Kăn pơkuâ hnê ngăn cheăng Đảng kong pơlê Dak Lak mơnhên ƀă kheăn kơdeăn mâu tơdroăng veăng gum dêi Rơ’jíu Việt Nam (VOV) tối tơdjuôm ƀă Kơ koan teăng mâ kơpong Tây Nguyên tối krê ƀă tơdroăng mơjiâng Đảng, mơjiâng khu cheăng kal kí ƀă mơnhông cheăng kâ – rêh ối pơlê pơla dêi kong pơlê Dak Lak tung pơla kố nah.

Pôa tối, mâu tơdroăng, tin ƀai dêi VOV hiăng tối tơdroăng cheăng tung mâu kơvâ cheăng kâ – rêh ối pơlê pơla, tơdroăng rêh ối kuăn pơlê mâu hdrông kuăn ngo tung kong pơlê; rơtế tơdroăng mơjiâng Đảng, mơjiâng khu cheăng kal kí ƀă hnê mơhno pơkuâ. Ƀă ki rơdêi dêi hlá tơbeăng tơpui mơ’no tung rơ’jíu, VOV hiăng djâ troăng pơkâ pêi, troăng hơlâ dêi Đảng ƀă Tơnêi têa troh achê ƀă kơpong hơngế hơngo, kơpong kuăn pơlê hdrông kuăn ngo; gum pro krá tơrŭm môi tuăn tâi tâng kuăn pơlê, rak tơniăn kal kí – rêh ối pơlê pơla tung pơlê.

Kăn pơkuâ hnê ngăn cheăng Đảng kong pơlê Dak Lak pói vâ VOV pơtối mơnhông ki rơdêi, mơdêk chêh tối tơdroăng nếo ai ‘na tơdroăng pơkuâ, hnê mơhno dêi kong pơlê; chêh tơdroăng tơmiât, pói vâ păng ‘nâng dêi kuăn pơlê; troh lâp lu mâu troăng pêi ki rơkê, troăng pêi châ tơƀrê ƀă rơtế kong pơlê tung troăng prôk mơnhông mơdêk.