Kơxê lơ 28/5, a Hngêi Kuô̆k hô̆i Hô̆i đong hnê ngăn ‘na hdrông Kuăn ngo dêi Kuô̆k hô̆i tơkŭm po Leh tơbâ 65 hơnăm mơjiâng ƀă tơdah Mê dái Pêi cheăng ối má Môi. Pôa Trần Thanh Mẫn, Kăn xiâm hnê ngăn Kuô̆k hô̆i veăng ƀă xông tơpui hnê mơhno. Hluâ 65 hơnăm pêi cheăng, Hô̆i đong ngăn ‘na Hdrông Kuăn ngo hiăng ai veăng gum kal khât tung tơdroăng mơjiâng luât, séa ngăn ƀă pơkâ mâu tơdroăng ki kân dêi tơnêi têa; veăng mơnhên séa ngăn, veăng tơpui ăm hrĭng tơdroăng tơkêa bro, gum kêi đeăng troăng hơlâ ƀă kuăn pơlê hdrông kuăn ngo, kong ngo, kơpong hơngế, hơngo.

Pôa Trần Thanh Mẫn, Kăn xiâm hnê ngăn Kuô̆k hô̆i tối mơnhên, kheăn kơdeăn mâu tơdroăng mơ-eăm, pleăng dêi mâu rơxông kăn ƀô̆ Hô̆i đong Hdrông mơngế. Tung la ngiâ, Kăn xiâm hnê ngăn Kuô̆k hô̆i pơkâ thế Hô̆i đong Hdrông Kuăn ngo mơdêk ki rơkê hriăn plĕng, tối hdrối troăng hơlâ; tơniăn mơnhông ƀă tơdâng tơ’mô, rak khôi túa lĕm tro ƀă pro krá khu tơrŭm môi tuăn tâi tâng hdrông kuăn ngo. Tơdrêng amê, mâu troăng hơlâ ăm kuăn pơlê thế inhên, achê tơdroăng nôkố, tơxâng tơdroăng kal vâ dêi kuăn pơlê.