Nâ H’Bích Niê, hdrông kuăn ngo Rơđế a bêng Tân An klêi kơ’nâi châ khăm pơlât, rak ngăn ivá ôh tá eâ nâp liăn tung hneăng a poăng xua Vi ƀan hnê ngăn kong pơlê Dak Lak ai tối tiah kố:

“Roh apoăng á châ khăm pơlât ivá ôh tá tâi liăn trối kố, klêi khăm mê ‘nâi dêi ivá châ chăn tơná ga tiah lâi. Tơná á ƀă vâi krâ-nhŏng o tung pơlê hơniâp ro ó khât. Ki pói rơhêng vâ, sap ing hâi kố troh a la ngiâ ah, kơnôm châ Đảng, Tơnêi têa tŏng gum ngăn khât hên tâ nếo vâ vâi krâ kuăn pơlê châ pơtối khăm pơlât ôh tá tâi liăn ngân”.

Tiô jâ Châu Thị Kim Phụng, Kăn ngăn Hngêi pơkeăng bêng Tân An, tung 2 măng tĭng tơkŭm hneăng khăm pơlât, rak ngăn, ivá kuăn pơlê ôh tá xo liăn, gum kuăn pơlê chêh tơ’mot mâu inâi hâi khế, tíu ối tung app sổ tay sức khoẻ điện tử ƀă theh Ƀaoh hiêm khăm pơlât a app VNeID, mê kong pơlê hiăng pêi pro châ tŭm 100% tơdroăng pơcháu ƀă pơtối po rơdâ tơdroăng khăm pơlât ivá ôh tá xo liăn ăm kuăn pơlê.

“Hngêi pơkeăng kô khăm pơlât tá tơngê, ta rong, hơnĕng-keăng-ngiâ, tuăn-môh-krôk, vâ ing mê, ‘nâi mơnhên tối tơbleăng ƀă mơnhên ngế ki ai ivá tiah kố tiah mê ăm tơná kuăn pơlê ‘nâi dêi i nhên. Klêi mê, hnối pơkâ pêi pro mâu túa cheăng kih thuât trối pâk xo mơheăm vâ séa mơnhên, xo têa nŭm vâ séa mơnhên, hnối xup um X-puang. Tơdrêng ƀă tơdroăng ki khăm ngăn tâi tâng mâu tơdroăng mê, hngêi pơkeăng ối tơveăng gum kuăn pơlê chêh ‘mot dêi inâi, hâi khế kot mâ, tíu ối, tơdroăng châi tamo, tâi tâng mâu tơdroăng mê hiăng châ chêh tơ’mot tung app sổ tay sức khoẻ điện tử”.

Pôa Phạm Minh Hữu-Ƀok thái pơkeăng Chuyên khoa II, Phŏ hnê ngăn Khu ngăn na pơkeăng ƀă khăm pơlât kong pơlê Dak Lak tối ăm ngin ‘nâi, pêi pro tiô tơdroăng hnê tối dêi Vi ƀan hnê ngăn kong pơlê ƀă Tơdroăng pơkâ kơxô̆ 72 dêi Khu xiâm kal kí ‘na khăm pơlât ivá châ chăn tiô kơ rêm rơnó, khăm ngăn tâi tâng tơdroăng châi tamo ăm kuăn pơlê, mê Khu hnê ngăn hiăng pơkâ tŭm tơdroăng pơkâ mê troh a tâi tâng mâu hngêi pơkeăng ối tung 102 to cheăm bêng tung lâp kong pơlê; tơrŭm cheăng ƀă mâu tíu xiâm ngăn ‘na pơkeăng ƀă tíu khăm pơlât krê pákong hiăng hbrâ mâu kơmăi kơmok, kế tơmeăm ƀă kuăn mơngế ki veăng pêi pro mâu tơdroăng cheăng ăm kuăn pơlê. Tung mê, mơnúa pêi pro a 4 to cheăm, bêng cho Tân An, Tuy Hoà, cheăm Đồng Xuân prế Krông Bông; 98 to cheăm, bêng ki u ối kô pơtối pêi pro sap ing hâi lơ 1 khế 7 la ngiâ.

Troh nôkố, ai vâ chê 500 ngế kuăn pơlê hiăng châ khăm  pơlât tŭm, tro tiô tơdroăng hnê tối dêi Khu xiâm ngăn ‘na pơkeăng ƀă hăm pơlât, ƀă hnoăng cheăng khăm pơlât mê xuân ối pơtối châ khăm ngăn dâng rơpâu ngế. Pôa Phạm Minh Hữu tối nhên, ki kal dêi tơdroăng hbrâ khăm ngăn i nhên tung tŭm tơdroăng cheăng ăm kuăn pơlê.

“Khăm seá ngăn châ chăn ivá ăm kuăn pơlê châ pêi pro 3 tơdroăng cheăng xiâm, sap ing 1 hâi troh a 6 hơnăm, khu ki má peá sap ing 6 hơnăm troh a 18 hơnăm, khu má pái sap ing 18 tơngi klêng. Tơdroăng ki hbrâ lăm khăm ivá châ chăn kuăn pơlê xuân ối mơnhên ngăn ivá châ chăn dêi kuăn pơlê ối má to lâi xuân cho tối tơbleăng tŭm têk tâi tâng ăm tơná kuăn pơlê, tiô kơlo ki vâ mo lĕm, tung mê, ai kơlo ki mo lĕm păngu ‘nâng, mo krâ kơvâ, ôh tá mo, tơkeá vâ tối ‘ro, ôh pá hro, vâ ing mê, vâ ăm khu ƀok thái pơkeăng ‘nâi nhên ai troăng hơlâ khăm pơlât, xuân ăm tơná kuăn pơlê plĕng dêi mâu tơdroăng châi tamo tơná vâ rak vế, rêh kâ ối, khăm pơlât ăm i tơtro tâ, tâng la lâi hiăng châ ‘nâi tơdroăng châi tamo, mê khu ƀok thái pơkeăng đi đo athế hnê tối kuăn pơlê troh a hngêi pơkeăng vâ khăm pơlât”.

Kong pơlê Dak Lak klêi kơ’nâi tơ’mot 2 kong pơlê, pơ’leăng mâ mơngế kơdrâm troh a 3 rơtuh 340 rơpâu ngế. Pêi pro tiô Tơdroăng pơkâ kơxô̆ 72 dêi Khu xiâm ngăn cheăng Kal kí, hneăng hơnăm 2026-2030, Dak Lak tiô tối hdrối kô mơ’no 1.000 rơtal liăn rêm hơnăm vâ khăm pơlât tâi tâng tung châ chăn mơngế ăm kuăn pơlê. Krê a hơnăm 2026, kong pơlê hiăng mơ’no 400 rơtal liăn vâ xing xoăng ăm 102 to cheăm, bêng, ƀă kơlo ki xing xoăng mê ai dâng 350 rơpâu liăn 1 ngế 1 roh khăm ƀă pơlât. Pôa Lương Nguyễn Minh Triết, Kăn pơkuâ hnê ngăn Đảng Kong pơlê Dak Lak ai tối nhên, ƀă tơnêi tíu ki kân rơdâ, pơ’leăng mâ mơngế rêh ối a mâu pơlê cheăm ôh tá todâng, tơ’mô dêi pó, kơxô̆ mâu rơpŏng kơtiê ƀă hdrông kuăn ngo ga kơdrâm, hnoăng cheăng ki khăm pơlât ăm ivá châ chăn kuăn pơlê cho hnoăng cheăng ki kal, pro pơxúa trâu rơdâ, tơxâng mơnê kân, vâ ga tro tiô tơdroăng hiăng pơkâ, ôh tá mơhrâm lôi ngế ki lâi pá rŏng.

Kăn pơkuâ hnê ngăn Đảng kong pơlê Dak Lak hiăng pơkâ thế, mâu khu râ, kơvâ cheăng, pơlê cheăm rak vế, pêi pro ƀă hnoăng cheăng ki pôu râng dêi kân má môi.

“Mâu kơ koan, tíu pêi cheăng ƀă kơvâ ngăn ‘na pơkeăng ƀă khăm pơlât athế lăm rêm hơlâ troăng, tơgôu péa tơrêm toăng hngêi vâ tơniăn ăm rêm ngế pơrá châ khăm pơlât rêm rơnó, malối ƀă mâu rơpŏng ai hnoăng cheăng kăch măng ai hnoăng kân tơnêi têa, mơngế ki hiăng hên hơnăm, mơngế chó chêng, plôm mâ, klêk tuăn, rơpŏng kơtiê ƀă hdrông kuăn ngo. Kơvâ ngăn ‘na pơkeăng ƀă khăm pơlât dêi lâp kong pơlê xuân pơkal athế tơkŭm hên mâu ngế, mâu kế tơmeăm, khu tơkŭm cheăng lăm khăm pơlât dêi kong pơlê ki kal vâ tơkŭm ivá cheăng xiâm, mâu kế tơmeăm, tơkŭm mâu roh khăm pơlât a tơrêm pơlê cheăm tiô troăng hơlâ khoa hok, rơkê plĕng khât, kring vế tơniăn hnoăng cheăng khăm pơlât châ tơƀrê má môi”.

Hnoăng cheăng khăm pơlât ôh tá tâi liăn ăm tâi tâng kuăn pơlê, ôh tá xê to gum châ rĕng ‘nâi hdrối, vâ rĕng teăm djâ khăm pơlât, mê tơdroăng kố ối tơveăng gum mơjiâng túa cheăng ki rak ngăn ivá châ chăn hbrâ ăm tơdroăng ki vâ khăm pơlât tung pơlê pơla. Ƀă tơdroăng kơdo mơ-eăm dêi tâi tâng khu râ hnê ngăn ‘na tơdroăng cheăng kal kí, ki xiâm dêi tơdroăng cheăng rêm ngế kuăn pơlê châ pơkuâ ngăn ivá châ chăn, châ rak ngăn ‘na tơdroăng cheăng khăm pơlât chal nếo dế hiăng chiâng troăng hơlâ ki pêi pro kơhnâ khât, xo ing tơdroăng pơkâ kơxô̆ 72 dêi Khu xiâm ngăn ‘na cheăng Kal kí thâ rĕng mot tung tơdroăng rêh kâ ối rêm hâi a kơpng kong kế, ngo ngối ki kân rơdâ kố.