*Kong pơlê Dak Lak hiăng tơdah lối 5,33 rơtuh ngế tơmối, châ lối 56% túa pơcháu tung hơnăm, tâk lối 37% tâng vâ pơchông ƀă khế kố hơnăm hdrối. Tâi tâng kơxô̆ liăn châ xo ing ôm hyô tiô riân châ 9.600 rơtal liăn, tâk vâ chê 38% tâng vâ pơchông ƀă khế kố hơnăm nah. Dak Lak hiăng chêh pro klêi hồ sơ pâ thế UNESCO chêh inâi “Tuăn ngoâ rơkê tung pêt ƀă uâ pơliê kơphế”, chêh pro hồ sơ kế tơmeăm kơnía “Rơkâu xối pleăng kơneăng têa dêi hdrông kuăn ngo Rơđế”; tơdrêng amê hlối pơkâ troăng hơlâ tŏng gum rak vế ƀă mơnhông ki kơnía kế tơmeăm túa lĕm tro chêng koăng pơla hơnăm 2026-2030.

Nôkố kong pơlê dế tơkŭm tơbleăang pêi mâu tơdroăng ki kal ‘na mơjiâng pro ôm hyô pơla hơnăm 2026-2030, hbrâ rơnáu tơkŭm po Mơđah tơbleăng Sầu riêng Dak Lak hơnăm 2026, tơdrêng amê hlối mơdêk rơdêi mơjiâng pro kế tơmeăm ôm hyô nếo, pơhlêh xúa kong ngê̆, mơjiâng inâi ôm hyô ƀă mơdêk ki rơkê plĕng dêi mâu ngế cheăng vâ veăng pêi pro pơkâ pêi thăm mơnhông tâk péa kơxô̆.

*Pêi pro hơnăm Ôm hyô Tơnêi têa 2026 ƀă  ƀă pơxá “ Kong ngo troh têa kơxĭ ngiêt”, tung 6 khế hdrối kô nah, lâp tung kong pơlê Gia Lai tơdah dâng 8,75 rơtuh ngế tơmối, tâk 19% tâng pơchông ƀă hơnăm nah. Tâi tâng kơxô̆ liăn châ xo ing tơmối troh ôm hyô châ 19.000 rơtal liăn. Ki vâ tối, kơxô̆ tơmối lâp plâi tơnêi troh tâk 80%, tối ki tơƀrê ing mâu tơdroăng mơhnôk, tơbleăng a hên kong têa môi tiah Hàn Quốc, Philippines ƀă Australia.  Hên tíu troh tung kong pơlê châ lâp plâi tơnêi khê̆n kơdeăn, tung mê Quy Nhơn châ hlá tơbeăng ôm hyô Lonely Planet rah xo mot tung Top 25 tíu ki lĕm ‘na ôm hyô a têa kơxĭ hơnăm 2026.

Ing tơdroăng ki tâk mê, Gia Lai pơkâ troh hơnăm 2030 tơdah  châ 18,5 rơtuh tơmối, kơxô̆ liăn châ xo dâng 35.000 rơtal liăn rêm hơnăm. Vâ pêi khŏm châ ai khât tiô pơkâ, kong pơlê tơmâng pêi ‘na tơ’mot mâu khu ‘no liăn cheăng tơbleăng mâu tơdroăng tơkêa bro ôm hyô ki kân; hlối pêi tiô troăng pơkâ “3k- 3A” krếo rêm ngế kuăn pơlê chiâng môi “teăng mâ ôm hyô”, mê cho: Ôh tá pơlông, ôh tá pro kơnâ, ôh tá hvât xok hmâng vâ- thế tơniăn, tơmâng hlĕ kơ tơmối, ăm tơ mối pâ rơhêng vâ vêh troh ah nếo”.