Klêi tơmâng tơbleăng ƀă mâu tơdroăng veăng hnê tối drêng tơbleăng, tối mơgêi a rôh pêi cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơdroăng cheăng hbrâ, mơdât xía vâ kong prâi pro ôh ta tơniăn sap nôkố ta troh tâi hơnăm 2026 ôh ti xê to hnoăng cheăng pêi hbrâ ví xía vâ, mê cho rôh ki mơnúa ngăn ivá pơkuâ hnê, mơhno pêi pro, pơkuâ ngăn tơdroăng cheăng pêi dêi tâi tâng khu cheăng kal kí; cho tơdroăng ki kal vâ rak krá tơniăn tơdroăng rêh ối kuăn pơlê, kring vế hnoăng mơnhông ƀă pêi pro tiô pơkâ tâk hên dêi mâu kong pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên 5 tơdroăng hnê mơhno kân, tung mê, pơkâ thế tung plâ cho kring vế kuăn pơlê cho tơdroăng khŏm thế pêi, pơklât thế má môi. Xua tơmeăm khoăng kô ối châ pêi lo nếo, tơmeăm kô chiâng rơnêu, tơdroăng pêi chiâk deăng kô ối chiâng pêi lo nếo, la châ chăn kuăn mơngế ôh tá chiâng vâ boăng.

Tŭm troăng hơlâ vâ pêi pro, tŭm tơdroăng pơkâ dêi khu pơkuâ, tŭm tơmeăm khoăng, liăn ngân, kuăn mơngế ki tăng vâ veăng pêi pro ki hdrối cho xúa tơdroăng kring vế kuăn pơlê, malối cho mâu hiăng krâ, vâi hdrêng, vâi kơdrâi ki dế mơ -êa, mâu ngế chó chêng tơvê kŏng plôm mâ, mâu kuăn pơlê ki ối a kơpong rơ-iô; pakĭng mê, tơdroăng hbrâ mơdât xía vâ thế pêi pro hdrối môi hvêa. Pôa pâ thế, mâu khu xiâm, kơvâ cheăng, kong pơlê, cheăm bêng thế po ngăn tung măng đi đo vâ ’nâi tơdroăng pêi pro hbrâ ví xía vâ ƀă El Nilno, kong tô mơdrăng ó,  têa xăng po lân mot, ôh tá ai têa, khuôt têa, on chếo kong; hlối pêi pro mâu troăng hơlâ hbrâ ví xía vâ kong mêi khía, têa rơlêa, tơnêi rơlâm tơhnâ, têa lân lu kơphô̆, xía vâ a rơchôa, a tíu ‘noăng kâng têa.

Tơdroăng hbrâ pêi pro thế tro khâp tơrêm kơpong, tơrêm cheăm bêng, tơrêm tíu, tơ rêm khu kuăn pơlê ối a tíu tơ’lêi trâm tơdroăng ôh tá tơniăn. Rôh kố, pôa Tô Lâm xuân pơkâ thế, mơdêk pêi tơƀrê tơdroăng tối tơbleăng hdrối, tối tro mâu tơdroăng troh tơrêm ngế kuăn pơlê; malối tơmâng pro kơtăng khât ‘na luât pơkâ hdró, mơjiâng tơmeăm khoăng, tơmeăm khoăng ƀă hyôh kong prâi.