Po tuăn tơmiât 7 tơdroăng ki xiâm vâ pơtối pêi kêi đeăng tối tơbleăng mơgêi tung la ngiâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi, mơgêi thế tơtrăng ngăn tơdroăng ki kơdroh, tro piu tro xôi, mâu tơdroăng ki tá hâi châ tơƀrê, mâu ƀai hriâm, mâu tíu ki kreăng kal pơtối tah lôi; tơdrêng amê, thế pêi mâu tơdroăng ki má môi mâu ƀai hriâm ki tro djâ tiô pơkâ, môi tiah: kâi trâng pơkâ tơniăn krê hdrông mơngế ƀă chưh ngiah xah hô̆i; đi đo pơhlêh nếo tơmiât pêi rơkê tung tơdroăng ki rak krá pơkâ pêi; kuăn pơlê cho xiâm rêi; mơjiâng Đảng krúa lĕm, krá tơniăn tâi tâng; tơleăng tro mâu tơdroăng tơrŭm kân...

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ, ki má lối nhuô̆m mơnhên troăng tơmiât pêi la ngiâ ƀă mơnhên troăng prôk la ngiâ kăn pơkuâ mơnhông mơdêk tơnêi têa tung 100 hơnăm la ngiâ. Pôa xuân pơkâ thế, tơmâng xo, mơhnhôk tuăn ngôa rơkê dêi tâi tâng Đảng, dêi mâu kơ koan hriăn plĕng, mâu kăn pơkuâ khoa hok, mâu ngế ki rơkê, mâu kăn pơkuâ ing mâu rơxông.

Pakĭng tơdroăng ki xiâm pêi cheăng, tơtrŏng thế séa ngăn achê mâu tơdroăng tơkŭm pêi pro, xua tơdroăng cheăng kân, pơkâ hên, hâi khế prôk cho rĕng, xua mê, tâng tơkŭm po châ tơƀrê tơdroăng cheăng ôh tá lĕm mê cho pá vâ tơniăn tơdroăng mơjiâng pro ƀă ki dâi lĕm.