Phŏ Kăn xiâm hnê ngăn Kuô̆k hô̆i, Thượng tướng Nguyễn Doãn Anh rơtế ƀă mâu kăn dêi mâu khu xiâm, kơvâ cheăng Tíu xiâm veăng leh a ilâng kiâ ‘mé mâu ngế hlâ ai hnoăng kong pơlê Dak Lak. Tiô Khu hnê mơhno ‘na lăm tăng, tơkŭm ƀă mơnhên inâi kơxêng kiâ mơngế hlâ a kong pơlê Dak Lak, kơ’nâi 7 khế tơkâ kong, tơkâ têa kroăng tung kong pơlê Mondulkiri, kong têa Kul, kăn ƀô̆, mâu lêng Đội K51 hiăng tăng chiâ, xo ƀă djâ vêh 27 kơxêng kiâ mố đô̆i hlâ djâ vêh a tơnêi têa.

Kố cho tơdroăng ki mâu kơxêng kiâ hâi teăm ‘nâi inâi. Đại tá Đinh Văn Hưng, Chính ủy Khi xiâm pơkuâ ngăn lêng kong pơlê Dak Lak ăm ‘nâi, tơdroăng kố cho ai hnoăng mơ-eăm kân dêi kăn ƀô̆, mâu lêng ki tơplâ dêi kong pơlê, malối Đô̆i K51 tung tơdroăng tơnêi tíu rơ-iô, tơdroăng ki vâ ‘nâi rế pá.