Tơdrêng amê rơnêu i lĕm tơnêi vâ ăm mâu tơdroăng rêh ối pơlê pơla tơtro ƀă khôi túa lĕm tro dêi rêm pơlê cheăm. Tiô troăng hơlâ nếo, kong pơlê Gia Lai kô tŏng gum tơdrêng môi xôh ƀă kuăn pơlê hdroâng kuăn ngo ối tung rơpŏng kơtiê, rơpŏng vâ chê kơtiê ai tơdroăng kal vâ tơnêi ối ƀă tơnêi pêt mơjiâng tơmeăm. Ƀă tơnêi ối, mâu ngế ki tá hâi ai tơnêi lơ ôh tá bê tơnêi kô châ mơnhên pơcháu tơnêi lơ ăm phêp pơhlêh xúa tơnêi tung tơdroăng tiô pơkâ.

‘Na tơnêi pêt mơjiâng tơmeăm pêi lo ing chiâk deăng, mâu rơpŏng ai ƀăng deăng pêt pá kơdâm 50% pơkâ châ ngăn kô séa ngăn tơ’nôm tơnêi pêi chiâk deăng ôh tá xo liăn xúa tơnêi. Tơdroăng pơkâ rôh kô gum môi tuăn troăng hơlâ tung lâp kong pơlê, tơdrêng amê gum tah lôi pá puât ‘na tơnêi tơníu, pro tơ’lêi hlâu vâ kuăn pơlê hmiân tuăn rêh ối, mơnhông cheăng kâ, pêi pro châ tơƀrê pơkâ kơdroh kơtiê krá tơniăn.