Riân troh hâi lơ 18/6, kong pơlê Dak Lak hiăng pê klêi cheăng in hlá mơ-éa chêh tơdroăng pêi pro rơtế ƀă lối 1.700 kơtâ hlá mơ-éa chêh ƀă nâl Xuăn ƀă nâl Ănglê, pơtroh ăm mâu kăn, mâu khu ‘no liăn cheăng tung tơnêi têa pin ƀă kong têa ê. Hôp tơpui tơdroăng ‘no liăn pêi cheăng ki apoăng klêi tơ’mot kong pơlê, Dak Lak tối kô ăm hlá mơ-éa pơkâ dêi khu pơkuâ vâ môi tuăn tiô troăng hơlâ ‘no liăn cheăng, hlá mơ-eá mơnhên chêh inâi ‘no liăn cheăng lơ hlá mơ-éa chôu pâ ăm 28 tơdroăng tơkêa bro ki kân, ƀă tâi tâng kơxô̆ liăn chêh vâ pêi tâk troh lối 43.500 rơtal liăn.

Vâ tơniăn ăm hneăng hôp châ tơbrê, tơ’mot hên khu vâ ‘no liăn cheăng, pôa Đỗ Hữu Huy, Kăn hnê ngăn Vi ƀan Kuăn pơlê dêi kong pơlê Dak Lak pơkâ thế mâu tíu pêi cheăng, kơvâ cheăng pơtối séa ngăn inâi mâu tơdroăng tơkêa pro, hbrâ achê khu mơdró ƀă pêi klêi mâu tơdroăng pơkâ tơkŭm po.