Rơnó mêi hơnăm 2026 a Gia Lai hiăng vêh nếo, mâu têa kroăng kŭn ki xiâ hiăng ai têa hiu, mâu long rơchôa pơxiâm kơdroăng têa nếo. La ki tô tuăn tung rơnó mêi khía xuân tâk tơrêm hâi.

A kơpong peăng mâ hâi lu kong pơlê Gia Lai, hên long môi tiah Tân Sơn, Ia Mlah, Biển Hồ B, Ia Dréh lơ Ia Ring, Ia Năng ƀă hên têa kroăng ki ê hiăng hlo têa hngiâm a ‘noăng rơchôa, tíu têa hiâ, tíu tơ‘nhiê a tíu vê vâ po mơ’no têa, hiăng hlo rơheăng a ƀê tong tíu mơ’no têa plé dêi rơchôa. Ki khât ăm hlo, ki hên mâu tơmeăm khoăng châ mơjiâng ing to lâi chât hơnăm hdrối, luâ hên hơnăm la hâi ‘no liăn ‘mâi rơnêu ăm tơxâng. Mâu rơchôa têa ki ‘nâ tro tơnêi kơđu, kơdroh ki châ hdoăng têa; hên mâu tíu hiăng tơ’nhiê tơdjâk troh tung pơla mơ’no têa ƀă rak ngăn têa hiu tung rơnó têa lân lu. Pôa Rơ Chăm Tin, Phŏ kăn hnê ngăn Vi ƀan cheăm Ia Grai pâ thế.

“Vâ tơniăn ƀă pơtối rak vế long têa mê tung la ngiâ kơvâ pêi cheăng dêi kong pơlê kô séa ngăn tâi tâng long têa, klêi mê kô ai xiâm pâ thế mâu râ, kơvâ cheăng kơjo kum liăn ‘mâi rơnêu, ‘mâi pro, tơniăn tâi tâng tơmeăm khoăng pơxúa ăm tơdroăng kal vâ dêi kuăn pơlê”.

Ôh tá xê to kơpong peăng mâ hâi Lu kong pơlê, hên mâu tơmeăm khoăng, rơchôa a kơpong peăng mâ hâi lo kong pơlê Gia Gia Lai xuân dế vâ tơ’nhiê. Tiô kŏng ti pêi cheăng tiô rơnó mơjiâng pro rơchôa Bình Định, tung kơxô̆ 63 long hdoăng têa vê ngăn têa ki rak ngăn nôkố ai 9 to long hiăng tơ’nhiê ó kal thế rơnêu pro tơdrêng. Pôa Bùi Phi Hùng, Phŏ kăn pơkuâ Kŏng ti pêi cheăng tiô rơnó tăng mơjiâng pro rơchôa Bình Định tối:

“Mâu tơmeăm khoăng ‘no liăn hên kal chêh ‘mot tung inâi ‘no liăn mơjiâng tơmeăm khoăng vâ kong pơlê lơ Tíu xiâm tơbleăng kơxô̆ liăn vâ ‘mâi rơnêu bro. Drêng rơnêu klêi kô pơcháu ăm kong ti rak ngăn. Xiâm dêi kŏng ti nôkố tŭm vâ ‘mâi rơnêu a mâu tíu ki tơ’nhiê kŭn, môi tiah a peăng dêi văng mơ’no têa plế, a péa dêi van vâ po troăng cho mơ’no têa, lơ tơhnâp iâ môi troăng cho mơ’no têa vâ tối ki hmâ hlo tê”.

Tiô kơvâ ngăn Chiâk deăng ƀă Hyôh kong prâi kong pơlê Gia Lai, hên long têa kâng pro ing ton nah nôkố ôh ti lĕm krá môi tiah púi vâ  tung pơla mê kong mêi tô hmâng vâ troh rơnó mêi thăm rế rơ-iô ó tâ. Tơdroăng ‘no liăn rơnêu pro ôh tá xê to vâ ăm krá ton rơchôa mê ối veăng rak tơniăn ăm kuăn pơlê ki ối a kơpong páxôp tâng lơ kơdrâ ai têa rơlêa. Kong pơlê Gia Lai hiăng xúa pơkâ mơnhông pro rơchôa ƀă têa krúa a thôn pơlê pơla hơnăm 2026 - 2030, troăng vâ pêi hơnăm 2035.

Tung pơla mê, kong pơlê pâ thế Tíu xiâm kơjo kum liăn mơnhông pro mâu tơdroăng tơkêa ‘mâi rơnêu pro mâu rơchôa ki hiăng tơ’nhiê ó a tung kong pơlê. Pôa Cao Thanh Thương, Ngế pơkuâ Khu xiâm ngăn ‘na Chiâk deăng ƀă Hyôh kong prâi kong pơlê Gia Lai ăm ‘nâi:

“Tơdroăng pơkâ ki apoăng cho ‘no liăn pro rơchôa. Tung la ngiâ, Gia Lai tơkŭm tăng ngăn, pâ thế ‘no liăn kâng rơchôa ăm kơpong peăng mâ hâi Lu Gia Lai vâ pơtối rak tơmeăm khoăng, ki pơxúa mơnhông pêi chiâk. Gia Lai xuân hiăng pâ thế Chin phuh ƀă mâu khu xiâm, kơvâ cheăng tơmâng kơjo kum liăn hên vâ pro rơchôa, ai tiô kal vâ mơnhông tung mâu hơnăm la ngiâ”.

Tơdroăng ‘no liăn ‘mâi rơnêu pro long rơchôa a Gia Lai ôh tá xê to kal vâ ‘na mơjiâng tơmeăm khoăng mê ối cho troăng hơlâ ki kal vâ tiăn ăm ivá, tơmeăm khoăng kuăn pơlê. Kô xuân cho tơdroăng ki kal vâ Gia Lai hbrâ ví kong prâi pro ôh tá tơniăn krá tung mâu hơnăm la ngiâ.