Pôa Lê Minh Hưng, Ngế pro xiâm hnê ngăn tơnêi têa veăng rôh leh. Tiô pôa Lê Minh Hưng, Ngế pro xiâm hnê ngăn tơnêi têa, hngêi ối ăm mung thế châ mơnhên cho tơdroăng cheăng ton xŏn, gum kơdrâm kuăn pơlê, ki má lối cho kŏng nhân, mơngế pêi cheăng, sinh viên, kăn ƀô̆, kŏng chưk, viên chưk ƀă khu cheăng ai tơdroăng kal vâ kân ‘na mung hngêi ƀă yă ki tơtro.

Ngế pro xiâm hnê ngăn tơnêi têa pơkâ Hà Nội kơjo mơnúa pêi hdrối, thế prôk hdrối, thâ séa ngăn tâi tâng pơkâ pêi, tơnêi ki u ai, hngêi kế tơmeăm tơnêi têa dế xúa ôh tá châ tơƀrê vâ ai troăng pêi ki rah xo bro lế lĕm tro, mơjiâng hngêi ối ăm mung; tơbleăng Ngế pro xiâm hnê ngăn Chin phuh tơdroăng châ tơƀrê tung khế 6 hơnăm 2026. Ngế pro xiâm hnê ngăn tơnêi têa tối nhên, mâu tơdroăng mơnúa dêi Hà Nội tâng pêi pro châ tơƀrê kô po rơdâ lâp tơnêi têa.

Xông tơpui a leh pơxiâm po, pôa Vũ Đại Thắng, Kăn hnê ngăn Vi ƀan Pơlê kong kân Hà Nội mơnhên kố cho troăng prôk ki nhên vâ djâ Tơdroăng pơkâ dêi Khu xiâm kal kí ‘na mơjiâng ƀă mơnhông Pơlê kong xiâm Hà Nội tung chal nếo, Luât pơlê kong xiâm, Pơkâ Tâi tâng pơlê kong xiâm ƀă mâu troăng pơkâ pêi, troăng hơlâ ki phá tơ-ê dêi Tơnêi têa mot tung pêi pro nôkố; mơhno tơdroăng khŏm mơ-eăm dêi Hà Nội tung tơdroăng xúa châ tơƀrê mâu troăng pơkâ pêi hiăng châ pơcháu vâ mơjiâng ivá tơtêk nếo, tíu mơnhông mơdêk nếo ƀă mâu ki kơnâ nếo ăm kuăn pơlê kong xiâm.