Ngế xiâm hnê ngăn tơnêi têa tối, Việt Nam ƀă Nhuk ối hên tơdroăng cheăng kâ vâ mơdêk tơrŭm cheăng, tung mê JBIC rak hnoăng cheăng ki kal tung mơhnhôk tăng liăn vâ mơjiâng tơmeăm khoăng ki pơxúa ƀă pơ‘lêh pêi cheăng krúa lĕm. Ngế xiâm hnê ngăn tơnêi têa pơkâ thế JBIC pơtối pro kông tơdjêp, tăng ‘nâi plĕng mâu luât pơkâ ‘na liăn ngân, ăm liăn ‘no mơjiâng pro tơtro vâ kơjo kum pro mâu kơpong hngêi kơmăi, tíu pêi cheăng xiâm hơ‘lêh nếo hriăn plĕng ki nếo ƀă hngêi kơmăi mơjiâng pro tơmeăm khoăng ki dâi lĕm a Việt Nam.

Pôa Maeda Tadashi, Kăn xiâm hnê ngăn hngêi rak liăn ăm ‘nâi JBIC púi vâ po rơdâ mâu tơdroăng tơrŭm cheăng nhên, veăng pêi klêi tơdroăng pơkâ lăm pôu Việt Nam dêi Ngế pro xiâm hnê ngăn kong têa Nhuk hlối tơtro ƀă troăng hơlâ tơ’mot ‘no liăn cheăng kong têa ê dêi Việt Nam.