A rôh trâm mâ, Ngế pro xiâm hnê ngăn tơnêi têa tối nhên, rôh lăm pôu kong têa Rusi ƀă veăng leh tơbâ 80 hơnăm Hâi Plâ ƀlêi trâng tung rôh tơplâ Kân kring vế tơnêi têa dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa (khế 5/2025), Kăn xiâm má môi dêi péa tơnêi têa hiăng tơmâng hên tơdroăng hlê tơdjuôm ƀă mơ-eăm mơdêk tŭm tơdroăng tơrŭm cheăng pơla péa pâ rơtế ai pơxúa tung tŭm tơdroăng, tơtro ƀă mâu tơdroăng pơkâ dêi hơnăm mơnhông tơtêk nếo.

Ngế pro xiâm hnê ngăn tơnêi têa loi khât tiah kố, tung la ngiâ, Kŏng hoa Tatarstan kô châ tăng kong pơlê Việt Nam tơtro vâ mơjiâng tơrŭm cheăng, tăng rôh tơrŭm tung mâu kơvâ cheăng pơla péa pâ ai rơdêi ƀă kal vâ môi tiah cheăng kâ-tê mơdró, hnê hriâm ƀă hnê mơjiâng tuăn ngôa rơkê, ôm hyô, túa lĕm tro. Pakĭng mê, mơhnhôk mâu kŏng ti ngăn tơƀai péa tơnêi têa tơmâng khât mơnhông pro tơ’nôm troăng tơƀai kơneăng tê mơdró tơdjêp ƀă Kazan ƀă Hà Nội.