A leh tơbâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, tối troh Pơlê kong kân Hồ Chí Minh cho tối troh môi kơpong tơnêi kro tơdroăng pâ nhoăm tơnêi têa, kăch măng, pâ dêi rơpó ƀă hriăn plĕng tơdroăng ki nếo; môi kơpong tơnêi đi đo ‘nâi tơkŭm mâu tơdroăng ki kơnía lĕm tro má môi dêi hdroâng mơngế, hlối ôh tá la lâi pơtê po troăng ăm mâu tơdroăng púi vâ ki nếo.

Pơlê kong kân hiăng mơhno hnoăng cheăng djâ troăng ahdrối tung cheăng kâ, tíu pêi cheăng kâ kân ‘na liăn ngân, kơchơ mơdró, ‘na mơdró kâ, khoa hok - kŏng ngê̆ - hnê hriâm - hnê mơjiâng tuăn ngôa rơkê, ‘na pơkeăng pơlât, túa lĕm tro, tơpui kâ hlối tơrŭm cheăng ƀă lâp plâi tơnêi. Pôa Tô Lâm pơkâ thế, Pơlê kong kân kal athế hdró tíu vâ pêi cheăng mơnhông tiô troăng hơlâ tíu xiâm, túa lĕm nếo, krúa lĕm, rơkê plĕng, tơdjêp krá ƀă mâu kơpong Đông Nam Bộ, Tơbăng kroăng Cửu Long, Tây Nguyên, lâp tơnêi têa ƀă lâp plâi tơnêi.

Pakĭng mê, tơmeăm khoăng thế pro hdrối môi hvêa prôk, la thế ai ki xiâm lĕm tro, ki kal, tơniăn tơƀrê ‘no liăn pêi pro; pro ahdrối cho troăng prôk drô kơphô̆, troăng rơxế lơ treng tung kơphô̆, troăng ví pakĭng, troăng kân tơdrăng lĕm, kơno têa kơxĭ, logistics, troăng hyôh măng, on tơhrik, pơkeăng pơlât, hnê hriâm, túa lĕm tro, hngêi ối pơlê pơla, mơdât têa lân lu ƀă krúa lĕm.