Tiô tối tơbleăng tơdroăng tơkêa bro, Dak Lak pro ăm mơnhông ôm hyô tiô troăng lĕm krúa, krá kak, rơtế ƀă pơtối rak ki kơnía túa lĕm tro kong pơlê, tơmeăm khoăng nhâ loăng kong kế ƀă mơjiâng tơmeăm tíu ôm hyô ki krê dêi kơpong Tây Nguyên. Mâu tơmeăm ki xiâm châ mơnhên cho ôm hyô ngăn nhâ loăng kong kế, tíu pơtê ối, ngăn túa lĕm tro kuăn pơlê, ôm hyô ngăn chiâk deăng, ôm hyô kơphế, ôm hyô ngăn rui hmâ ƀă ôm hyô rơtế bă ngăn vâi tŏn chêng koăng Tây Nguyên.

A rôh hôp, tơpui tơno, hên mâu kăn tối Dak Lak ai hên tơmeăm khoăng vâ mơnhông ôm hyô kơnôm ing nhâ loăng kong kế, xí têa, long ki ai xêh rơtế ƀă túa lĕm tro vêa vong krê dêi Tây Nguyên. La, kong pơlê thế séa ngăn nhên mâu tơdroăng ki lâi dế ai thế mơnhông tơbrê tâ; ki ahdrối cho mâu tơmeăm ki krê tơviah xêh. Pôa Phan Bửu Toàn, Phŏ Kăn hnê ngăn Khu ôm hyô Pơlê kong kân Hồ Chí Minh tối.

“Á tơmiât ki ahdrối cho Dak Lak thế tăng ngăn nếo mâu tơmeăm ki lâi hiăng ai ƀă dế ai kơlo ki lâi, mơ-eăm mơjiâng ƀă pê klêi mơdêk tơmeăm pê lo mê vâ ngin rak tơdroăng ki mê. Pơtih, tối troh kơphế mê vâi tối troh Dak Lak, tơmeăm kơphế mê ôh tá xê hlâu môi tiah mê, mê cho môi túa rêh ối ‘na kơphế, cho môi tơdroăng ki vâ hlo vâ ‘nâi túa rêh ối kơphế, drêng mê gá chiâng tơmeăm ki kơnâ tâ. Tâng pin ôh tá ai ki phá tơ ê xêh ing tơdroăng ki kal mê pin thế phá tâ ‘na phần mềm”.

Mâu ki ‘nâ tối tiah kố, ôm hyô Dak Lak xuân ối hên tíu ki pá môi tiah tơmeăm khoăng ôm hyô, hngêi ối, troăng prôk, hâi ai tơmeăm khoăng ki dâi lĕm, ‘na mơdró ôm hyô peăng kơmăng ối pá puât ƀă hâi teăm ai hên khu mơdró vâ ‘no liăn mơjiâng pro mơhno troăng a hdrối vâ tơbleăng troh lâp lu. Tiô pôa Đặng Xuân Vũ, Ngế pơkuâ Kŏng ti Ôm hyô Đắk Việt tối, ki pơxiâm ai preăng prêh mâu tíu ôm hyô a kong pơlê dế pro pá ăm tơdroăng vâ mơjiâng chiâng mâu tour lăm ôm hyô, pá vâ châ rak chêng tơmối.

“Tơdế peăng mâ lâi Lo ƀă peăng mâ hâi Lu dêi kong pơlê mê tơdroăng tơkŭm ƀă hâi tơtro khâp ƀă dêi rơpó, mê nôkố ối peăng prêh, tơkéa vâ tối tơmeăm mê hâi tơdâng tơ’mô ƀă dêi rơpó, ƀă ki kơtăn pơla péa kơpong ối hơngế. Xua mê, vâ tơrŭm tơdjêp chiâng môi tour ối pá ‘nâng, tâng chôu prôk dêi tơmối kơtăn pơla péa tíu troh achê tâ mơni xo ah hmôi tơmeăm ôm hyô mê kô tơ’lêi tơkŭm tâ”.

Pôa Lê Phúc Long, Phŏ pơkuâ ngăn túa lĕm tro, Tơ’noăng ƀă Ôm hyô kong pơlê Dak Lak ăm ‘nâi, kong pơlê ‘mâi pro troăng vâ mơnhông ôm hyô tiô troăng tâk ki vâ hlo ‘nâi, ton hâi tâ ăm tơmối vâ pơtê ối hêi ƀă mơdêk kơlo liăn hrê dêi tơmối teăng bú tơkŭm, tâk kơxô̆ tơmối. Tơdrêng bă amê, kong pơlê kô tơmâng tơrŭm ƀă mâu cheăm kong pơlê kĭng têa kơxĭ peăng Hdroh tơdế tơnêi têa vâ ‘mâi pro mâu tíu ôm hyô tơdjêp têa kơxĭ ƀă tơbăng kong ngo. 

“Xua mê, mâu tơdroăng ki pá mê râ pro ôm hyô Dak Lak dế prôk kơ’nâi tâng vâ pơchông ƀă mâu kong pơlê ki ê rơtâ tá tung kơpong môi tiah Gia Lai, Khánh Hòa lơ Lâm Đồng. Khu xiâm xuân hiăng tơrŭm ƀă mâu kơvâ cheăng vâ tơbleăng ăm Vi ƀan Kuăn pơlê dêi kong pơlê, ai mâu tơdroăng kal tơdjâk troh Chin phuh, mâu khu xiâm, kơvâ cheăng mê thế tơkôm mâu khu xiâm, kơvâ cheăng hnê tối. Vâ mơnhông ôm hyô mê Khu xiâm kô veăng tăng ‘nâi plĕng mâu tơdroăng tối ăm râ kơpêng tung mơjiâng pơkâ kơjo kum mơnhông ôm hyô tung kuăn pơlê dêi kong pơlê xuân môi tiah mâu tơdroăng ôm hyô, ing mê kô ai tơdroăng pơkâ luât vâ tŏng gum ăm mâu kong cheăm bêng kong pơlê xuân môi tiah kơvâ cheăng tơbleăng pêi pro tung la ngiâ”.