Vâ chê môi măng tĭng kố, chât ngế kăn ƀô̆, mâu lêng mố đô̆i, mâu lêng kuăn pơlê ƀă mâu lêng ki hmâ pêi tơdroăng cheăng ai mâ sap kơxo má a ilâng kiâ ‘mế mâu ngế Hlâ ai hnoăng a Mỹ Thắng. Môi ngế pơrá ai môi tơdroăng cheăng: tôh kring tơniăn, tôh chiâ xo, tôh ngăn pơkeăng pơlât, khu pế pơchên kế kâ… Tâi tâng mê xuân hvái ngăn tơdroăng pơkâ tơdjuôm cho pêi klêi tơdroăng xo túa kơxêng kiâ vâ ngăn tro tiô pơkâ, tro tiô tơdroăng.

Trung tá Phạm Hữu Lộc, Chính trị viên Phŏ Pơkuâ ngăn Lêng cheăm Phù Mỹ Đông ăm ‘nâi, klêi chiâ xo kơxêng, Đội K52 xo túa vâ ngăn, pơtroh ăm khu ngăn pơkeăng séa ngăn, ‘măn rak krâu hdrối vâ pơcháu ăm Khu pơkuâ ngăn lêng cheăm.

“Ƀă Tơdroăng pêi cheăng 5000 hâi măng, tíu pêi cheăng hiăng pơxiâm tơbleăng pêi sap ing hâi lơ 25.6 troh nôkố. Tíu pêi cheăng  kơhnâ tơbleăng ing mâu tôh hiăng châ Đảng ủi, Vi ƀan Kuăn pơlê cheăm mơjiâng, pêi rêm hâi vâ pro ti lâi ăm tro tiô tơdroăng pơcháu”.

A mâu tơnâp kiâ ki hiăng chiâ xo, môi plâ ƀaih hiăng pro pơtân hơpăm vâ kơdroh ki tô ó môi tiah on dế koh a tơdế rơnó mơdrăng. Ƀă hiăng pêi cheăng tung hên hơnăm tơkŭm kơxêng kiâ mâu ki hlâ, tơrêm tơdroăng cheăng dêi kăn ƀô̆ - mâu lêng đô̆i K52 xuân tơtrŏng. Thiê̆u tă Trần Hoàng Nam, ngế cheăng tung Đô̆i K52, Khu xiâm pơkuâ ngăn lêng kong pơlê Gia Lai tối, rêm to ilâng kiâ ai tơnêi tíu pơrá phá, mê tơdroăng chiâ tơnâp kiâ xo kơxêng kiâ gá ai ki pơrá phá xêh.

“Klêi pêi tơdroăng cheăng mê ăm hlo mâu ilâng kiâ a mâu cheăm bêng ai ki pơrá phá tơ ê dêi pó. Ai ilâng kiâ ki ‘nâ chiâ tơnêi rơpâ, pá tơkŭm, pơtih a Phù Mỹ Đông cho tơnêi prêi mâu ngoh o chiâ tơnêi hlâu hlôp trâu. Mâu ilâng kiâ ki ê drêng chiâ ai têa xuân tơdjâk hên troh tơdroăng tôm xo kơxêng”.

Tơdroăng cheăng hmếo pơ rơhĭng pêi tung pơla kong tô téa. Ngế ki kố tơbrê mê ngế ki ê nếo pêi. Lo têa kơxô kơxâm kơchoh tâi ếo la ôh tá préa. Râng ƀay kŭn, chôa pơlâng kúa tah tơnêi ki krêa rơtăng, tơrêm tơmeăm kreăng, kơxêng mâu ngế hlâ ai hnoăng xuân châ xo pêi ‘măn pơ’lâng. Thăm rế xơpá, mâu ngế tung khu K52 Gia Lai thăm rế mơ-eăm tâ.

“Xuân ai mâu ngế hiăng lối ton hơnăm, mâu kơxêng hiăng pok hên. Ƀă mâu ngế ki mê, Đô̆i K52 kô po rơdâ kơpong lăm tăng. Kô ai tung pơla pơkâ hdró lơ xua tơdroăng tơplâ lơ tơnêi tơxĕn mâu tơnâp ‘mế kiâ hiăng ôh tá tro a tíu ki ‘mé hdrối nah. Vâi ngoh o mơ-eăm po rơdâ, tí tăng ngăn i nhên, ôh tá ăm tro piu lôi”.

Kơtăn kơpong chiâ rôu tăng péa pái chât met mâu kih thuât viên pêi pro tơdroăng xo túa ngăn ADN tro tiô pơkâ. Rêm túa kơxêng mê xuân châ chêh tối mâu tơdroăng, xup um, hdró mah kơxô̆, kơxuô lĕm hlối ‘măn rak tŭm vâ pơxúa tung tơdroăng mơnhên xo ah hmôi. Ƀok thái pơkeăng Dương Công Hoàng, Ngế pơkuâ kíp xo ngăn túa mê ăm ‘nâi:

“Klêi xo ngăn túa mê, peăng kơxêng kiâ ki u ối kô pơcháu ăm tíu pêi cheăng lêng ngăn số hóa vâ djâ vêh ‘mế nếo a tơnâp. ‘Na tíu pêi cheăng lêng kô ối rak túa mê ‘măn krâu lĕm tro tiô pơkâ vâ xo ah hmôi drêng pơcháu tíu pêi cheăng lêng tơdah xo, pơtroh lăm mơnhên, i nâi ăm mâu meh miê”.

Ilâng kiâ ‘mế mơngế hlâ ai hnoăng Mỹ Thắng nôkố ai 445 to tơnâp ‘mế mơngế hlâ ai hnoăng, tung mê ai 118 to tơnâp hâi ‘nâi nhên inâi. Tơdroăng xo ngăn túa ADN akố nếo bú cho môi tung mâu tíu ki pơxiâm dêi tơdroăng lăm pêi cheăng 500 hâi măng ki kong pơlê Gia Lai dế tơbleăng chiâ xo ngăn a hên ilâng kiâ ‘mế mơngế hlâ ai hnoăng tung kong pơlê.

Troăng prôk ahdrối xuân ối xơpá xua tíu hdró rôh tơplâ hiăng ton hơnăm. La rêm túa kơxêng kiâ ối ‘măn rak krâu hâi kố xuân tơngah troh môi hâi ki mê ah mâu ngế lêng hơnăm ki mê nah kô châ krếo tro inâi tơná, ƀă châ tơkŭm ƀă dêi on veăng rơpŏng hngêi.

-