A pơlê Chăm Lâm Thuận, cheăm Hàm Thuận Bắc, kong pơlê Lâm Đồng, pôa Thông Long châ ‘nâi troh cho môi ngế ngê̆ nhân hlŭm khiê̆n saranai ki vâi ô eăng. Ôh ti xê to tiah mê pôa ối hnê ăm hên kuăn muăn tung pơlê, gum mơngế Chăm rak vế tơdrá proâ chal krâ, vâ rak vế túa lĕm tro dêi hdrông kuăn ngo.

Jâ Thông Thị Hạnh, Ngế pơkuâ Khu cheăng măt trâ̆n thôn Lâm Thuận, cheăm Hàm Thuận Bắc, ăm ‘nâi, pôa Long ôh ti xê to ngế ki djâ troăng ahdrối tung mơnhông cheăng kâ, mơjiâng thôn pơlê nếo, mê ối kơhnâ veăng mơjiâng Đảng, mơjiâng khu cheăng kal kí, rak vế ƀă mơnhông mâu ki kơnía ‘na túa lĕm tro chal krâ dêi kuăn ngo Chăm.

“Hdrối nah, rơpŏng pôa Thông Long xuân cho rơpŏng xơpá, la kơnôm ing mơ-eăm mê nôkố cheăng kâ rơpŏng hngêi hiăng chía tơniăn. Pôa Long xuân ối rak vế cheăng chal krâ hlŭm khiê̆n saranai, ƀă hnê ăm mâu kuăn ‘nĕng cháu chái hlŭm khiê̆n saranai vâ hlŭm ăm vâi hmâng tung mâu rôh po mơdĭng tung pơlê. Nôkố pôa ai hên hok tro hriâm hlŭm khiê̆n saranai a pôa”.

Nôkố maluâ hơnăm hiăng krâ la pôa Thông Long xuân ối mơ-eăm tâi ivá veăng tung tơdroăng mơnhông dêi hdrông kuăn ngo Chăm akố. Pakĭng tơdroăng ki veăng ivá rơtế ƀă Khu pơkuâ djâ thôn Lâm Thuận, cheăm Hàm Thuận Bắc, pôa ối châ pôk pro krâ pơlê, ngế ki rak ngăn tơdroăng cheăng tơkŭm po rơkâu xối a tíu xối tơbâ Pô Chei akố, veăng gum rak vế túa lĕm tro Chăm tung pơlê.

Troh rơnó pơtê hriâm, pôa Thông Long hmâ tơkŭm po hnê hlŭm khiê̆n saranai ăm mâu droh rơtăm mâu phô̆m vâ xông kân. Idrâp chuât dêi khiê̆n saranai tơmâng môi tiah gá tơ’lêi hlâu la vâ tơ’mot ki rơrêk rơtế ƀă idrâp chuât dêi hơkâ ghi năng, paranưng pâ thế ngế ki hlŭm mê athế rơkê, malối cho tơdroăng xo hyô tung pơla hlŭm. Xua tiah mê ôh ti xê kơbố xuân chiâng hlŭm kjhiê̆n. Pôa Thông Long tối, maluâ kơxô̆ ngế hriâm tá hâi hên la pôa xuân hơniâp ro hnê ăm vâi tâi ivá tơná. Nôkố, pôa mâu ngế ki châ pôa hnê hlŭm khiê̆n  saranai hiăng teăng pôa hlŭm tung mâu rôh po mơdĭng dêi pơlê akố.

“Á xuân tiô hriâm ing thái hlŭm khiê̆n saranai kố hiăng ton, kơnôm hiăng ‘nâi sap ing hdrối mê hriâm xuân rĕng. Á hlŭm khiê̆n  saranai ing mê nah troh nôkố, mê nôkố á hnê ăm mâu hơnăm ối nếo tung pơlê, kuăn ‘nĕng tung rơpŏng hngêi. Á rơhêng vâ rak vế túa lĕm tro chal krâ dêi mơngế Chăm tơná, vâ pôi tá tro piu lôi, ƀă xuân rơhêng vâ kuăn ‘nĕng xo ah hmôi pơtó ƀă pêi pro tro ƀă mâu tơdroăng rơkâu xối dêi chal krâ dêi jâ pôa nah, vâ rak vế túa lĕm tro Chăm rế hía rế tơniăn lĕm tâ”.

Ƀă mơngế Chăm, idrâp chuât dêi khiê̆n saranai cho tơdrá ki lĕm, tro ƀă kuăn mơngế ƀă mâu khu xeăng. Idrâp rơvŏng mê kô ôh tá la lâi hía xua hiăng ai mâu kuăn mơngế, mâu hok tro dêi pôa pơtó ƀă rak. Drêng idrâp rơvŏng saranai choâ hlŭm rơtế ƀă rơrêk hơkâ ghi năng, paranưng châ chuât tung pơlê Chăm cho idrâp chuât dêi rôh ton nah hdrông kuăn ngo, hnê pơchân rêm ngế ‘na hnoăng pôu râng rak vế túa lĕm tro chal krâ ing mâu rơxông, rak idrâp saranai ƀă rơhêng vêh ƀă tơdroăng rêh ối tơniăn ƀă hơniâp ro.