Kơxo má, hngêi mơhno túa lĕm tro Tôh kơphô̆ Cao Thắng, bêng Ea Kao hiăng hên kơdrâm kuăn pơlê troh lăm pro hlá mơ-éa ‘na tơnêi tơníu, hô̆ tĭch, mơnhên tíu rêh ối. Ôh tá xếo tơdroăng ki kuăn pơlê athế lăm troh hên tíu, tơkôm hên hâi môi tiah hdrối nah, kăn ƀô̆ bêng djâ tá khu ki “môi tíu” lăm troh a kơpong kuăn pơlê rêh ối vâ ăm kuăn pơlê chêh pro hlá mơ-éa.

Pôa Lương Đình Trường, ngế ki ối a Tôh kơphô̆ Cao Thắng ăm ‘nâi, hên hơnăm kố vâi krâ kuăn pơlê lăm kơ koan chêh pro mơ-éa gá rế hngế, rế ôh tá ‘nâi kơ-êng kơbố. Nôkố kăn ƀô̆ lăm troh a tíu kuăn pơlê ối hnê tơrêm tơdroăng mê bô bố xuân phiu ro.

“Vâi krâ nhŏng o phiu ro, vâi troh hên kơdrâm vâ chêh pro mâu hlá mơ-éa. Kăn ƀô̆ achê kuăn pơlê, tơpui leăng hnê nhên ăm kuăn pơlê, tơdroăng kố gá tro ƀă troăng hơlâ pơkâ dêi Đảng ƀă dêi Tơnêi têa”.

Tiô jâ Đỗ Thị Nguyệt, Phŏ pơkuâ Tíu pêi cheăng Phục vụ Hành chính công bêng Ea Kao, bu a kơxo má apoăng tơbleăng pêi a kơpong kuăn pơlê ối hiăng ai 170 ngế troh pro hlá mơ-éa, tơkâ luâ hngế ƀă tơdroăng tơmiât apoăng.

“Ƀă măng tĭng pêi cheăng rơkê lăm pro mơ-éa mê pơkâ pêi dêi Vi ƀan hnê ngăn bêng cho mơ-eăm pêi pro klêi tung pơla 7 hâi ƀă mâu hồ sơ ki tơ’lêi hlâu mê kô pro klêi ƀă mơdrếo tung hâi hlối”.

Klêi kơ’nâi 1 hơnăm xúa túa pêi cheăng kăn pơkuâ kong pơlê péa 2, a Ea Kao, tơdroăng kuăn pơlê hlo nhên má môi ôh tá xê mơ-éa rĕng pro klêi tâ mê ối cho kăn pơkuâ achê kuăn pơlê, hbrâ rơnáu ăm kuăn pơlê tâ.

Prôk a troăng ƀêng xŏn 600 met ki nếo pro klêi a Tôh kơphô̆ 5, pôa Dương Lê Sơn ôh tá kâi kơtoâ dêi tơdroăng ro. Tung plâ lối 5 hơnăm, troăng ki kố xuân ối cho troăng tơnêi. Hên rôh hôp kuăn pơlê mơhnhôk po rơdâ pro troăng pơrá ôh tá châ môi tuăn. La bu klêi kơ’nâi to lâi khế xúa kăn pơkuâ kong pơlê nếo, kuăn pơlê hiăng môi tuăn pleăng vâ chê 200 met karê tơnêi ƀă veăng tưlo vâ chê 200 rơtuh liăn vâ pro troăng.

“Kăn pơkuâ 2 râ mê kơhnâ ƀă pêi cheăng rơkê tâ, gum vâi krâ kuăn pơlê tung mơnhông cheăng kâ xuân môi tiah pro troăng prôk lăm. Tâi tâng kuăn pơlê tơrŭm, tâi tâng rêm ngế tơdjuôm ivá hiâm mơno veăng pro troăng prôk gá tro ƀă vâi krâ nhŏng o pêi pro môi tuăn khât”.

Sap ing mâu tơdroăng ki lĕm môi tiah mê, bêng Ea Cao tơbleăng tơdroăng “Cheăng tơnêi têa, cheăng pơlê, tơnêi mêa xuân pleăng” vâ po rơdâ troăng prôk, ‘mêng pro kơphô̆ ƀă mơjiâng pro ôm hyô. Pêi pro troăng hơlâ pơkâ kố, hên rơpŏng kuăn pơlê rơtế ƀă hngêi chuô Phổ Hiền hiăng pleăng tơnêi po rơdâ pro troăng a kĭng long Ea Kao, mơjiâng pro kơphô̆ prôk chêng ăm kuăn pơlê prôk. Thươ̆ng toă Thích Phước Huyền, ƀok phop ki pơkuâ hngêi chuô Phổ Hiền tối tiah kố, cheăng pleăng tơnêi ôh tá xê vâ po troăng mê ối po tơnêi tơníu tíu prôk lăm nếo ăm kuăn pơlê.

“Vâ châ pro môi kơphô̆ prôk chêng môi tiah mê gá tro khât ăm tơdroăng ki pơtâp ivá ăm mâu pôa krâ, jâ krâ ki tiô khôp phop. Á ối a hngêi chuô Phổ Hiền phiu ro khât vâ ăm troăng prôk chêng kố châ pro klêi tơniăn lĕm hdrối hơnăm 2030”.

Ôh tá xê to troăng prôk châ pơhlêh, mơjiâng tơdroăng gâk kring tơniăn a pơlê cheăm xuân pơhlêh hlo nhên. Ngoh Hồ Hậu, ngế ki pơkuâ môi homestay a bêng Ea Kao ăm ‘nâi, hên tơdroăng cheăng châ khu kŏng an pơkâ tơleăng rĕng kơnôm ối a chê kuăn pơlê.

“Gâk kring tơniăn tâ hdrối; pơtih á ai môi homestay a troăng Nguyễn Trường Tộ, a kơxê ki mê tro vâi tong tơmeăm po ngăn camera pơtroh ăm kŏng an. Kơxo hâi kơ’nâi á lăm a kŏng an pêi cheăng mê Ngế pơkuâ Kŏng an ăm ‘nâi hiăng rup ngế tong mê”.

Klêi kơ’nâi tơmot tơkŭm, bêng Ea Kao hiăng tơleăng lối 2.000 hồ sơ mơ-éa ƀă tơdroăng ki chêh pro tơleăng tro ƀă hdrối tâ hâi pơkâ châ tâi tâng; hồ sơ pơtroh ing troăng hyôh internet châ vâ chê 99%; kơlo ki pro ăm kuăn pơlê ƀă khu mơdró kâ hâk ro châ hên. Hên pơkâ ‘na cheăng kâ rêh ối pơlê pơla pro klêi tơkâ luâ túa pơcháu, tung mê nâp liăn ngân châ lối 107% túa kong pơlê pơcháu.

Pôa Đặng Gia Duẩn, Kăn pơkuâ hnê ngăn Đảng ủi bêng Ea Kao tối tiah kố, tơdroăng ki kân má môi klêi kơ’nâi 1 hơnăm xúa túa pêi cheăng nếo cho pro châ tơdroăng môi tuăn tung kuăn pơlê ƀă tơdroăng môi tuăn khât tung mâu kăn ƀô̆.

“Tơdroăng ki kân má môi mê ngin hiăng pêi pro châ tơdroăng ki môi tuăn tung kuăn pơlê, môi tuăn mơno dêi mâu kăn ƀô̆ tung plâ hneăng hơnăm 2025-2030. Ngin xuân hiăng pơkâ mơdêk tơƀrê khât ‘na túa ki chêh pro hlá mơ-éa ƀă pơhlêh kơxô̆, ‘na ôm hyô tro ƀă tê mơdró ƀă túa pơkâ. Tung la ngiâ ah pakĭng tơdroăng pêi pro mâu pơkâ pêi cheăng tung la ngiâ ngin kô tơkŭm hên tâ tung tơdroăng cheăng mơnhông tâ péa kơxô̆”.

Môi hơnăm tá hâi cho hơnăm ki ton, la sap ing mâu troăng prôk châ po rơdâ, mâu hồ sơ châ chêh pro tơleăng klêi a kơpong kuăn pơlê ối troh tơdroăng ki hbrâ rơnáu dêi kăn pơkuâ cheăng bêng túa pêi kăn pơkuâ kong pơlê 2 râ a Ea Kao dế ăm hlo pơhlêh nhên dêi môi tơdroăng cheăng achê kuăn pơlê, hmâ ƀă kuăn pơlê ƀă gum kuăn pơlê chêh pro mâu hlá mơ-éa ai pơxúa tâ.