăng ki xiâm tâ cho athế mâu kế tơmeăm pơhlêh kơlo ki veăng gum dêi rêm tơdroăng tơkêa bro, rêm kơvâ cheăng ƀă mâu pơkâ pêi thăm mơnhông tơdjuôm, ing mê gum ăm cheăng pơkuâ rơkê tâ pro tíu ki vâ kơ koan pơtroh pôk kuăn séa ngăn tung pơla pêi pro.

Mơgêi rôh hôp, pôa Lưu Văn Trung, Kăn phŏ pơkuâ hnê ngăn Đảng ủi, Kăn hnê ngăn Hô̆i đong kong pơlê Lâm Đồng tối nhên, hâi khế ki u ối dêi hơnăm ôh tá ai hên xếo, xua mê, mâu tơdroăng tơkêa bro ki rĕng pro chiâng mâu kế tơmeăm kơnía rế tâk nếo kâi veăng gum tơdrêng tung tơdroăng pơkâ pêi thăm mơnhông.

“Mâu tơdroăng tơkêa pro chiâng kế tơmeăm vâ veăng gum ăm thăm mơnhông tâk cho mâu tơdroăng tơkêa on tơhrik, tơdroăng tơkêa bro hngêi kơmăi on tơhrik ối kal hên troăng prôk mê hiăng pro klêi nếo hlo, hngêi kơmăi nhôm mê sap ing nôkố troh mơ’nui hơnăm mơjiâng pro to lâi tâ̆n nhôm kô pro chiâng tơdroăng thăm mơnhông. Á pâ thế ai môi to hlá mơéa chêh pro nhên, rêm toăng  hngêi kơmăi, rêm tơdroăng tơkêa bro”.

Tơdroăng tối tơbleăng sap ing tíu hôp Lâm Đồng xuân tối tơbleăng pơkâ thế tơdjuôm mơ’no hên kong pơlê Tây Nguyên nôkố: rơhêng vâ pêi châ tơdroăng pơkâ tâk hên mê rêm tơdroăng tơkêa athế tro ƀă tơdroăng ki pêi pro nhên, rêm kế tơmeăm pro athế rĕng pro chiâng tơmeăm, rêm kơvâ cheăng athế mơnhên nhên ivá veăng gum dêi tơná. Bu drêng mâu ivá thăm mơnhông tâk châ pơhlêh chiâng kế tơmeăm ƀă ki kơnía ki ai khât, pơkâ pêi thăm mơnhông tâk péa kơxô̆ nếo ai tíu vâ pêi pro pơhlêh tung hơnăm 2026.