Tơdroăng ăm ‘nâi ‘na troăng kân tơdrăng pơtối tơdjêp sap Pleiku tơkâ luâ Buôn Ma Thuột troh Gia Nghĩa, dế hlo hên ngế rơhêng vâ ‘nâi plĕng dêi kuăn pơlê Tây Nguyên, tíu ki rơdêi ‘na pêi chiâk ƀă mơngế kal vâ rôe tơmeăm. Ngoh Nguyễn Phúc Lâm, ngế vê rơxế kân Gia Lai - Pơlê kong kân Hồ Chí Minh, tối:

“Pơla hdrối kố nah ai pơkâ thế troăng kân tơdrăng lĕm Pleiku – Dak Lak – Gia Nghĩa,  chiâng pêi pro a hlo ai pơxúa khât. Xua mâu tơmeăm pê lo tê mơdró châ chơ tiô troăng kân tơdrăng hlối tơ’lêi hlâu tâ rơxế kơtâu troăng kân ton, kơtâu tơniăn, kum rĕng tung cheăng kâ”.

Pôa Vũ Duy Hùng, ngế kuăn pơlê cheăm Gào, kong pơlê Gia Lai, phiu ro tơkôm troăng  kân tơdrăng châ po:

“A phiu ro khât. Má môi tơ’lêi hlâu tung prôk lăm, chôu kơtâu iâ tâ, tơmeăm pê lo ing chiâk deăng rĕng châ chơ tơbrê tâ. Kuăn pơlê bú púi vâ tiah mê, tơnêi têa mơnhông tơbrê kuăn pơlê xông tơtrê há”.

Tiô pâ thế dêi Khu tăng ‘nâi plĕng, troăng kân Pleiku – Buôn Ma Thuột – Gia Nghĩa cho môi pâ dêi troăng kân tơdrăng Peăng Kơnhŏng - peă Hdroh ‘na mâ hâi Lu. Troăng kân mê ki xŏn tâi tâng  dâng 258km, xâu ăm 4 toăng xê kơtâu tơluâ, tâi tâng kơxô̆ liăn ‘no  la hâi teăm tŭm dâng 77 rơpâu rơtal liăn. Tíu xiâm dêi troăng ko tơdjêp ƀă troăng kâ 18 a kơpong Bàu Cạn, tơkâ luâ kong pơlê Gia Lai, Dak Lak hdrối vâ tơdjêp tung kơpong Gia Nghĩa ƀă troăng kân Gia Nghĩa – Chơn Thành, kong pơlê Lâm Đồng.

Pôa Thái Đại Ngọc, Ngế cheăng tiô tíu xiâm Đảng, Kăn hnê ngăn Tỉnh ủi Gia Lai tối, troăng kân mê ôh ti xê to pro xiâm mơnhông cheăng kâ mê ối veăng mơdâk tơrŭm, tơniăn cheăng lêng  kring tơniăn Tây Nguyên.

“Tơkéa vâ tối troăng kân tơdrăng cho xiâm ki tơdjêp ƀă kơpong hlối pro xiâm dêi pái to kong pơlê, pơtối rak mâu tơmeăm pê lo ing chiâk deăng tiô troăng xúa kơmăi ki dâi lĕm. Kô tơrŭm krá nhên  ‘na cheăng lêng, kring tơniăn ƀă mâu kong têa ki tơdjuôm troăng tơkăng kong tiô troăng mơnhông tơbrê. Ƀă Gia Lai ai 56,7km,  pro tơdâng liăn ngân xo pêi cheăng rêm hơnăm ngin kô ro tơniăn”.

Nôkố, troăng kân tơdrăng Pleiku – Buôn Ma Thuột – Gia Nghĩa dế a rôh tăng ngăn, vâ pơkâ thế ‘no liăn mơjiâng pro. Mơhé kal ai hâi khế vâ tơbleăng, la kuăn pơlê ƀă mâu kăn dêi mâu cheăm kong pơlê kơpong Tây Nguyên dế tơngah rĕng châ pro troăng, vâ hlâu tung prôk lăm, chơ tơmeăm tê mơdró ƀă po rôh châ mơnhông ai pơxúa ăm kơpong.