Tung môi toăng hngêi trá tiô chal krâ nah, idrâp chêng chuât prông, chôa ‘lâng, rêm idrâp chêng mê, mâu vâi krâ, mâu ngế ki tối cho hiăng rơkê păng ‘nâng ‘na tơdrá chêng đi đo tơmâng nhên, ‘mâi rơnêu krâu khât vâ rak vế idrâp ki tơtro dêi tơrêm kơtâ chêng. Tung mâu chêng ki mê, ai môi kơtum chêng chal krâ nah ki rơpŏng pôa Siu Chơt, ối krếo cho pôa Rốp, ối a pơlê Suối Cẩm, cheăm Čư Drăng, kong pơlê Gia Lai rak ‘măn hiăng ‘nâi to lâi rơxông, ngăn kơtum chêng mê cho kơnâ git trối mêa hâu. Pôa Siu Chơt ai tối ăm ngin: Rêm kơtâ chêng mê ga kân kŭn pơrá phá dêi pó, idrâp chuât ƀă nâl tối rêm kơtâ chêng mê xuân phá krê xêh, drêng tôu chêng ga chiâng ai môi khu tơdrá ki tơtro dêi pó, tơ’mot hên kih thuât ki tôu, tŏn, rơtế ƀă tơdroăng ki rơkê dêi chal vâi krâ nah châ hnê mơhno, ‘măn vế sap ing rơxông vâi krâ nah troh rơxông nếo nôkố.

“Kố cho chêng inâi Mnâm, kơtâ chêng ki kố hmâ tôu tung mâu roh leh mơdĭng phiu ro, sôk suâ, ôu kâ tơdroăng ki pon mơhúa, klêi mê, akố ối ai chêng Guh, chêng Tơ, ƀă mâu khu chêng koăng ki ê”.

Tiô rơkong hơ’muăn tối dêi pôa Rốp ăm ngin ‘nâi, kơtum chêng ki kố, nôu pâ, jâ nôa hiăng chôu ‘măn ăm ngin sap ing ton nah. Tung mâu hơnăm tơplâ xâ nah, idrâp chêng hiăng tôu mơđah vâ mơhnhôk khu vâi rơtăm lo lăm plâ xâ vâ pring vế, gak ngăn pơlê pơla, cheăm bêng. Troh nôkố, idrâp chêng ki mê xuân ối chuât tung mâu hâi mơdĭng pâk tuăn ăm vâi hdrêng, mơdĭng rơkâu hâk tơbâ hâi kot mâ,  rơkâu hơnăm erêh ton, mâu leh mơdĭng dêi rơpŏng hngêi, mơdĭng dêi pơlê pơla, hâi mơdâm, kơnăng kiâ, ‘mế mơngế hlâ, ing mê veăng gum pro tơdjêp pơla mâu kuăn pơlê ƀă kring vế, rak ngăn khôi túa, vêa vong dêi hdrông Jarai.

“Ton roh nah, ahdrối vâ lo lăm plâ xâ kuăn pơlê hmâ tôu chêng vâ chiân mâu vâi rơtăm lo lăm plâ xâ. Tung roh tĭng kâ kơpôu ngin xuân hmâ tôu chêng ki kố. Rêm kơtum chêng hmâ xúa tung pơla ai tơdroăng ki hơniâp ro, lăm ‘mế mâu ngế ki hiăng hlâ, mâu tơdroăng ki mê, ngin xuân tôu chêng tiô tơdrá ki pơrá phá dêi pó. Chêng arap ga phá, chêng ki kố ga xuân phá. Mơngế Jarai ngin hiăng rak vế kơtum chêng koăng ta troh a hâi kố tung mâu roh leh mơdĭng lơ mơdâm kiâ, kơnăng kiâ pơrá ai khu chêng koăng ki kố”.

Hâk git khu kơtum chêng chal vâi krâ nah ngăn trối mêa hâu dêi rơxông rơpŏng hngêi tơná, pôa Rốp hiăng phiu niu rơngê môi ƀai Jarai, mơhno tối dêi tuăn mơno a rơxông ki mê nah hiăng veăng rơngê, tôu chêng koăng a mâu măng leh mơdĭng. Pôa hâk tơngăm xua kơtum chêng koăng chal vâi krâ nah châ pơtối rak vế hên rơxông, ôh ta xê to kơnía ‘na kế tơmeăm mê ối cho tơmeăm khoăng mơhno túa lĕm tro xuân ối hmâ rêh ƀă tơdroăng rêh kâ ối chal nếo nôkố.

Idrâp dêi hơkâ chuât cho vâ tối pơtâng pơxiâm po mâu hâi leh mơdĭng dêi mơgế Jarai. Idrâp hơkâ mê, ôh tá xê to rak rơ-rêk ăm khu chêng mê ối  tơveăng gum mơjiâng chiâng túa kơhnhon xuăng, kơ’ngrâu chêng kŏng tiô kơ ivá rêh ối chal nếo, ối a pơlê Mlăh, cheăm Phú Túc, pôa Kpă Bưn cho môi tung iâ mơngế ki ối rak vế tŭm mâu túa kơhnhon xuăng rế tôu hơkâ ki krip ro ti mê.

Tung môi toăng hngêi trá xŏn dêi rơpŏng pôa Kpă Bưn, pôa hiăng kơtúa dêi hơkâ ki kân mê a mơnât hngêi, ngăn tơmeăm mê trối khu mêa hâu ki kơnâ. Kố cho hơkâ ki bu chiâng xúa to mâu roh leh mơdĭng hơniâp ro kân dêi pơlê, trối tĭng to hngêi nếo, tĭng kâ báu nếo, tĭng kleăng kơneăng têa lơ tĭng tơbâ mơnê. Tung dế leăn mê, cho 2 to hơkâ ki ê, vâ pro mâu tơdroăng mơdĭng ki ê, cho mâu hâi mơdâm, hâi kơnăng, lơ hâi lôi tơnâp kiâ. Ƀă pôa, rêm to hơkâ mê, pơrá ai xêh hnoăng krê, ôh tá khoh ‘no hmâng to lo vâ hơkâ ki kố drêng ai tơdroăng mơdĭng ki ê.

Tơdroăng ki pro ối chôu vế đi đo dêi pôa Kpă Bưn, mê cho ngê̆ thuât kơhnhon xuăng rế tôu hơkâ. Rêm hdroh po hâi leh mơdĭng, rơtế ƀă kơtum chêng, mê pôa ối pêi pro hên tơdroăng tung leh mơdĭng, mê cho ing mâu hvêa chêng kơteăng, kơhnhon ki rơmuăn, tro rơ-rêk. Péa kơpeăng kŏng râng loăng tôu hơkâ ki tơtro rơ-rêk, ai drêng ‘nâ tôu a châ hơkâ, ai drêng ‘nâ tôu a tơnêi vâ mơjiâng chiâng túa rơ-rêk ki tơtrro ƀă idrâp chêng ki chuât. Tơrêm túa kơhnhon, ai drêng ‘nâ prôk pá ngiâ, ai drêng ‘nâi ton tơrôu, drêng ‘nâ vêh pá hơ-‘vá, drêng ‘nâ vêh pá hơ-ếo, mâu túa kơhnhon, kơ’ngrâu châ chăn, chêng kŏng mê cho vâ mơhno tối tơdroăng ki rơdêi, rơmuăn. Hiăng hên hơnăm kố, pôa Kpă Bưn rế mơjiâng pro hơkâ, rế hnê túa xuăng hơkâ ăm dêi cháu kơnốu, inâi ga cho Ksor Blưh xiâm nếo châ 15 hơnăm.

“Nốkố, á ối ai ivá mo rơdêi á athế mơ-eăm hnê ăm khu rơxông nếo túa tôu chêng, tŏn koăng, mê cho mâu ƀai chêng arap, xuăng hơkâ. Drêng ối ai ivá mê á xuân hmâ lăm tôu chêng koăng, mơđah ukố umê. La drêng hơnăm hiăng krâ, á bú pói rơhêng vâ mâu khu rơxông nếo, kuăn cháu nôkố athế hâk vâ ƀă chêng koăng. Bu kal ai vâi hdrêng vâ mơhriâm mê á kô hnê hlối, ôh tá ‘nâi ki klâi athế lăm êng, á ‘nâi to lâi á hnê to mê. Tung rơxông nếo nôkố, vâi pói rơhêng vâ vêh dêi chal vâi krâ roh nah, ôh tá xê to djâ chêng koăng lăm tôu mơđah tung tơnêi têa mê ối lăm mơđah troh a kong têa vâi ê. Xua ti mê, pin athế kơdo mơ-eăm rak vế khôi túa, vêa vong i lĕm tro dêi nôu pâ, jâ nôa chal krâ pin roh nah”.