Sap ing kố troh tâi khế 7, cheăm Tu Mơ Rông mơ-eăm pêi kêi đeăng tơdroăng xing xoăng ƀă tŏng gum kuăn pơlê pêt lối 1 rơtuh xiâm kơphế tung ƀăng deăng dâng 200 hectar. Pơkâ ki xiâm ôh tá xê to mơdêk ƀăng deăng pêt kơphế mê ối chôa ‘lâng mơjiâng kơpong ki pêt tơkŭm, mơjiâng xiâm rêi vâ pêt kơphế tiô troăng ki kơnâ.

Pôa Võ Trung Mạnh, Kăn pơkuâ hnê ngăn Đảng ủi cheăm Tu Mơ Rông tối ăm ‘nâi, lối 1 rơtuh xiâm kơphế châ pêt tung hơnăm kố nếo cho troăng pơxiâm. Hneăng hơnăm 2026  - 2030, kong pơlê châ pơkâ tŏng gum kuăn pơlê pêt nếo 1.000 hectar kơphế; mơ-eăm troh hơnăm 2030, tâi tâng ƀăng deăng kơphế lâp cheăm tiô tối hdrối châ dâng 1.588 hectar, tơmiêt pêi a la ngiâ rêm rơpŏng kuăn pơlê ai ki vâ iâ 1 hectar kơphế vâ mơnhông cheăng kâ rơpŏng hngêi.