Lối 1 khế kố, mâu hâi mơ’nui măng tĭng, a Tíu xiâm pro hlá mơ-éa cheăng kâ rêh ối ƀă tơnêi têa Tơkŭm tâi tâng cheăm Hàm Thuận, kong pơlê Lâm Đồng, khu rơhdruê xuăng mâu khu ƀă mơđah tơbleăng ếo pơtâk hdrông kuăn ngo Chăm pơrá hâk vâ pơtâp. Ngoh Thông Đinh Đương, tối ăm ‘nâi, kố cho rôh apoăng ngoh châ veăng Hâi tơkŭm khôi túa lĕm tro Chăm lâp tơnêi têa, ngoh hâk tơngăm ƀă ro xua châ mơhnhôk:

“Kố ôh tá xê to môi Hâi tơkŭm xah hêi ro kân mê kố cho tíu vâ ngin o kô chiâng tơdjuôm ivá veăng mơ’no ivá iâ dêi tơná vâ mơđah tơbleăng khôi túa lĕm tro, vêa vong hdrông kuăn ngo dêi mơngế Chăm ngin o ƀă tâi tâng vâi krâ nhŏng o. Mơnê hên kơ Đảng ƀă Tơnêi têa hiăng pro tơ’lêi hlâu ăm mơngế Chăm tâi tâng rêm tíu tung lâp tơnêi têa kô chiâng tơkŭm hôp, mơdêk ihiâm mơno khôi túa lĕm tro dêi rơxông ối nếo tung la ngiâ, tung tơdroăng rak vế, mơnhông khôi túa lĕm hdrông kuăn ngo Chăm. Á xuân môi tiah tâi tâng rêm ngế tung mâu ngế diễn viên nôkố dế mơ-eăm tâi ivá, pói vâ djâ mâu tơdroăng rơhdruê xoăng ki rơkê má môi vâ mơđah ăm vâi krâ nhŏng o ngăn’’.

Ƀă dó inâi djâ troh Hâi tơkŭm xah hêi ro “Rak vế, mơnhông ki kơnâ khôi túa lĕm tro hdrông kuăn ngo Chăm kong pơlê Lâm Đồng tung chal nếo’’, khu Lâm Đồng kô veăng hên tơdroăng ki xiâm má môi vâ tơbleăng trâu hơngế khôi túa lĕm tro Chăm dế châ pơlê pơla rak. Tung mê, tơdroăng mơhno khôi túa lĕm tro tơkŭm a mâu tơdroăng ki xiâm, môi tiah: mơđah tơbleăng, mơđah a leh hô̆i, tơdroăng po khôi túa lĕm tro vâi krâ nah hdrông kuăn ngo Chăm; mơđah tơbleăng, mơhno khôi túa lĕm tro hdrông kuăn ngo Chăm tung tơdroăng mơjiâng ƀă gâk kring pơlê xiâm.

Tơdrêng amê, ai tơdroăng mơđah tơbleăng, mơhno tơdroăng cheăng tiô khôi vâi krâ nah teăn ếo pơtâk, tơdroăng meăn pro tơmeăm ƀă tơnêi hneăn dêi hdrông kuăn ngo Chăm; tơ’noăng rơhdruê xuăng mâu khu ƀă mơđah tơbleăng ếo pơtâk hdrông kuăn ngo Chăm.

Ngê̆ nhân Ưu tú Lâm Tấn Bình a cheăm Bắc Bình, tối ăm ‘nâi, a hâi tơkŭm xah hêi ro, khu kô mơđah, tơbleăng tơdroăng leh hô̆i, tơdroăng po ‘’Pôk thái kăn hệ phái Kadhar tơdroăng khôp Bàlamôn dêi mơngế Chăm Lâm Đồng’’. Kố cho tơdroăng mơđah tơbleăng mơ’no hên ivá tơkŭm pêi pro:

“Leh hô̆i pôk thái kăn Kadhar cho rôh tơkŭm tơdroăng khôi túa lĕm tro ngê̆ thuât chal krâ Chăm hên hĭn, pêng păm khôi túa lĕm tro ing mâu tơdroăng leh djâ tơdroăng tung dế ƀă mâu tơdrá rơhdruê pleăng Xeăng tâi ihiâm mơno dêi ƀok phop Gru kadhar, rơtế ƀă rơkong khôp pâ tá tuăn ihiâm mơno dêi Muk Pajuw vâ kheăn kơdeăn hnoăng, tơdroăng rôh nah dêi mâu Pơtáu hiăng châ chiâng Xeăng, ing mâu tơdrá nhak ro rih dêi idrâp kơđơn kanyi, mơjiâng chiâng tơdrá trâu hơngế ing tuăn ihiâm ƀă tơdroăng loi tĭng dêi kuăn khôp...)

Pakĭng tơdroăng tơ’noăng ‘na khôi túa lĕm tro vâi krâ nah, rơhdruê xuăng, tơ’noăng ivá, khu Lâm Đồng ối veăng tíu mơđah tơbleăng khôi túa lĕm tro vâi krâ nah, pro ô eăng um méa mơngế Chăm a Lâm Đồng tung tơdroăng mơjiâng ƀă kring vế tơniăn pơlê xiâm; tíu chôu ‘măn tơmeăm khoăng rôh nah, tíu ki lĕm mơnâ mâ ngăn, mâu leh hô̆i; mơđah tơbleăng khu tơmeăm kơnía khôi túa lĕm tro Hdrông pơtáu Chăm...

Ki lĕm tui tơdroăng, khu kô veăng mơđah tơbleăng mâu tíu troh ki má môi dêi Lâm Đồng, mơđah tơbleăng mâu tơmeăm pêi lo ing chiâk deăng, tơmeăm OCOP ki lĕm má môi;...Pôa Nguyễn Tú Long, Phŏ Kăn pơkuâ Tíu xiâm Khôi túa lĕm tro ƀă Pơkuâ Kơdrum reăng kiâp hmốu Dak Nông – Kong pơlê Lâm Đồng tối ăm ‘nâi, khu ai 85 ngế veăng Hâi tơkŭm xah hêi ro ƀă tuăn ihiâm mơno trâm mâ tơpui tơno, hriâm dêi pó rơtế mơnhông mơdêk:

“Nôkố tơdroăng hbrâ hiăng tơniăn. Tối tơdjuôm tơdroăng ngin pêi pro djâ pêng păm khôi túa lĕm tro hdrông kuăn ngo Chăm. Hơnăm kố, khu cheăng cho dêi Hàm Thuận Bắc (ton) mê cho: kơtú ƀa long, mâu môn tơ’noăng ivá kuăn pơlê, klêi mê khu diễn viên veăng tơ’noăng rơhdruê xuăng mâu khu ƀă mơđah tơbleăng ếo pơtâk. Krê tơdroăng leh hô̆i mê khu cheăng cho khu pơkuâ tơdroăng khôp dêi Bắc Bình (ton)’’.

Hâi tơkŭm xah hêi ro Khôi túa lĕm tro hdrông kuăn ngo Chăm rôh má VI a kong pơlê Khánh Hòa kô tơkŭm po sap ing hâi lơ 26 troh hâi lơ 28/6 la ngiâ, cho tíu tơkŭm mơngiơk khôi túa lĕm tro Chăm tung lâp tơnêi têa. Hâi tơkŭm xah hêi tơkŭm lối 700 ngê̆ nhân, diễn viên, ngế tơ’noăng kuăn pơlê troh ing 7 kong pơlê, pơlê kong kân, mê cho: Khánh Hòa, Gia Lai, Lâm Đồng, Tây Ninh, An Giang, Dak Lak ƀă Pơlê kong kân Hồ Chí Minh.

Rơtế ƀă Khánh Hòa, Lâm Đồng cho kong pơlê ai kơdrâm kuăn pơlê hdrông kuăn ngo Chăm má môi lâp tơnêi têa. Tung pơla kố nah, tơdroăng rak vế, mơnhông mâu ki kơnâ khôi túa lĕm tro dêi mâu hdrông kuăn ngo châ kong pơlê tơmâng.

Ƀă ihiâm mơno trâm mâ tơpui tơno, hriâm a dêi pó, mơdêk hlê plĕng, pôu râng hnoăng cheăng dêi pơlê pơla tung tơdroăng rak vế, mơnhông mâu ki kơnâ khôi túa lĕm tro vâi krâ nah tung rơxông mot tơrŭm ƀă mơnhông dêi tơnêi têa, mâu diễn viên không chuyên ƀă mâu ngê̆ nhân mơngế Chăm kong pơlê Lâm Đồng dế hâk pơtâp ƀă hâk vâ ‘nâng, pói tơkôm troh Hâi tơkŭm xah hêi ro pêng păm khôi túa lĕm tro dêi hdrông kuăn ngo tơná.