Nôkố vâi hdrêng rĕng xúa Internet ƀă măng xah hô̆i. Cheăng hriâm tâp, xah, tơrŭm dêi pó ing hyôh internet pro mâu vâi o chiâng mơđah tơbleăng dêi um, tíu ối, hngêi trung hriâm lơ hên tơdroăng kal ki ê dêi ngế krê ki tá hâi hlê plĕng tŭm mâu tơdroăng ki ôh tá mơhúa. Ki tôu tuăn ngế hdrêng mê chiâng ngế ki tro vâi hêak pơloi, pro ‘mêi troh tơdroăng cheăng krê dêi ngế, lơ tro tí tăng xo mâu tơdroăng ki kal krê vâ xúa ăm tơdroăng pro ‘mêi. Ôh tá xê to vâi hdrêng, hên nôu pâ xuân hmâ tơbleăng mơ’no dêi um, video ƀă tơdroăng kal krê ‘na kuăn tơná tung măng xah hô̆i mê tá hâi hlê tâi ki ôh tá tơniăn dêi mơđah tơbleăng mâu um video tiah mê.

Sap ing môi kơtâ um lơ xâp ếo pơtâk, ngế ki ê chiâng ‘nâi inâi hngêi trung, kơpong rêh ối lơ tơdroăng ki prôk lăm dêi ngế hdrêng. Tiô mâu khu ki rơkê gâk kring măng, mâu tíu chêh ‘măn ‘noăng chư chêh môi tiah ki ôh tá tro klâi kố mê gá kô tro vâi pro pơxúa ăm dêi tơná tâng khu ‘mêi châ xo mâu um video.

Xua tiah mê, pơkâ ‘na rak vế tíu ‘măn ‘noăng chư chêh krê dêi vâi hdrêng tung Luât Rak vế ‘noăng chư chêh krê ai tơdjâk rơdâ ƀă mâu khu tơrŭm, khu mơdró kâ kal tơtrŏng tung pơla pêi pro. Luât sư Nguyễn Đức Long - ngế ki châ mơnhên Chưng chih kong têa ê ‘na rak pơkí ƀă hnoăng krê tíu ‘măn ‘noăng chư chêh, tối nhên:

“Drêng vâi hdrêng sap ing 7 hơnăm ngi klêng kal tơdroăng ki môi tuăn dêi vâi hdrêng rơtế ƀă ngế ki teăng mâ drêng tơbleăng, tối ‘na tơdroăng krê ‘na rêh ối krê, ki pơkí dêi ngế krê mê tơdroăng ki gá cho rơdâ. Môi tiah chơ kơjôi inâi, hơnăm, um, tíu ối dêi ngế hdrêng ƀă hên ki ê hía xuân châ ngăn cho tơdroăng ki kal ‘na rêh ối krê. Kĭ tơkêa ƀaoh hiêm mê ngế ki pơxúa mê lơ ngế ki châ ƀaoh hiêm cho vâi hdrêng ‘lo, pin ‘măn tơdroăng mê ‘na tơdroăng rêh ối krê, pơkí tơdroăng dêi ngế krê, mê rêm ngế athế ngăn nhên vâ ví pro xôi”.

Tiô Troăng 24 dêi Luât Rak vế tíu ‘măn ‘noăng chư chêh dêi ngế krê, tơdroăng chêh ‘măn tơdroăng krê dêi ngế hdrêng athế tơniăn pơkâ châ ki pơxúa dêi ngế hdrêng cho ki xiâm. Ƀă vâi hdrêng sap hiăng klăng 7 hơnăm, drêng chêh ‘măn ‘noăng chư chêh tơdjâk troh rêh ối lơ pơkí ‘na mâu tơdroăng ki ngế krê, athế ai tơdroăng ki môi tuăn dêi tá ngế hdrêng ƀă nôu pâ lơ ngế ki teăng mâ tro luât. Tơdroăng kố môi tiah ƀă tơdroăng ki mâu khu tơrŭm, khu mơdró kâ lơ tung mâu kong ngê̆ ôh tá chiâng tơbleăng tối ‘na ngế hdrêng tiô túa ki hmâng to lơ vâ môi tiah hdrối nah. Pơkâ nếo xuân ăm hlo luât tơmiât troh tơdroăng rak vế vâi hdrêng, nhuô̆m tơdroăng krê ƀă rơkong tơpui dêi vâi hdrêng tung măng pơlê pơla.

Pakĭng mê, Luât Rak vế tíu ‘măn ‘noăng chư chêh krê xuân pơkâ thế xơpá tâ ƀă khu mơdró kâ tung tơdroăng mơjiâng troăng hơlâ rak vế pơkí, mơdât xuân môi tiah xut tah, ki vâ ‘nâi ngiâ méa dêi ngế krê. Pôa Phạm Hoàng Lâm Ngế ki rơkê kong têa ê ‘na pơkuâ ngăn tơdroăng kal, ăm ‘nâi:

“Luât pơkâ tiah kố, tíu ‘măn ‘noăng chư chêh dêi ngế krê klêi kơ’nâi châ xut tah ki vâ kơnó kô ôh tá châ ngăn cho tíu ‘măn ‘noăng chư chêh dêi ngế krê ƀă xua mê ôh tá ối tung tơdroăng ki ‘mêng rơnêu dêi Luât kố. Tiô Luât, xut ki vâ kơnó tơkêa vâ tối cho tung pơla pơhlêh, xut tơdroăng ki chêh tơdroăng kal vâ pro ai tíu ‘măn ‘noăng chư chêh nếo sap ing mê ôh tá chiâng mơnhên xếo lơ tơrŭm troh môi ngế krê ki lâi. Klêi kơ’nâi séa ngăn nhên mâu tơdroăng pơkâ dêi Luât Rak vế tíu chêh ‘măn ‘noăng chư chêh dêi ngế krê 2025 ƀă Troăng 14 tơdjâk troh xut, tah lôi ki vâ kơnó, tiô tơmiât dêi pin mê Luât kố gá vâ tơmiât pêi troh pơkâ pơkí inâi tíu ‘măn rak ‘noăng chư chêh, teăng ăm bu xut tah ki vâ kơnó”.

Ƀă tíu chêh ‘măn ‘noăng chư chêh dêi vâi hdrêng, mâu ngế ki kal châ rak vế malối –cheăng rak vế tíu ‘măn rak ‘noăng chư chêh ki châ pơkí inâi tơniăn rế chiâng rế kal, vâ kơdroh iâ ki châ mot lơ tro vâi tăng xo ôh tá tro luât tung măn pơlê pơla. Mâu tơdroăng ki nếo kố ăm hlo Luât Rak vế tíu chêh ‘măn ‘noăng chư chêh dêi ngế krê dế rế hía rế châ tiô pơkâ lâp plâi tơnêi ‘na rak vế tíu chêh ‘măn ‘noăng chư chêh dêi ngế krê dêi rêm ngế, tung mê kơjo ăm tơdroăng tơmâng ngăn khât kơ vâi hdrêng.