Kong pơlê Dak Lak ai hên tơdroăng ki tơ’lêi hlâu ki má môi môi tiah tíu ối “tíu pêt pêt kơphế hên má môi” dêi Việt Nam, tơmiât troh tíu xiâm kơphế dêi lâp plâi tơnêi. Dak Lak cho tíu tơkoh pơla mâu hâng lông cheăng kâ Peăng kơnhŏng – Peăng hdroh ƀă Peăng mâ hâi Lo – Peăng mâ hâi luô; ai tơmeăm mơnhông logistics, cheăng kâ têa kơxĭ, kơmăi kơmok uâ mơdiê trâu, on tơhrik ing mâ hâi, khía, têa ƀă cheăng kâ pêi chiâk deăng. Kố xuân cho xiâm rêi vâ kong pơlê mơnhên pơkâ tơtêk GRDP tơdâng lối 11%/hơnăm tung hneăng hơnăm 2026 – 2030.

Pơkâ pêi rơnêu nếo rôh kố mơnhên troăng pêi mơnhông “3 kơpong – 3 hâng lông tơdjêp krá, xúa tâi tâng ki tơ’lêi hlâu tung kơpong. Tơdrêng amê, kong pơlê tơkŭm a pái tơdroăng châ tơƀrê hluâ pơkâ ton xŏn mê cho khoa hok kŏng ngê̆ ƀă pơhlêh xúa kŏng ngê̆; mơngế pêi cheăng ƀă troăng pơkâ pêi; tơdjêp hngêi trăng troăng klông rơxông nếo.

Tơpui tơno a hneăng hôp, jâ Đào Bảo Minh, Kăn pơkuâ hnê ngăn Đảng ủi, Kăn hnê ngăn Hô̆i đong kuăn pơlê bêng Tuy Hòa tối ăm ‘nâi, tơdroăng mơjiâng pơkâ pêi châ mâu pơlê séa ngăn inhên vâ tơniăn mơjiâng ‘’môi tíu pơkâ pêi tơdjuôm’’, mơnhông tâi tơmeăm ki ai hlâu dêi rêm pơlê.

“Rêm pơlê tiô tơdroăng nôkố drêng pơkâ pêi ngin hiăng hriăn plĕng ƀă pói vâ, tối hdrối tơdroăng mơnhông tung la ngiâ ƀă ngin hiăng tối ‘na tuăn ihiâm mơno kố tung pơkâ pêi. Drêng pơkâ pêi châ kĭ mê pro ivá vâ ngin tiô a pơkâ pêi mê, ngin ai tơdroăng ki mơ’no liăn ƀă tơdroăng mơnhông mơdêk. Mơ’no ing peăng Tơnêi têa, ing peăng kong pơlê ƀă tá tơdroăng mơ-eăm dêi kong pơlê”.

Tung pơkâ pêi hiăng mơnhên inhên pơkâ pêi ki xiâm mơnhông ôm hyô chiâng môi tung mâu kơvâ cheăng ki xiâm dêi kong pơlê Dak Lak. Xua mê, tung tơdroăng pro pơkâ pêi, Khu pơkuâ ‘na khôi túa lĕm tro, Tơ’noăng ivá hiăng tơrŭm krá ƀă mâu tíu cheăng hnê mơhno, tung mê ki rơhêng vâ tối tơtrŏng troăng pêi mơnhên la ngiâ pơkâ pêi mâu kơpong ôm hyô dêi kong pơlê.

Pôa Trần Hồng Tiến, Kăn pơkuâ Khu pơkuâ ‘na khôi túa lĕm tro, Tơ’noăng ƀă Ôm hyô kong pơlê Dak Lak tối ăm ‘nâi, hên tíu ôm hyô ki xiâm châ mơjiâng inhên, ing kơpong ôm hyô tơnêi têa ving Xuân Đài, kơpong kân rơdâ Xuân Hoà troh kơdrum tơnêi têa Yok Đôn, long têa Lăk, mâu kơpong ôm hyô ngăn loăng pơlái kong kế, ôm hyô pơlê pơla, ôm hyô ngăn chiâk deăng ƀă pơlê pêi cheăng tiô khôi vâi krâ.

“Klêi kơ’nâi châ Ngế pro xiâm hnê ngăn tơnêi têa kĭ pơkâ pêi dêi kong pơlê, ngin pơtối tơbleăng djâ tung mâu tơdroăng tơkêa bro, tơdroăng tơkêa bro mơnhông ôm hyô ƀă pêi pro mâu pơkâ pêi tro tiô troăng prôk”.

Tiô pôa Đỗ Thái Phong, Phŏ Kăn hnê ngăn Hô̆i đong kong pơlê Dak Lak, tíu ki má môi dêi rôh rơnêu nếo pơkâ kố cho mơjiâng môi tíu mơnhông kân ƀă tơdroăng ki tơdjêp kơpong inhên pơla peăng mâ hâi Lo ƀă peăng mâ hâi Luô. Tung mê, peăng mâ hâi Lo kô kơjo mơnhông kơmăi kơmok, cheăng kâ têa kơxĭ ƀă ôm hyô têa kơxĭ; ƀă peăng mâ hâi Luô tơkŭm tung pêi chiâk deăng kơmăi kơmok kŏng ngê̆ rơxông nếo, uâ bro trâu hơngế, on tơhrik ki pro ing mâ hâi, khía, têa. Kố kô cho péa tơdroăng ki xiâm tơ’nôm dêi pó vâ mơjiâng tơdroăng ki kơnâ cheăng kâ nếo dêi Dak Lak.

“Rơnêu nếo pơkâ pêi rôh kố cho xiâm rêi tiô luât ƀă tơdroăng ki pêi ki apoăng ki kal. Rêm troăng prôk la ngiâ mơnhông cheăng kâ – rêh ối pơlê pơla, gâk kring tơnêi têa – kring tơniăn dêi kong pơlê tung la ngiâ thế tiô pơkâ pêi dêi kong pơlê”.

Tiô riân tung pơkâ pêi, sap ing kố troh hơnăm 2030, Dak Lak kal mơhnhôk dâng 676.000 rơtal liăn mơ’no cheăng lâp pơlê pơla vâ pêi pro mâu tơdroăng tơkêa bro ki xiâm vâ mơnhông ‘na troăng klông, hngêi trăng, kơmăi kơmok logistics, kơno têa kơxĭ, tơraih tơƀai, kơpong hngêi kơmăi kơmok, kơpong cheăng kâ ƀă mâu tíu xiâm mơdró kân. Kô xuân cho hneăng kong pơlê Dak Lak tơkŭm tơpui ƀă pêi pro mâu “tíu ki kreăng” ‘na hngêi trăng, troăng klông, tơdjêp kơpong ƀă tíu mơnhông mơdêk vâ pro xiâm rêi ăm tơtêk ton xŏn.

Pơkâ pêi rơnêu nếo kong pơlê Dak Lak ôh tá xê po tíu mơnhông nếo, mê ối mơhno tơdroăng ki vâ xông mơ-eăm rơdêi dêi kong pơlê tung hneăng mơnhông mơdêk nếo. Ƀă troăng tơmiât la ngiâ ton xŏn, tuăn tơmiêt pơhlêh nếo ƀă khŏm mơ-eăm pêi, Dak Lak dế mơjiâng xiâm rêi krá tơniăn vâ rơtế lâp tơnêi têa mot tung chal xông mơ-eăm xêh dêi hdroâng mơngế.