Tíu chôu ‘măn tơmeăm khoăng roh ton nah Tháp Nhạn kong pơlê Dak Lak achê hâi Tĭng Vía Bà ai kơdrâm tơmối. Nâ Tống Thị Hải Yến, tơmối ing Phú Thọ tối ăm ‘nâi, a nếo prôk troăng lối 180 km ing Ƀuôn Ma Thuột xua mê tâ tơbrêi ‘nâng. Mâu tơmối tung khu hiăng ôh tá vâ lăm xếo, ôh tá ai tŭm ivá lăm hêi tung kong, kơxê lăm a têa kơxĭ; kơxo ôu kơphế Ban Mê, kơxê ngăn san hô Hòn Yến. Nâ Yến tối, kơtăn pơla mâu tíu troh hơngế dêi pó, troăng klông ôh tá lĕm xua mê tơdroăng prôk troăng ton chô chiâng ôh tá teăm vâ lăm ôm hyô.

“Kố cho rôh apoăng á troh akố mê á hlo kơpong tơnêi kố cho lĕm, kuăn mơngế lĕm, mơdró xuân lĕm. Laga xuân ối tiah apoăng ki gá ai xêh, tá hâi châ mơ’no liăn tơtro, tá hâi ai hên tơdroăng mơdró vâ râng chêng tơmối. Tâng pro mơnhông lĕm mê tíu kố ối hên tơmeăm ki vâ pro mơnhông’’.

Ôm hyô Dak Lak ối utâi utá iâ, xuân châ mơnhên tơdjuôm dêi hên khu tê mơdró pêi ôm hyô. Mâu troăng hơngế, tơmeăm tá hâi lĕm păng ‘nâng pro kơdroh ki tơmối hâk vâ troh ngăn ôm hyô. Ing pơlê kân Ƀuôn Ma Thuột a peăng mâ hâi Luô troh têa kơxĭ peăng Mâ hâi Lo hơhngế lối 180km. Ing Ƀuôn Ma Thuột troh mâu tíu ôm hyô kŭn, môi tiah Hồ Lắk, Ƀuôn Đôn xuân hơngế xuân châ 50 km. Nâ Phạm Thị Bích Hạnh, teăng mâ môi kŏng ti ôm hyô a pơlê kong kân Hồ Chí Minh tối ăm ‘nâi:

“Troăng prôk hơngế, tơmối ối tơƀrêi tâng lăm prôk châ tâ, châ hlo ing Peăng mâ hâi Lo troh peăng mâ Hâi Luô Dak Lak. Tâng troăng klông lĕm mê kơxô̆ tơmối troh akố kố hên’’.

Pôa Trần Hữu Phước, tíu pêi ôm hyô lâp plâi tơnêi Việt Nam - Lếo tối ăm ‘nâi, kơtăn hơngế, hngêi trăng, troăng klông tơdjêp tá hâi tơdâng tơ’mô pro tơdroăng tơkŭm po mâu tour hên khu tơkŭm dêi pó pơla kong ƀă têa kơxĭ ối hên tơdroăng ki trâm pá:

“Nôkố mâu troăng kân ki tơdjêp pơla kơpong kân rơdâ a Tây Nguyên ƀă mâu kong pơlê kơpong tơbăng peăng tơdế tơnêi têa ối ‘mêi’’.

-Mâu khôi túa lĕm tro a Dak Lak xuân hngăm tơdroăng ki mơđah tơbleăng, ôh tá tŭm tơdroăng mơdró ki pro ăm tơmối ối ton

Rơtế ƀă tơdroăng troăng klông, ôm hyô a Dak Lak xuân châ tối cho ối hên ki tá hâi trâu. Tơmối troh mâu tíu lăm ngăn a Dak Lak, xup um klêi mê rĕng vêh lăm u ê. Mâu tơdroăng mơhno khôi túa lĕm tro a hên tíu xuân cho vâ mơđah tơbleăng, ôh tá ai ki vâ tơdjâk dêi pó ƀă tá hâi ai tơdroăng ki vâ toi ăm tơmối ối ton, xua mê, Dak Lak chiâng kơpong ‘’hơngế mê hơ-ui – achê mê hlo ôh tá tơkéa lâi ôh’’. Pôa Dương Quốc Tuấn, ngế ki hnê prôk ôm hyô ngiâ méa Tây Nguyên – kơpong tơbăng peăng tơdế Tơnêi têa tối ăm ‘nâi, tơdroăng ki môi tiah dêi pó, bô bối a hên tíu troh cho tơdroăng ki ‘ro má môi dêi Dak Lak.

“Tơdroăng cheăng kâ kơmăng mê ối iâ, ai tíu xah hêi xua ki phá tơ-ê pin ôh tá pêi cheăng kâ kơmăng môi tiah kong têa Siam. Ƀă ‘na tơdroăng ki ai tơdjâk mê nôkố tơmối vâi pơrá veăng tơpui tối cho mê cho môi tiah dêi pó ‘na tíu, xua mâu tíu gá bô bối cho copy dêi pó tâi, tá hâi ai ki lĕm tơ-ê’’.

Klêi kơ’nâi tơmot chiâng môi, Dak Lak hiăng ai têa kơxĭ, po troăng mơnhông la ngiâ kân ăm ôm hyô kong – têa kơxĭ. Laga, tơdroăng ‘na pêi lo liăn xuân ăm hlo môi tơdroăng ki ai khât cho ối pá puât hên. Tung hâu pơtê leh 30/4 ƀă 1/5 pơla kố nah, pêi lo liăn ôm hyô Dak Lak lối 520 rơtal liăn, ƀă tơdế kong pơlê Gia Lai, ƀă 1/3  Lâm Đồng ƀă 1/5 kong pơlê Khánh Hòa.

Tơdroăng ki kŭn ôh tá hro dêi kơvâ ôm hyô Dak Lak ối mơhno a ki dâi lĕm hngêi trăng, troăng klông, drêng bu ai 2 tíu châ tro pơkâ 5 hơlŏng; 4 tíu châ 4 hơlŏng, 9 tíu châ 3 hơlŏng. Mâu tíu ôm hyô ki ô eăng má môi dêi Dak Lak, môi tiah Bản Đôn, Hồ Lắk, Tíu chôu ‘măn tơmeăm khoăng roh ton nah, Long têa Ea Kao... pơrá iâ tơdroăng ki veăng tung tơtêk tơdjuôm dêi kong pơlê.

Tiô jâ Nguyễn Thị Ngọc Anh, Kăn hnê ngăn Khu Kơdrâi mơdró kong pơlê Dak Lak, ôm hyô sinh thái - pơlê pơla cho tơmeăm ki rơdêi dêi kong pơlê, laga khu tê mơdró bu khên mơ’no liăn cheăng kŭn iâ xua tơnêi ôm hyô ki kong pơlê ăm mung dế tro pro yă tơnêi mơdró. Tâng Dak Lak ôh tá tah lôi mâu tơdroăng ki kreăng pá puât kố, ôm hyô a kong pơlê cho pá vâ mơnhông lo ing tơdroăng kŭn ‘ro nôkố.

“Cho hên troăng hơlâ ‘na kong prâi, tơnêi tơníu ƀă mâu pơkâ ki tơdjâk dế chiâng tơdroăng ki tât ƀă khu mơ’no liăn cheăng ki hâk vâ. Tâng troăng hơlâ ôh tá tŭm hlâu lĕm mê cho pá mâu tơdroăng tơkêa bro ôm hyô ki kân mê bu ai mơnhông ki ku kŭn tê’’.