Tung hneăng cheăng hiăng hluâ, Khu pơkuâ Vâi kơdrâi mâu râ hiăng hbrâ pơhlêh nếo tơdroăng ki xiâm, troăng pêi cheăng, châ mơhno ing mâu tơdroăng môi tiah tơdroăng tơ’noăng ‘’Mơjiâng mơngế Vâi kơdrâi Việt Nam rơxông nếo’’; rôh mơhnhôk ‘’Mơjiâng rơpŏng 5 ôh, 3 krúa’’; mâu tơdroăng tŏng gum vâi kơdrâi kơdroh kơtiê, mơnhông cheăng kâ châ pêi pro trâu rơdâ, gum tŏng gum lối 200 rơpâu rơpŏng vâi kơdrâi hluăn ing kơtiê; 118 rơpâu vâi kơdrâi châ tŏng gum pơxiâm tăng cheăng pêi ƀă mơjiâng nếo lối 700 khu tơrŭm xua vâi kơdrâi veăng pơkuâ...

Hneăng hôp kân hiăng rah xo Khu pơkuâ Xiâm Khu pơkuâ Vâi kơdrâi Việt Nam hneăng má XIV ai 111 ngế. Jâ Lê Thị Thủy pơtối châ rah xo Kăn xiâm hnê ngăn Khu pơkuâ Vâi kơdrâi Việt Nam hneăng nếo.

Xông tơpui hnê mơhno Hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i mơnhên, tung plâ tơdroăng rôh ton nah dêi hdrông mơngế pin, vâi kơdrâi Việt Nam hiăng mơnhên hnoăng ki kal tung tâi tâng mâu kơvâ dêi tơdroăng rêh ối pơlê pơla. Pôa Trần Thanh Mẫn loi tơngah, ƀă khôi túa lĕm tro vâi krâ nah lĕm tro, tuăn ihiâm mơno pâ nhuô̆m tơnêi têa, tơdroăng ki pleăng dêi hnoăng cheăng, tuăn hiâm mơno lĕm, tơdroăng ki tơmiêt pêi rơkê ƀă ai tuăn vâ mơ-eăm ó rơdêi, vâi kơdrâi Việt Nam kô pơtối ai hên tơdroăng veăng gum kân tâ mê nếo ăm tơdroăng mơnhông mơdêk rĕng ƀă krá tơniăn dêi tơnêi tung chal nếo, tơxâng ƀă 8 chư mêa ki Pôa Hồ hiăng diâp ăm vâi kơdrâi Việt Nam “Ngế khên tơnôu – Ti bê nhuô̆m kơ vâi rơdêi – Ai hiâm mơno lĕm – Pêi viâ klêi tơdroăng cheăng hngêi ƀă tơnêi têa’’.