A Riêu Âr Pục ôh tá xê to môi to leh tơbleăng dêi mơngế Pa Cô. Kố ối cho tíu ki tơdâng tơ’mô châ pêi pro ƀă tơdroăng ki loi tơngah dêi mâu krâ pơlê, ƀă mâu pơkâ hiăng mot trâu tung tơdroăng rêh ối pơlê pơla. Ahdrối luât Tơnêi têa ai mâ a kơpong kong ngo, cho mâu luât ki mê hiăng gum rak tơniăn, tơleăng tơdroăng ki tơhôu tơhêng ƀă tơdjêp pơla kuăn mơngế tung rêm pơlê pơla. Tiô tối dêi mơngế Pa Cô, mâu roh tơdroăng ki tơdjâk troh mâu tơdroăng ki tơhôu tơhêng ton pơla mâu rơpŏng tâng ôh, kô tơleăng xêh kô châ djâ tơpui a ngiâ khu krâ pơlê.

Drêng mê, leh hô̆i A Riêu Âr Pục châ tơkŭm po môi tiah rôh tơleăng kân dêi pơlê pơla. Krâ pơlê Lê Tuấn Mõ, thôn Kê Ré, cheăm A Lưới 3 tối ăm ‘nâi, leh tơbleăng châ tơkŭm po vâ tơleăng mâu tơdroăng tô hôu tơdjâk troh tơdroăng rêh ối pơlê pơla.

‘’Leh tơbleăng Âr Pục rôh kố cho tơleăng mâu tơdroăng tơhôu tơhêng tơdjâk troh tơdroăng rêh ối dêi kuăn pơlê, ki rơhêng vâ tối cho tơleăng ôh tá xê to vâ dêi pó mê tơleăng mâu tơdroăng tơxup tơbriât tơnêi, tơbriât hngêi trăng... Mâu tơdroăng tơhôu rơpŏng tâng ôh tá chiâng tơleăng mê krếo krâ pơlê dêi pơlê ƀă tâi tâng mâu krâ pơlê ki ê vâ rơtế dêi pó tơpui tơno ƀă môi tuăn vâ tơleăng; tơleăng mâu tơdroăng ki mâu ngế tơhôu ƀă dêi pó’’.

Tơdroăng ki pro chiâng ki krê dêi A Riêu Âr Pục cho tơdroăng ki ôh tá tơdjâk pa kong ƀă pơkuâ dêi hnoăng tung tơdroăng tơleăng. Ôh tá krê to krâ pơlê dêi rêm pâ, hên krâ pơlê loi tơngah a mâu pơlê ki ê xuân châ krếo troh veăng. Môi ngế ki kuăn pơlê loi tơngah, ôh tá tơdjâk troh rôh tơdroăng châ rah xo vâ pơkuâ, tơniăn tơdroăng ki tơdâng ăm tâi tâng rêm pâ.

Leh tơbleăng tơkŭm po hên tơdroăng krá tơniăn. Ing tơdroăng hbrâ tơmeăm ki pleăng, krếo khu krâ pơlê troh mâu tơdroăng tiâ dêi pó, mơnhên ƀă tơtŭng. Mâu ngế ki veăng châ tối troăng tơmiât pêi pro dêi tơná ƀă mâu rơkong tơpui ai ti lâi mơhno ti mê laga hên tơdroăng ki vâ mơnhên, ai drêng djâ mâu tơdrá rơhdruê tiah hmâ. Klêi kơ’nâi tơmâng tŭm tâi tâng rơkong, khu krâ pơlê kô rơtế dêi pó pơkâ má mơ’nui.

Ki kơnía má môi cho tơdroăng ki vâ dêi A Riêu Âr Pục vâ pơxâu phâk mê tơmiât troh tơdroăng ki tơleăng. Tung rêm rơkong mơnhên, pơchân tối dêi mâu krâ pơlê đi đo djâ tơdroăng ki lĕm rêh ối cho hiâm mơno ki ‘nâi hơ-ui, ôh tá ‘nhó dêi pó ƀă pôu râng hnoăng cheăng ƀă pơlê pơla. Xua ki lĕm tâ mê, tơdroăng ki mơngế Pa Cô pói vâ cho rak tơdroăng tơrŭm tung pơlê.

Klêi kơ’nâi rêm pâ môi tuăn ƀă tơdroăng tơleăng, tơdroăng po tơkêa châ pêi pro. Drêng tá hâi ai chư chêh, mơngế Pa Cô xúa mâu klŏng kơlá kŭn pro tơmeăm mơnhên ăm rơkong tơkêa dêi tơná. Mâu klŏng kơlá tơ’lêi tê mê chiâng um méa dêi tơdroăng inâi ki kơnâ, pôu râng hnoăng cheăng ƀă tơdroăng loi tơngah a ngiâ pơlê pơla.

Nôkố, rơtế ƀă tơdroăng mơ-eăm rak vế khôi túa lĕm tro vâi krâ nah, leh hô̆i A Riêu Âr Pục hiăng vêh pro ƀă tơbleăng kân rơdâ. Ngê̆ nhân Hồ Thị Tư tối ăm ‘nâi, tơdroăng vêh po leh tơbleăng ôh tá xê to vâ rak tơmeăm kơnía khôi túa lĕm tro dêi hdroâng kuăn ngo Pa Cô mê ối gum tơmối ƀă rơxông ối nếo hlê plĕng inhên ‘na mâu ki kơnâ rơkê, ihiâm mơno tơdroăng ki tơdâng tơmô ƀă tơdroăng ki pơlê pơla châ rak ing hên rơxông.

‘’Tơdroăng ki vêh pro leh hô̆i Âr Pục dêi hdroâng kuăn ngo Pa Cô vâ tơbleăng mâu tơdroăng ki lĕm dêi khôi túa lĕm tro hdrông kuăn ngo djâ tiô tro luât nah ăm mâu tơmối ing hơngế xuân môi tiah mâu pú hmâ hơnăm ối nếo a pơlê châ ‘nâi. Mê klêi kơ’nâi châ leh tơbleăng kố vâi kô tâ, hlê plĕng ki kơnâ dêi leh tơbleăng kố’’.

Mơhé tơdroăng rêh ối hâi kố hiăng pơhlêh hên, laga mâu ki kơnâ ki xiâm dêi A Riêu Âr Pục xuân châ mơngế Pa Cô rak. Mê ôh tá xê cho tơdroăng ‘na khôi túa vêa vong lơ mâu rôh tơleăng dêi pơlê pơla, mê ối cho tơdroăng ki mơnhên ro hơniâp tiah hlo ƀă mâ ăm tuăn ihiâm nhuô̆m tơdroăng ki tro, tơdroăng môi tuăn mơno ƀă hiâm mơno rơkê hiăng châ tơbêng ing hên rơxông pơla kơpong ngo ngối kân rơdâ Trường Sơn.