Pơchuât tơbleăng a rôh hôp, pôa Nguyễn Hữu Đông, Kăn hnê Pơkuâ Vi ƀan Tơdroăng cheăng mâu ăm ‘nâi, tung hneăng hơnăm pơla hdrối nah, Hô̆i đong hnê ngăn râ kong pơlê tung lâp tơnêi têa hiăng tơkŭm po 1.950 hneăng hôp. Tung mê, ai 1.281 hneăng hôp chuyên đề vâ teăm pơkâ tơleăng mâu tơdroăng ki trâm ‘na pơreăng tâ tú, liăn ngân, tơdroăng ki ‘no liăn pêi cheăng tơdjuôm ƀă séa ngăn tâi tâng mâu kơ koan cheăng tơnêi têa klêi kơ’nâi ‘mot tơkŭm tíu pêi cheăng. Hô̆i đong hnê ngăn mâu kong pơlê hiăng pơkâ kố 30.800 tơdroăng pơkâ, pro tíu ki troăng hơlâ pơkuâ ngăn ki kal ăm mơnhông ăm mơnhông cheăng kâ rêh ối pơlê pơla, rak vế tơniăn tŏng gum rêh ối ƀă gum kuăn pơlê a kong pơlê.

Tung lâp tơnêi têa hiăng tơkŭm po lối 4.000 khu lăm ngăn, tơmâng xo lối 36.000 rơkong tơpui, pâ thế dêi kuăn pơlê ƀă mâu tơdroăng kal châ tŏng gum pơkâ tơleăng châ lối 86%. Tơdroăng cheăng tiâ mơnhên rế hía rế ai pơxúa, tơkŭm pêi pro nhên hnoăng cheăng dêi mâu kơ koan ƀă dêi ngế krê ai tơdjâk. Pôa Nguyễn Hữu Đông, Kăn pơkuâ Vi ƀan Tơdroăng cheăng mâu kăn tối rơdêi:

“Tơdroăng cheăng dêi Hô̆i đong hnê ngăn kuăn pơlê rêm râ rế hía rế tơniăn krê, ai pơxúa, rơkê ƀă tơƀrê tâ, ai hên tơdroăng ki pơhlêh nếo tung tuăn mơno tơmiât ƀă tung tơdroăng pêi pro ki khât. Ing mê, pơtối tối rơdêi tíu ối, hnoăng cheăng dêi kơ koan ai hnoăng pơkuâ kân tơnêi têa a kong pơlê tung khu pơkuâ cheăng kal kí”.

Tối nhên hnoăng cheăng séa ngăn hnoăng pơkuâ dêi Hô̆i đong hnê ngăn kuăn pơlê, pôa Đồng Văn Thanh, Phŏ Ƀĭ thư Thường trưk pơlê kong kân, Kăn hnê ngăn Hô̆i đong hnê kuăn Pơlê kong kân Cần Thơ tối tiah kố, tâng hnoăng pơkuâ ‘na mâu hlá mơ-éa liăn ngân ôh tá kâi hbrâ mơdât krá tơniăn kô tơ’lêi tơdjâk troh pro pơxúa ing hnoăng pơkuâ, ví mâu tơdroăng cheăng pôu râng lơ kơdroh ki tơƀrê tung tơdroăng cheăng pêi ki khât. Xua mê, Hô̆i đong hnê ngăn pơlê kong kân hiăng tơbleăng hên troăng hơlâ tơdâng tơ’mô ing mâu tơdroăng pơkâ séa ngăn, xoăng râ, xoăng hnoăng pơkuâ ƀă trâm mâ kuăn pơlê.

“Ki khât gá tơdroăng cheăng ăm hlo, ai mâu Tôh mâu kăn ƀă mâu kăn ki lăm séa ngăn tơmâng xo mâu rơkong tơpui tối, pâ thế dêi kuăn pơlê klêi kơ’nâi rôh trâm mâ ƀă tối tơbleăng ăm kơ koan ki ai tơdjâk mê cheăng khŏm pơkâ tơleăng rĕng, klêi, kuăn pơlê tối hâk vâ khât ƀă tơdroăng ki tơmâng ngăn dêi kăn pơkuâ rêm râ. Xua mê, mâu rơkong tơpui tối tơxâng dêi kuăn pơlê xuân cho môi tíu ki mơdât hnoăng pơkuâ, ki kal châ séa ngăn, pơkâ pêi kơtăng tơdroăng tŏng gum teăm tơdrêng, vâ veăng gum mơdêk ki tơƀrê, xêt pơkuâ ngăn tơnêi têa ƀă ‘mâi mơnhông dêi tơdroăng loi tơngah tung Kuăn pơlê a kăn pơkuâ kong pơlê”.

A rôh hôp, jâ Phạm Thị Thanh Trà, Phŏ Ngế pro xiâm hnê ngăn Chin phuh mơ’no 5 khu troăng hơlâ ki kal vâ mơdêk ki tơƀrê tung tơdroăng cheăng dêi Hô̆i đong hnê ngăn kuăn pơlê pơla hơnăm 2026 - 2031. Tung pơla mê, tối nhên pơhlêh nếo túa pơkuâ ngăn tiô troăng xo kuăn pơlê ƀă khu mơdró kâ pro ngế ki kal; mơdêk rơdêi klâ xoăng râ, xoăng hnoăng pơkuâ tro ƀă séa ngăn hnoăng pơkuâ; thăm mơdêk xúa kong ngê̆ kơxô̆, pơkuâ ngăn ƀă tíu ki chêh ‘măn tơdroăng kal ƀă AI; pơhlêh chêh pro hlá mơ-éa; mơdêk ivá pơkuâ séa ngăn tung cheăng tung la ngiâ ƀă tối tơbleăng mâu tơdroăng ki ôh tá mơhúa tung mơnhông.

“Tơdroăng cheăng séa ngăn dêi Hô̆i đong hnê ngăn athế pơhlêh mơdêi sap ing séa ngăn nhên tơdroăng cheăng chiâng tơdroăng séa ngăn tơdroăng cheăng tung la ngiâ mơnhông; pơhlêh sap ing séa mơnhên ngăn pơkâ chiâng séa ngăn troh ki má mơ’nui, prôk trâu rơdâ tung mâu kơvâ cheăng ki kô trâm hên ‘na mâu tơdroăng ôh tá mơhúa môi tiah ‘no liăn pêi cheăng tơdjuôm, tơnêi tơníu, túa pơkâ, pơhlêh tơdroăng cheăng. Tơdroăng ki kal má môi cho thăm mơdêk ivá rĕng tối tơbleăng, rĕng châ hlo, rĕng tŏng gum tơleăng mâu tơdroăng ki ôh tá mơhúa sap ing kong pơlê”.

Tơpui mơgêi rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tung pơla tơdroăng cheăng pơhlêh nếo, Hô̆i đong hnê ngăn kuăn pơlê rêm râ kal pơtối pơhlêh nếo mơdêi tâ nếo vâ pêi châ tiô tơdroăng púi rơhêng vâ mơnhông dêi tơnêi têa. Tơdroăng cheăng dêi Hô̆i đong hnê ngăn kong pơlê athế séa ngăn kơtăng mâu troăng hơlâ pơkâ dêi Đảng, mơdêk ki tơniăn krê, thăm mơnhông hbrâ mơdât kâ kơluâ, pro mơhrê liăn ngân ƀă xo tơdroăng ki hâk vâ hơniâp ro dêi kuăn pơlê, khu mơdró kâ pro kế ki vê.

“Hô̆i đong hnê ngăn rêm râ thăm mơdêk tơdroăng ki pơkuâ dêi Đảng ƀă mâu khu tơrŭm ƀă tơdroăng cheăng dêi Hô̆i đong hnê ngăn, kố cho mâu tơdroăng pơkâ ki kal. Tơdroăng cheăng dêi Hô̆i đong hnê ngăn bu châ tơƀrê drêng pêi pro tiô mâu troăng hơlâ pơkâ dêi Đảng, ivá khŏm mơ-eăm ‘na tơdroăng cheăng kal kí dêi Đảng chiâng troăng hơlâ, tơdroăng tŏng gum dêi kăn pơkuâ kong pơlê. Pơtối pơkâ pêi kơtăng trâu hngế ƀă tơbleăng pêi tơƀrê troăng hơlâ pơkâ dêi Đảng ‘na mơjiâng Đảng, mơjiâng Tơnêi têa luât pơkuâ pơkuâ xah hô̆i chuh ngiah, pơhlêh nếo khu tơrŭm kăn pơkuâ kong pơlê ƀă mơnhông tơniăn krê xah hô̆i chuh ngiah. Hbrâ mơdât kâ kơkuâ, pro mơhrê liăn ngân. Tơdroăng ki kuăn pơlê, khu mơdró kâ hâk vâ cho kế ki vê ‘na tơdroăng cheăng dêi Hô̆i đong hnê ngăn kuăn pơlê”.