Tiô tối tơbleăng, 6 khế apoăng hơnăm, tâi tâng kế tơmeăm a kong pơlê Khánh Hòa (GRDP) tâk 9,03%, ối má 14/34 to kong pơlê, pơlê kong kân ƀă ối má péa kơpong kĭng têa kơxĭ Peă hdroh-Tây Nguyên. Nâp liăn tơnêi têa châ vâ chê 28.000 rơtal liăn, pêi klêi lối 80% túa pơcháu tung hơnăm. Tơdroăng ki ‘no liăn pêi cheăng pơtối hlo pơhlêh, mâu kơvâ cheăng túa lĕm tro, pơlê pơpla châ tơmâng ngăn, tơdroăng pơlê pơla cheăm bêng, gâk kring châ rak vế tơniăn. Laga, hên mâu kăn tối tiah kố, pá rŏng mâu tơdroăng ki tơƀrê mê xuân ối ai mâu tơdroăng ki kal hvái ngăn tơdrăng vâ rak vế tơniăn thăm mơnhông krá ton tung mâu hơnăm la ngoâ. Pôa Phan Gia Ngọc, Phŏ ngăn ‘na luât, Hô̆i đong hnê ngăn kong pơlê, kong pơlê Khánh Hòa tơpui tối leăng:

"Nâp liăn hơnăm kố châ vâ chê 27.930 rơtal la lối 14.000 rơtal liăn, châ lối 53%, lo ing liăn ki xúa tơnêi ƀă liăn mung tơnêi. Kố cho kơxô̆ liăn nâp môi xôh. Tung pơla mê, kơxô̆ liăn nâp sap ing khu mơdró kâ tơnêi têa ƀă khu mơdró kâ kong têa ê kơdroh hên. Chiâng vâ tối, cheăng kâ Khánh Hòa dế tơkôm tung mâu tơnêi ki vâ teăng xua pro chiâng ki kơnía krá ton sap ing pêi cheăng kâ, tê mơdró”.

Tiô hên mâu kăn tối, kố cho rơkong tối tơbleăng xua ing nâp liăn tơnêi ôh tá chiâng pro ton. Rơhêng vâ rak vế ki têi thăm mơnhông, kong pơlê kal pơtối lêi tah mâu tơdroăng tơkêa bro ki ối tơvâ tơvân, tơ’mot mâu tơdroăng tơkêa ‘no liăn mot pêi cheăng tơƀrê, mơnhông rơdêi kơpong mơdró kâ, kơmăi kơmok, tê mơdró ƀă ôm hyô vâ pro pêi lo liăn tơniăn, ton xŏn ăm liăn ngân. Ôh tá xê to tơmâng ngăn troh túa pơkâ châ xo liăn, hên mâu kăn ối pơkâ tơdroăng ‘na xing xoăng liăn ngân vâ kuăn pơlê, malối kuăn pơlê tro tơdjâk xua mâu tơdroăng tơkêa châ pơxúa nhên tâ sap ing tơdroăng pêi châ tơƀrê tung mơnhông. Pôa Võ Nam Thắng, kăn pơkuâ ngăn ủi bêng Đông Ninh Hòa, kong pơlê Khánh Hòa tối tiah kố.

"Kal mơdêk ki tơƀrê tung nâp liăn, hrê liăn, rak tơniăn tơdroăng ki ‘no hrê ăm tơdroăng rêh ối pơlê pơla, malối cho tŏng gum pơhlêh hnê cheăng pêi, ‘no liăn mơdêk ki rơkê plĕng tung khăm pơlât, hnê hriâm a pơlê cheăm. Kuăn pơlê rơhêng vâ mâu tơdroăng ki tơƀrê mê ‘na cheăng kâ kố châ xoăng, tơrŭm nhên tâ tung mâu troăng hơlâ tŏng gum rêh ối pơlê pơla, gum tơdrêng ăm kuăn pơlê, malối cho mâu ngế ki tro tơdjâk xua xo tơvêh tơnêi vâ mơjiâng pro tíu cheăng ƀă kơmăi kơmok, kơphô̆”.

Pakĭng tơdroăng ki loi tơngah ‘na troăng klông ƀă rôh tơ’lêi hlâu mơnhông, kuăn pơlê rơhêng vâ kơxô̆ liăn nâp ing tơnêi kô châ vêh ‘no liăn pro mâu hngêi trung hriâm, hngêi pơkeăng pơlât, troăng prôk, hno têa, hnê cheăng pêi, tăng cheăng pêi ƀă mâu troăng hơlâ tŏng gum ki ê klêi kơ’nâi xo tơvêh tơnêi, vâ tơƀrê thăm mơnhông châ ki tơdjâk troh pơlê pơla.

Vi ƀan hnê ngăn kong pơlê Khánh Hòa ăm ‘nâi tung 6 khế mơ’nui hơnăm, kong pơlê mơeăm pêi châ tơdroăng thăm mơnhông GRDP hên má môi châ 11,2%, ing mê pêi klêi tơdroăng pơkâ pêi thăm mơnhông tá hơnăm sap ing 10-11%. Vâ pêi pro tơdroăng pơkâ pêi kố, kong pơlê kô tơkŭm mơdêk rĕng ‘no liăn pêi cheăng tơdjuôm; lêi tah mâu tơdroăng tơkêa bro ki tá hâi pêi pro klêi; mơdêk tơƀrê pŭn tơdroăng thăm mơnhông; mơdêk ki rơkê tung pơkuâ kăn pơkuâ kong pơlê péa râ; tơdrêng amê hlối kơjo liăn ngân ăm mâu troăng hơlâ toưng gum rêh ối pơlê pơla ƀă mâu kế tơmeăm pro ki kal. Pôa Châu Ngô Anh Nhân, Kăn pơkuâ Khu ngăn liăn ngân kong pơlê Khánh Hòa, ăm ‘nâi, kong pơlê hbrâ vâ xing xoăng liăn nâp liăn ngân hơnăm 2025 ƀă kơxô̆ liăn lối 10.000 rơtal liăn. Kố cho ivá ki kal vâ thăm mơnhông mâu khế mơ’nui hơnăm.

“Kơxô̆ liăn kố kô châ xoăng ăm tâi tâng mâu cheăm, bêng vâ pêi châ tiô tơdroăng rơhêng vâ ‘no liăn cheăng tung mâu kơvâ cheăng ki akl. Kong pơlê kơjo ăm tơdroăng ‘no liăn cheăng ăm kơvâ hnê hriâm, khăm pơlât gum kuăn pơlê; tơdrêng amê hlối tơkŭm kơxô̆ liăn pro mâu kế tơmeăm xúa ki kal, ki xiâm, malối cho mâu tơdroăng tơkêa bro ivá mơnhông kơpong peăng Hdroh kong pơlê Khánh Hòa”.

Mâu tơdroăng ki pêi pro tơƀrê thăm mơnhông tung 6 khế apoăng hơnăm cho tơdroăng cheăng ki kal vâ Khánh Hòa mơnhông tơƀrê. Laga, vâ mơnhông krá tơniăn ton, kong pơlê kal pơhlêh kơxô̆ liăn sap ing tơnêi tơníu chiâng ivá ki ton tá ah ăm cheăng kâ, tê mơdró ƀă rak vế tơƀrê thăm mơnhông châ tơdjâk ai pơxúa troh tơdroăng reh ối kuăn pơlê.