Tiô tơbleăng, 6 khế apoăng hơnăm, kong pơlê Dak Lak hiăng hlê plĕng ƀă pêi pro kơtăng mâu troăng hơlâ dêi Đảng, troăng tơdjâ, luât dêi Tơnêi têa ‘na tơdroăng cheăng lêng, gâk kring tơnêi têa, tơdroăng gâk kring tíu tơkăng kong; teăm pêi pro tơdrêng mâu tơdroăng cheăng, pơkâ pêi tơtro ƀă tơdroăng nôkố dêi kong pơlê.

Tiô Đăi tă Lê Văn Hùng, Phŏ kăn pơkuâ lêng, Kăn pơkuâ tơbleăng tơdroăng cheăng lêng, Khu xiâm pơkuâ mô đô̆i kong pơlê Dak Lak, kong pơlê hiăng tơdjêp krá tơniăn tơdroăng mơnhông cheăng kâ – rêh ối pơlê pơla ƀă gâk kring tơniăn cheăng lêng, gâk kring tơniăn pơlê pơla.

Mâu tíu cheăng ki tơdjâk hiăng tơrŭm tung mơnhên mâu pơkâ pêi, tơdroăng tơkêa bro vâ tơxâng pơkâ mơnhông mơdêk, rế tơniăn gâk kring tơnêi têa. Kong pơlê xuân pêi pro châ tơƀrê mâu troăng hbrâ mơdât  tơnăng ká xi xŏng ôh tá tro luât IUU, pơkuâ krá tơniăn mơngế pêi cheăng, plong tuk hbrâ mơhnhôk veăng gâk kring hnoăng pơkuâ têa kơxĭ, rơlố; thăm pơkuâ, gâk kring hnoăng pơkuâ tơkăng kong, tơrŭm pêi pro châ tơƀrê tơdroăng klâ tơkăng kong, tâp tơneăn ƀă kong têa pú hmâ kong têa Kul.

Khu lêng gâk kring kuăn pơlê ƀă hbrâ mơhnhôk pơtối pro krá. Tơdroăng rah khu lêng châ pêi pro krá tơniăn, tơbleăng tơdrăng, kêi đeăng 100% pơkâ pêi ƀă vâ chê 5.500 rơtăm pro mô đô̆i. Mâu khu Mô đô̆i, Kŏng an ƀă Mô đô̆i gâk tơkăng kong rak tơrŭm krá tung tơniăn gâk kring kal kí, tơniăn lâp pơlê pơla, gâk kring mâu tơdroăng kal kí ki kal, tơdrêng amê mơnhông hnoăng ki xiâm tung hbrâ ví kong prâi pro ôh tá tơniăn, ti tăng tŏng xo mơngế hliăng tiâ.

Đăi tă Lê Văn Hùng tối ăm ‘nâi, mâu kơ koan, tíu cheăng khu lêng kong pơlê Dak Lak hiăng mơjiâng tŭm pơkâ pêi, troăng tơplâ, hbrâ rơnáu tơplâ:

‘’Mâu kơ koan, tíu cheăng khu lêng kong pơlê mơjiâng tŭm mâu pơkâ pêi, troăng tơplâ, hbrâ rơnáu tơplâ; teăm tơdrêng ‘mâi rơnêu, tơ’nôm tơtro ƀă tơdroăng nôkố, hnoăng cheăng ƀă tơkŭm uâ bro drêng pêi pro khu râ kăn pơkuâ kong pơlê 2 râ; đi đo tơkŭm po hnê, pơtâp, tơdrêng amê chiâng pêi pro mâu tơdroăng cheăng, hbrâ tơleăng teăm tơdrêng, châ tơƀrê mâu tơdroăng. Po rơdâ pêi pro pơkâ pêi cheăng ton xŏn “Tíu hbrâ mơdât a rơvâ plêng krá tơniăn”  vâ mơjiâng tơdroăng hbrâ mơdât a rơvâ plêng lâp lu, hên râ, krá tơniăn; chôa ‘lâng kêi đeăng troăng pêi tơplâ hbrâ mơdât a rơvâ plêng ƀă tơƀai kơneăng ôh tá ai ngế vê”.

Pôa Đào Mỹ, Phŏ Kăn hnê ngăn Vi ƀan kong pơlê Dak Lak tối ăm ‘nâi, 6 khế mơ’nui hơnăm 2026, hnoăng cheăng lêng, gâk kring tơnêi têa kong pơlê ƀă tơdroăng gâk kring tơkăng kong ối hên tơdroăng xiâm ki kal.

Pôa Đào Mỹ pơkâ thế mâu tíu cheăng, khu lêng pơtối hlê plĕng pêi pro, po rơdâ pêi pro châ tơƀrê troăng hơlâ dêi Đảng, troăng hơlâ, luât dêi Tơnêi têa; thăm pơkuâ, gâk kring tơkăng kong tơnêi têa; pơkuâ krá tơniăn mơngế pêi cheăng, plong tuk, rơxế kơmăi kơmok xivil, hbrâ mơhnhôk gâk kring hnoăng pơkuâ têa kơxĭ, rơlố; pêi pro kơtăng mâu troăng hbrâ mơdât tơnăng ká xi xŏng ôh tá tro luât IUU; tơdrêng amê rak tơdroăng hbrâ tơplâ, mơdêk ki dâi lĕm pơtâp, hnê mơhno, tơxâng pơkâ hnoăng cheăng tung rơxông nếo.

“Tơmâng mơjiâng khu lêng ƀă kơ koan mô đô̆i kong pơlê krá tơniăn ó rơdêi tâi tâng, tơxâng pơkâ hnoăng cheăng tung rơxông nếo. Rak kơtăng tơdroăng gâk hbrâ rơnáu tơplâ, tơniăn mơdêk ki hôm rơkê hnê, pơtâp, tơrŭm pơla 3 khu lêng tiô pơkâ, tiô Tơdroăng pơkâ 03 hơnăm 2019 dêi Chin phuh’’.

Klăng rôh kố, pôu râng hnoăng dêi Khu xiâm pơkuâ mô đô̆i, Kuân khu 5, pôa Đào Mỹ, Phŏ Kăn hnê ngăn Vi ƀan kong pơlê Dak Lak hiăng diâp Ƀâng kheăn kơdeăn dêi Ngế xiâm pơkuâ lêng diâp 1 ngế krê; diâp Ƀâng kheăn kơdeăn dêi Kuân khu 5 diâp 2 khu pú hên, 7 ngế krê hiăng châ tơƀrê păng ‘nâng tung po rơdâ pêi pro mâu hnoăng cheăng lêng, gâk kring tơnêi têa 6 khế apoăng hơnăm 2026.