Tơdroăng ki châi heăng hiăng pro 5 ngế kơdrâi hbrâ vâ mot tung lâm 6 drêng mâu vâi o djâ dêi rơpó lăm hêi a long têa Dak Pot ƀă ôh tá mơhúa hliâk chêng klêh tung têa ki trâu. Tơdroăng xía vâ kố trâm tung pơla rơnó hok tro dế mot tung rôh pơtê hriâm, hlối tơrŭm ƀă hyôh kong prâi dế mot tung rơnó mê pro kơdró têa a mâu têa kroăng, têa plông, long rơchoâ tâk đik, têa hiu têi rơ-iêo. Tơdroăng kố ăm hlo tơdroăng ki tơbleăng tối tơbleăng ki rơ-iêo tung pơkuâ, séa ngăn vâi hdrêng dêi mâu rơpŏng hngêi ƀă pơlê pơla tung mâu khế hok tro pơtê hriâm.

Hlo tơdroăng ki kal pêi pro tơdrêng kố, hâi lơ 9/7/2026, Vi ƀan hnê ngăn kong pơlê Lâm Đồng hiăng pơtroh hlá mơ-éa hnê mơhno tơdrêng, pơkâ thế tâi tâng khu pơkuâ cheăng kal kí veăng hnê tối vâ kơdroh iâ tơdroăng trâm môi tiah tơdroăng ki tối a kơpêng. Tiah mê, kơvâ ngăn hnê hriâm ƀă hnê mơjiâng tuăn ngoâ rơkê châ pơkâ thế thăm mơnhông tơrŭm cheăng ƀă mâu rơpŏng hngêi vâ pơkuâ ngăn hok tro tung rơnó pơtê hriâm, mơdêk rơdêi tơdroăng ki hnê klê têa vâ tơniăn troh ivá châ chăn.

Kơvâ ngăn túa lĕm tro, Tơ’noăng ivá thăm mơnhông lăm ngăn tơdroăng ki tơniăn a mâu tíu klê têa, kơpong xah hêi; kơvâ ngăn pơkeăng ƀă khăm pơlât mơdêk ivá pơlât apoăng a mâu tíu ki ai tơdroăng xía vâ. La ƀă tơdroăng mê, mâu khu ki ai tơdjâk troh chiu pôu râng séa ngăn tâi tâng mâu long, tơchoâ têa, vâ rĕng krâ ‘măn kơƀeăng tơbleăng mơdât lăm troh hêi a tíu kố cho rơ-iêo.

Malối, Vi ƀan hnê ngăn kong pơlê Lâm Đồng tối nhên, Kăn hnê ngăn Vi ƀan mâu cheăm, bêng athế chiu pôu râng tâi tâng ƀă chiu pôu râng hnoăng cheăng krê a ngiâ kăn xiâm hnê ngăn kong pơlê tâng ăm ai tơdroăng ki vâi hdrêng hlâ xua tro klâk têa xua ối tung hnoăng pơkuâ ngăn.

Hnê mơhno kơtăng sap ing kăn pơkuâ hiăng ai, la vâ pôi tá ai xếo mâu tơdroăng khéa hơ’nêng, rêm rơpŏng hngêi kal thăm mơdêk ki hlê plĕng hbrâ kơchăng. Athế mơdoh dêi chôu phut tơmâng, rak ngăn, hbrâ rơnáu mâu tơdroăng ki kal ăm dêi kuăn ‘nĕng, pôi tá ăm mâu vâi o hmôu pơ lăm xêh a têa kroăng, têa plông, rơchoâ long têa ki ôh tá ai ngế ki kân séa ngăn. Rak vế vâi hdrêng drêng hlo rơ-iêo dêi rôh klâk têa a rơnó pơtê hriâm ôh tá xê hnoăng cheăng krê dêi kơbố.