Mâu hâi apoăng khế 6, a Hngêi trung râ má pái phôh thong Ƀuôn Ma Thuột, hok tro hbrâ rêm chôu vâ hriâm rơbot ƀai, hriâm đê vâ chiâng pro ƀai. O Trần Quốc Trung, hok tro lâm 12A14 tối ăm ‘nâi dế hriâm mâu đê tơ’noăng mâu hơnăm hdrối, ngăn tơ’nôm đê tơ’noăng dêi hên hngêi trung ki ê phá dêi pó vâ hbrâ ăm pơkâ rah xo mot hriâm Đăi hok. O hiăng rĕng mơjiâng tơdroăng hriâm tâp inhên ăm rêm môn, hbrâ ti tăng plĕng tơdroăng bă troăng rah xo hok tro dêi mâu hngêi trung.

“Á hriâm rơbot mâu đê tơ’noăng a mâu hơnăm hdrối, séa ngăn hên tơ’noăng đê tơ’noăng a mâu hngêi trung phá tơ-ê, pro pơkâ pêi vâ á hriâm rêm môn ƀă kơ-êng hên rơkong tơpui tung mâu trang măng pơlê pơla dêi mâu ngoh nâ a hneăng hdrối vâ kô châ tơdroăng mot hriâm Đaị học Kinh tế Pơlê kong kân Hồ Chí Minh ƀă pái môn xiâm cho Toán, Ăng-glê ƀă Lý’’.

Kơ’nâi mâu chôu hriâm rơbot thâ dêi hok tro cho tơdroăng rơtế séa ngăn dêi thái cô ƀă rơpŏng. Cô Nguyễn Thị Xuân Hương, Cô Hngêi trung râ má pái phôh thong Ƀuôn Ma Thuột tối ăm ‘nâi, klêi kơ’nâi mơnhên ki hôm rơkê hok tro klêi mâu rôh kiêm tra, hngêi trung hiăng mơjiâng mâu troăng tŏng gum tơtro ƀă rêm khu ngế. Hngêi trung xuân tơrŭm ƀă nôu pâ ƀă khu khăm pơlât tơniăn ivá, ihiâm mơno ăm hok tro hdrối hneăng tơ’noăng.

“Ƀă mâu hok tro ivá ôh tá tơniăn lĕm, tơrŭm ƀă khu ƀok thái khăm pơlât vâ hnê mơhno ăm mâu vâi o tơniăn lĕm mo châ vâ mot hneăng tơ’noăng mơgêi râ má pái. Ƀă khu hok tro ‘nâi klêi tá hâi tơniăn mê pơcháu tơdrêng ăm rêm thái cô ki pleăng dêi mâu tôh hnê, hnê mâu vâi o ôh tá xê a hngêi trung mê hnê chôu pakong, hnê tê kơtê ăm mâu vâi o. Tơdrêng amê xuân ai hnê mơhno thái cô pơkuâ hbrâ tơrŭm pơla thái cô pơkuâ, nôu pâ hok tro rơtế khu râ kăn pơkuâ hngêi trung vâ mơdêk hok tro châ plah hên’’.

Tiô Khu pơkuâ Hnê hriâm ƀă Hnê mơjiâng tuăn ngôa rơkê kong pơlê Dak Lak, tơdroăng hriâm rơbot châ pơkâ pêi pro tiô ivá hok tro, tơtrŏng khu hok tro tơ’lêi ôh tá châ plah tơ’noăng mơgêi râ má pái. Rơtế ƀă tơdroăng cheăng, kong pơlê Dak Lak hiăng kêi đeăng tâi tâng tơdroăng hbrâ ăm hneăng tơ’noăng. Lâp kong pơlê ai 1 Hô̆i đong tơ’noăng ƀă 64 tíu tơ’noăng ki xiâm ƀă 55 tíu tơ’noăng hbrâ; dâng 1.500 kơbong tơ’noăng ki păng ‘nâng ƀă 40 kơbong tơkôm. Dâng 5.000 kăn ƀô̆, thái cô, ngế pêi cheăng ƀă mâu khu ki tơdjâk kô veăng gum hneăng tơ’noăng.

Jâ Lê Thị Thanh Xuân, Kăn pơkuâ Hnê hriâm ƀă Hnê mơjiâng tuăn ngôa rơkê kong pơlê Dak Lak, tối ăm ‘nâi, hneăng tơ’noăng hơnăm kố po kân ƀă kơxô̆ hok tro veăng kơdrâm, kơpong tơkŭm po rơdâ, xua mê mơhnhôk tâi tâng khu cheăng kal kí, pơkâ tơdroăng tơrŭm kal thăm pêi pro, krá tơniăn tơdâng tơ’mô.

“Tơkŭm séa ngăn tâi tâng ƀă teăm hnê mơhno tơdrêng mâu tíu tơ’noăng rơnêu bro tŭm kơbong tơ’noăng, kơƀăng tăng, camera, kơmăi kơmok; tơniăn mâu tíu châ rah xo tơdroăng tơkŭm po hneăng tơ’noăng tơniăn. ‘Na tơdroăng mơngế pêi cheăng hiăng pơtroh tŭm kơxô̆ kăn ƀô̆, thái cô ƀă hbrâ tơkŭm pơtâp inhên ‘na pơkâ pêi, tơdroăng cheăng ăm tâi tâng khu. Ngăn tơdjuôm, tơdroăng hbrâ, tơdroăng tơrŭm ƀă pêi pro hnoăng cheăng troh nôkố pơrá tơniăn hbrâ, krá tơniăn ƀă tro pơkâ pêi’’.

Ƀă tơdroăng ki hbrâ ing rĕng dêi mâu hngêi trung, tơdroăng rơtế dêi thái cô ƀă khŏm mơ-eăm dêi kơvâ hnê hriâm, Dak Lak dế mot hneăng má tui lui hdrối hneăng tơ’noăng ƀă pơkâ ôh tá xê to tơniăn ăm môi hneăng tơ’noăng tơniăn, kơtăng mê ối pro tơ’lêi hlâu vâ rêm ngế hok tro, ki rơhêng vâ tối cho hok tro kơpong pá puât, ai roh tơ’lêi mơnhông lĕm tro ivá dêi tơná.