Tơdroăng xiâm tơbleăng a rôh hôp ai xêt khât sap ing hâi lơ 5/6/2026, ƀă hên troăng pơkâ pêi tŏng gum nếo, tơmiât troh gâk kring tơmeăm kơnía ki păng ‘nâng ƀă krá tơniăn tâ. Tơdroăng xiâm tơbleăng a rôh hôp tơkŭm a 5 khu tơdroăng ki xiâm mê cho tŏng gum hnê, vêh po tíu khôi túa lĕm tro chêng koăng, tŏng gum tơdroăng pêi cheăng kâu lăk ƀô̆, rơnêu hngêi trá xŏn ƀă tíu pơlê pơla ƀă ôm hyô, tơdrêng amê pêi pro rơdêi pơhlêh xúa kŏng ngê̆ vâ rak ‘noăng chư chêh khôi túa lĕm tro.

Tiô tơdroăng xiâm tơbleăng a rôh hôp, Dak Lak kô tŏng gum ki vâ hên 80.000 liăn/môi/hâi liăn kâ ƀă liăn prôk lăm ăm ngế hriâm veăng lâm hnê tôu chêng koăng a pơlê pơla; tŏng gum hâi pêi cheăng ki hên 300.000 liăn/môi ngế/hâi drêng veăng tơdroăng cheăng vêh pro; 200.000 liăn/hâi ƀă mâu ngế ki veăng riân, ‘noăng chư chêh, mơđah tơbleăng thâu, xup um.

Kong pơlê tŏng gum 5 rơtuh liăn/kâu lăk ƀô̆/hơnăm, tơdrêng amê xing xoăng kơxô̆ liăn rôe chêng koăng, ếo pơtâk ƀă kơmăi thâu. Mâu kâu lăk ƀô̆ khôi túa lĕm tro châ xúa troăng hơlâ thế ai ki vâ iâ 10 ngế ƀă hôp tiah hmâ ki vâ iâ 1 xôh/khế. Hlối rak vế khôi túa lĕm tro ‘na chêng koăng ƀă mơnhông ôm hyô pơlê pơla, kong pơlê Dak Lak tiô tối hdrối rah ki vâ iâ 1 pơlê ki má môi a mâu cheăm, bêng hiăng ai pơkâ pêi vâ mơjiâng tíu tơmâng ngăn tôu chêng koăng, gum mơjiâng cheăng pêi ăm kuăn pơlê hdroâng kuăn ngo a tung pơlê.