A cheăm Đam Rông 1, kong pơlê Lâm Đồng, ngoh Phạm Văn Hội cho môi tung mâu ngế kuăn pơlê pêi chiâk deăng djâ troăng ahdrối djâ pơ’leăng mắc ca tung uâ bro trâu hơngế. Ing tơdroăng tê plâi drêh tơngah to mâu ngế ki rôe tơmeăm, ngoh khên tơnôu mơ’no liăn rôe kơmăi lêa kơdôu, kơmăi têng ƀă mơjiâng inâi ‘’Mắc ca Hội Dung’’. Tơmeăm pơ’leăng mắc ca têng dêi tíu ngoh pro châ OCOP 3 hơlŏng, tơdrêng amê tơdjêp rôe plâi mắc ca dêi hên rơpŏng kuăn pơlê tung kơpong vâ uâ bro, tê a mâu kơchơ kân môi tiah Hà Nội ƀă Pơlê kong kân Hồ Chí Minh. Tiô ngoh Hội, vâ tơmeăm prôk hơngế mê thế pơkuâ ki dâi lĕm sap ing kơdrum troh kŏng mơngế rôe xúa:

‘’Uâ bro trâu hơngế thế tinh toăn ing kơdrum troh khâu ki má mơ’nui troh mơngế ki rôe xúa. Ki xiâm dêi ngin o cho ki dâi lĕm thế ối má môi vâ prôk trâu, prôk hơngế’’.

Ing troăng pêi dêi ngoh Hội, uâ bro trâu dế chiâng troăng prôk châ hên khu tê mơdró, khu tơrŭm cheăng ƀă tíu pêt mơjiâng tơmeăm a Lâm Đồng rah xo vâ mơdêk ki kơnâ tơmeăm pêi lo ing chiâk deăng. Nôkố lâp kong pơlê ai lối 500 tíu uâ bro, kơxuô ƀă tâi tâng tơdroăng ki pro châ 1,53 rơtuh tâ̆n rêm hơnăm, mơjiâng chiâng xiâm rêi vâ tơmeăm pêi lo ing chiâk deăng tơxâng pơkâ dêi tơdroăng tê tiô rơxông nếo ƀă po rơdâ kơchơ mơdró tê ngi kong têa ê.

Tiô nâ Nguyễn Thị Thùy Minh, Ngế pơkuâ môi tíu uâ bro tơmeăm pêi lo ing chiâk deăng a bêng Lâm Viên – Đà Lạt, uâ bro trâu hơngế po troăng prôk krá tơniăn ăm tơmeăm pêi lo ing chiâk deăng dêi pơlê. Ôh tá xê to tah lôi tơdroăng ki rơlối tơmeăm pêi lo ing chiâk deăng rơnó pôe, krí xo, tơdroăng uâ bro mê ối gum mơdêk ki kơnâ tơmeăm, pro ton hâi khế rak, tăng tơ’nôm cheăng pêi ăm mơngế pêi cheăng a pơlê ƀă mơdêk mơjiâng troăng tơdjêp ing pêt mơjiâng troh tê.

“A rơnó ki pôe, krí xo mê hên tơmeăm pêi lo ing chiâk deăng xua mê á tê ôh tá teăm. Xua mê kơxô̆ tơmeăm pêi lo ing chiâk deăng mê kô tơ’nhê. Xua mê, ngin rah kŏng ngê̆ têng khăng kố vâ xúa châ ton hâi laga tơmeăm xuân hên há, kơhiâm tâ há’’.

Tơdroăng ki nhên khât ăm hlo, rơtế môi khu tơmeăm pêi lo ing chiâk deăng laga drêng uâ bro kô tâk hên ki kơnâ tê mơdró, tơdrêng amê gum mơngế ki pêt mơjiâng hbrâ tâ hdrối mâu tơdroăng ki ôh tá tơniăn kơchơ mơdró. Vâ mơjiâng tơdroăng ki châ tơƀrê ăm kơvâ uâ bro tơmeăm pêi lo ing chiâk deăng, kong pơlê Lâm Đồng hiăng tơpui pơkâ pêi mơnhông uâ bro kơchâi plâi pôm hneăng hơnăm 2026 – 2030. Pơkâ pêi troh hơnăm 2030, kơxô̆ kơchâi drêh plâi pôm uâ bro trâu châ dâng 30% kơxô̆ tơmeăm, chôa ‘lâng djâ kơmăi kơmok uâ bro chiâng tơdroăng ki vâ tơtêk kal khât dêi tơdroăng cheăng kâ pêi chiâk deăng a pơlê.

Tiô pôa Phan Nguyễn Hoàng Tân, Kăn pơkuâ Khu pơkuâ pêi chiâk deăng ƀă Kong prâi kong pơlê Lâm Đồng, uâ bro trâu hơngế cho khuă mơdêk ki kơnâ tơtêk, mơdêk ivá tơbriât ƀă po rơdâ kơchơ mơdró tê ngi kong têa ê tơmeăm pêi lo ing chiâk deăng kong pơlê. Pôa Phan Nguyễn Hoàng Tân tối rơdêi:

“Vâ mơdêk ki kơnâ tơxup tơbriât dêi kơvâ xuân môi tiah mơnhông kơchơ mơdró, ki má môi cho tê ngi kong têa ê mê pin kal mơnhên mâu kơpong pêt, pêt mơjiâng ƀă pơkâ. Tơdrêng amê rơtế ƀă mê mơdêk tơdroăng ki uâ bro tung kơvâ  pêi chiâk deăng vâ mơjiâng ki kơnâ tơtêk ƀă mơdêk ivá tơbriât cheăng dêi kơvâ’’.

Ing mâu tíu pêt mơjiâng ing rơpŏng troh mâu khu tê mơdró mơ’no liăn cheăng tiô rơxông nếo, uâ bro trâu dế mơjiâng tơdroăng ki pơhlêh ó rơdêi tung troăng tơmiât mơnhông pêi chiâk deăng tiô rơxông nếo, uâ bro trâu dế mơjiâng tơdroăng ki pơhlêh rơdêi ôh tá xê to gum mơdêk pêi lo liăn ăm kuăn pơlê, kơdroh tro lŭp klêi pôe, kri xo tơmeăm mê ối mơdêk ivá tơbriât, po rơdâ kơchơ ki tê. Kố cho troăng prôk ki kal vâ tơmeăm pêi lo ing chiâk deăng Lâm Đồng mơdêk ki kơnâ ƀă mơnhông krá tơniăn.