Tiô Hlá mơ-éa pơkâ dêi khu pơkuâ nếo tơbleăng, Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak hiăng tơ‘nôm 282 kơxô̆ mơngế mot hriâm tiô tơdroăng púi vâ má 1 ăm 4 to hngêi trung mê cho Hngêi trung râ má pái phôh thong Nguyễn Huệ, Hngêi trung râ má pái phôh thong Lê Qúi Đôn, Hngêi trung râ má pái phôh thong Buôn Ma Thuột ƀă Hngêi trung râ má pái phôh thong Čư̆ Mgar; hlối tơ’nôm 302 ngế nếo châ ăm mot hriâm tiô púi vâ má 2 a mâu Hngêi trung râ má pái phôh thong  Hồng Đức, Chu Văn An, Nguyễn Trãi ƀă Lê Hữu Trác ăm mâu hok tro ki ai tŭm điêm vâ hriâm, ƀă kơlo điêm plah mê ăm tiô kơ tơrêm khu ngế.

Jâ Lê Thị Thanh Xuân, Ngế ngăn ‘na Hnê hriâm ƀă Hnê mơ jiâng tuăn ngôa rơkê kong pơlê Dak Lak ăm’nâi, tơdroăng rah xo mot hriâm lâm 10 dế châ tơbleăng pêi tro tiô tơdroăng. Klêi tơbleăng điêm tro tiô pơkâ, hok tro ai 3 hâi lăm pro hlá mơ-éa mot hriâm. Klêi kơ’nâi hâi lơ 3/7, Khu xiâm ngăn hnê hriâm ƀă hnê mơjiâng tuăn ngôa rơkê kong pơlê Dak Lak kô pơtối tối ăm ‘nâi tơdroăng ki ai khât vâ kô hnê mơhno pêi pro ăm tơtro.